།སྔོན་པོ་ཆེན་པོའི་རང་བཞིན་གྱི་སྡོང་བུ་རྣམས་ལ་ནི་ཤེལ་དང་ཨིན་དྲ་ནཱི་ལའི་ཡལ་ག་རྣམས་ལ་གསེར་བཙོ་མའི་རང་བཞིན་གྱི་ལོ་མའོ། །གསེར་གྱི་སྡོང་བུ་དང་སྡོང་བུ་ཕྱེད་བཻ་ཌཱུརྱ་རྣམས་ལ་ནི་སྔོན་པོ་ཆེན་པོའི་ཡལ་ག་རྣམས་ལའོ། །གསེར་བཙོ་མ་དང་མུ་ས་རའི་འདབ་མའོ། །ཁ་ཅིག་ནི་ཐམས་ཅད་དུ་གསེར་གྱི་སྡོང་བུ་དང་གསེར་གྱི་འདབ་མ་དང་གསེར་གྱི་ཡལ་ག་དང་ལྡན་པ་ཉི་མ་བས་ལྷག་པར་གཟི་བརྗིད་ཀུན་ཏུ་སྣང་བར་བྱེད་དོ། །ཤིང་ལྗོན་པ་གཞན་ཁ་ཅིག་ལ་ནི་བཻ་ཌཱུརྱའི་ཡལ་ག་དང་བཻ་ཌཱུརྱའི་འདབ་མ་དང་ལྡན་པ་ཡིན་ཏེ། སྤྲིན་གྱི་ཕུང་པོ་དང་འདྲ་བར་ཐེན་འཁོར་ཀུན་ནས་རྣམ་པར་མཛེས་པར་བྱེད་དོ། །ཁ་ཅིག་ནི་གསེར་བཙོ་མའི་རང་བཞིན་གྱི་སྡོང་བུ་དང་གསེར་བཙོ་མའི་རང་བཞིན་གྱི་ཡལ་ག་དང་གསེར་བཙོ་མའི་རང་བཞིན་གྱི་འདབ་མ་སྤེལ་བའི་མེའི་ཕུང་པོའི་མདོག་དང་མཚུངས་པར་ཀུན་ནས་སྣང་བར་བྱེད་དོ། །ཁ་ཅིག་ནི་དངུལ་གྱི་འདབ་མ་དང་དངུལ་གྱི་ཡལ་ག་དང་དངུལ་གྱི་སྡོང་བུ་རྣམས་ཀྱིས་ཟླ་བ་དང་འདྲ་བར་ཀུན་ཏུ་སྣང་བར་བྱེད་དོ། །ཁ་ཅིག་ནི་ཨིན་དྲ་ནཱི་ལའི་རང་བཞིན་གྱི་སྡོང་བུ་དང་ཨིན་དྲ་ནཱི་ལའི་རང་བཞིན་གྱི་འདབ་མ་ལ་ཨ་ག་རུ་ནག་པོའི་དུ་བའི་མདོག་ཏུ་ཀུན་ནས་སྣང་བར་བྱེད་དོ། །ལྗོན་ཤིང་གཞན་ཁ་ཅིག་ནི་འཁྲི་ཤིང་སྣ་ཚོགས་པ་རྣམས་ཀྱིས་ཡོངས་སུ་བསྐོར་བ་ཡིན་ཏེ། གང་དག་གསེར་བཙོ་མའི་རང་བཞིན་ཡིན་པ་དེ་དག་ནི་སྔོན་པོ་མཆོག་ཏུ་གསལ་བའི་ཁ་དོག་དང་ལྡན་པའི་ཨིན་དྲ་ནཱི་ལའི་རང་བཞིན་གྱི་འཁྲི་ཤིང་གིས་ཉེ་བར་བཏུད་ནས་ལམ་མེ་སྣང་བར་བྱེད་དོ། །ལྗོན་ཤིང་གཞན་ཁ་ཅིག་ནི་གསེར་དང་དངུལ་གྱི་རང་བཞིན་དུ་གྱུར་པ་རྣམས་སོ། །ལྗོན་ཤིང་གཞན་ཁ་ཅིག་ནི་མེ་ཏོག་ཕུན་སུམ་ཚོགས་པ་རྣམས་ཀྱི་ཁ་དོག་སྣ་ཚོགས་པའི་མེ་ཏོག་རྣམས་ཀྱིས་ཉེ་བར་མཛེས་པར་གྱུར་པའོ། །ལྗོན་ཤིང་གཞན་ཁ་ཅིག་ནི་མན་དཱ་ར་བའི་རང་བཞིན་ནོ། །གཞན་དག་རྣམས་ཁ་ཅིག་ལ་ནི་པད་མ་ཀུ་ཤེ་ཤ་ཡའི་འདབ་མ་ཀུན་ཏུ་སྣང་བར་གྱུར་ཏོ། །ལྗོན་ཤིང་གཞན་དག་རྣམས་ཁ་ཅིག་ལ་ནི་དྲིལ་བུ་གཡེར་ཀའི་དྲ་བས་ཀུན་ནས་སྦྲེལ་བ་རྣམས་ཀྱི་སྒྲ་འཁྲོལ་བར་གྱུར་པ་གསེར་དང་དངུལ་གྱི་རང་བཞིན་གྱི་འཁྲི་ཤིང་གིས་ཉེ་བར་ཕུབ་པར་གྱུར་པའོ། །ལྗོན་ཤིང་གཞན་དག་རྣམས་ཁ་ཅིག་ལ་ནི་ཤེལ་གྱི་རང་བཞིན་དང་གསེར་དམར་པོའི་རང་བཞིན་གྱི་འཁྲི་ཤིང་གིས་ཕུབ་པར་གྱུར་པའོ།