།ལྗོན་ཤིང་གཞན་དག་རྣམས་ཁ་ཅིག་ལ་ནི་ཤེལ་གྱི་རང་བཞིན་དང་གསེར་དམར་པོའི་རང་བཞིན་གྱི་འཁྲི་ཤིང་གིས་ཕུབ་པར་གྱུར་པའོ། །ལྗོན་ཤིང་གཞན་དག་རྣམས་ཁ་ཅིག་ལ་ནི་པད་མ་རཱ་གའི་རང་བཞིན་དང་དངུལ་གྱི་རང་བཞིན་གྱི་འཁྲི་ཤིང་དག་གིས་ཡོངས་སུ་བསྐོར་ནས་གནས་པའོ། །ལྗོན་ཤིང་གཞན་དག་རྣམས་ཁ་ཅིག་ལ་ཡང་དྲིལ་བུ་གཡེར་ཀའི་དྲ་བ་བརྒྱངས་པའི་སྒྲ་འཁྲོལ་བའོ། །ལྗོན་ཤིང་གཞན་དག་རྣམས་ཁ་ཅིག་ལ་ནི་ཤིང་ཐོག་རྣམས་སྨིན་པར་འགྱུར་བ་ལ་འདི་ལྟ་སྟེ། ཁུ་བའི་འབྲས་བུ་རྣམས་ལས་ནི་འབྲས་བུ་དེ་དག་རྣམས་ལས་རྣམ་པ་དེ་ལྟ་བུའི་ཁུ་བ་དག་རབ་ཏུ་འབབ་པར་འགྱུར་བ་གང་ཡིན་པའི་ཁྱད་པར་གྱིས་ལྷ་རྫས་ཀྱི་མྱོས་བྱེད་དེ་དག་རྣམས་ཀྱི་རོ་ཡང་ཅུང་ཟད་ཀྱང་མ་ཡིན་ནོ། །ལྗོན་ཤིང་གཞན་དག་འགའ་ཞིག་ནི་མེ་ཏོག་གི་ཤིང་ཡིན་ཏེ། གང་དག་གི་དྲི་རྣམས་ཇི་སྲིད་དུ་དཔག་ཚད་བརྒྱར་ཡང་རླུང་གིས་རབ་ཏུ་འདེབས་པར་བྱེད་དོ། །ལྗོན་ཤིང་གཞན་དག་རྣམས་ཁ་ཅིག་ནི་སྒྲའི་ཤིང་ཡིན་ཏེ། གང་དག་རླུང་འཇམ་པོས་རབ་ཏུ་བསྐྱོད་པར་གྱུར་པ་རྣམས་རྣམ་པ་དེ་ལྟ་བུའི་འདབ་མ་ཀུན་ཏུ་བསྐྱོད་པ་ལས་སྐྱེས་པའི་མཆོག་ཏུ་སྙན་པར་གྱུར་པ་གླུ་མཁན་གྱི་ལས་ཆེས་ལྷག་པར་གྱུར་པའི་སྒྲར་འགྱུར་རོ། །ལྗོན་ཤིང་གཞན་འགའ་ཞིག་ནི་གཅིག་ཏུ་ལྟ་བ་མངོན་པར་དགའ་བ་ཡིན་ནོ། །གང་དག་རྣམ་པ་དེ་ལྟ་བུའི་གཟུགས་དག་ཡིན་ཏེ། གང་དག་གི་ཁྱད་པར་གྱིས་ཁ་དོག་སྣ་ཚོགས་པ་རྣམས་ཀྱིས་རྣམ་པར་བཀྲ་བའི་ནགས་ཀྱི་རྒྱལ་པོ་དག་གིས་ཀྱང་བཅུ་དྲུག་ཁོ་ནའི་ཆ་འབའ་ཞིག་ཏུ་ཆོག་པ་ཡང་མ་ཡིན་ནོ། །བདུག་པའི་ཤིང་ལྗོན་པ་གཞན་ཁ་ཅིག་ནི་རྣམ་པ་སྣ་ཚོགས་པའི་བདུག་པའི་དྲི་རྣམས་གང་དག་གིས་འཐུལ་བར་བྱེད་པ་སྟེ། མཆོག་ཏུ་དྲི་ཞིམ་པར་གྱུར་པའི་དྲི་གང་གིས་བསྣམས་པ་ན་ལྷ་རྣམས་ཀྱང་དགའ་བར་བྱེད་པ་ཡིན་ནོ། །རྣམ་པ་དེ་ལྟ་བུའི་ཤིང་ལྗོན་པ་ཡོན་ཏན་མཚུངས་པ་མེད་པ་གཞན་དག་རྣམས་ཀྱིས་ཀྱང་པད་མའི་རྫིང་བུ་མཐོང་ན་ཀུན་དགའ་བ་ཞེས་བྱ་བ་ཡོངས་སུ་ཁྱབ་པར་གྱུར་པ་ཡིན་ནོ། །དེ་ནས་ལྷ་དེ་དག་རྣམས་ཀྱིས་རྣམ་པ་དེ་སྲིད་མངོན་པར་མཐོང་བར་གྱུར་ཏེ། ངོ་མཚར་བ་རྣམས་མཐོང་ཞིང་མཚུངས་པ་མེད་པར་ཉེ་བར་ལོངས་སྤྱོད་པར་བྱ་བ་རྣམས་མངོན་དུ་ལེགས་པར་མཐོང་ནས། རཱ་ཛ་ནི་ན་རྒྱུ་བའི་ལྷ་དེ་དག་རྣམས་ཁ་ཅིག་ནི་འབྲས་བུ་རྣམས་ཟ་བ་ཡིན་ནོ།