གླུ་དང་གར་དང་རྒོད་པ་དང་འགྱིང་བ་དང་རྩེ་བ་དང་བཅས་པར་འགྱུར་ཞིང་། ནད་ཀྱི་འཇིགས་པ་དང་མྱ་ངན་གྱི་འཇིགས་པ་དང་ལྐོག་ཏུ་གྱུར་པའི་སྐྱོན་རྣམས་དང་བྲལ་བ་དང་རང་ཇི་ལྟར་འདོད་པ་བཞིན་དུ་འགྲོ་བ་དང་རྒྱུ་བར་བྱེད་པ་མཆོག་ཏུ་བདེ་བ་དང་ལྡན་པར་གྱུར་པ་རྣམས་རྔ་སྐད་ཡན་ལག་ལྔ་དང་ལྡན་པས་གར་བྱེད་པར་གྱུར་པས་རི་ཆེན་པོ་དེ་ལ་ཇི་ལྟར་འདོད་པའི་ཁ་ཟས་རྩི་དག་འཐུང་བར་བྱེད་དོ། །བདུད་རྩི་ཡང་མིད་པར་གྱུར་པས་ནི་མཆོག་ཏུ་དགའ་བ་དང་ལྡན་པ་སྐྱེས་པར་གྱུར་ནས་དགེ་བར་བྱེད་དེ། རང་གི་ལས་དང་འདྲ་བའི་བདེ་བ་རྣམས་དང་ཡང་དག་པར་ལྡན་པར་གྱུར་པས། དེ་དེ་ལྟར་དགའ་བར་གྱུར་ནས་དེ་ཁོ་ན་བཞིན་དུ་བདེ་བ་ལ་ལོངས་སྤྱོད་པར་གྱུར་པ་ལས་དུས་ནམ་ཞིག་ན་གང་ན་མཐོང་ན་ཀུན་དགའ་བ་ཞེས་བྱ་བའི་པད་མའི་རྫིང་བུ་དེར་ཉེ་བར་འགྲོ་བར་བྱེད་དོ། །པད་མའི་རྫིང་བུ་དེ་ཡང་དཔག་ཚད་བཅུར་ཡངས་པ་དཔག་ཚད་ལྔར་རྒྱ་ཆེ་བར་གྱུར་པ་མཆོག་ཏུ་ཉེ་འཁོར་ཀུན་ནས་དགའ་བ་རྣམས་ལ་པད་མའི་རྫིང་བུ་འདིའི་དགའ་བ་དེ་ཉིད་ནི་ངང་པ་དང་ཀཱ་རཎྜ་བ་དང་ངང་ངུར་རྣམས་ཀྱིས་ཉེ་བར་མཛེས་པ་འདིའི་ཉེ་འཁོར་རྣམས་ན་ཡང་གསེར་བཙོ་མའི་མདོག་གི་པད་མས་ཉེ་བར་མཛེས་པར་གྱུར་པ། འདིའི་ཉེ་འཁོར་རྣམས་ཀུན་ནས་ཡང་དགའ་བར་གྱུར་པའི་གསེར་རྣམས་དང་བཻ་ཌཱུརྱ་དང་སྔོན་པོ་དང་སྔོན་པོ་ཆེན་པོ་དང་པད་མ་རཱ་གའི་རང་བཞིན་དུ་གྱུར་པའི་སྡུག་པ་དག་གིས་ཉེ་བར་མཛེས་པར་སྤྲས་པས་ཤིན་ཏུ་ཡང་མཛེས་པར་གྱུར་པ་ཀླུང་དུ་སྐྱེས་པའི་ཤིང་ལྗོན་པ་རྣམས་ཀྱིས་ཀྱང་ཉེ་འཁོར་ཀུན་ནས་མཛེས་པ་རྫིང་བུ་དེ་ཡོངས་སུ་བསྐོར་ནས་ཀུན་ཏུ་གནས་པ་ལ་འདི་ལྟ་སྟེ། གསེར་གྱི་རང་བཞིན་ལ་དངུལ་གྱི་འདབ་མ་དང་དངུལ་གྱི་རང་བཞིན་གྱི་ཡལ་ག་རྣམས་ལ་ནི་གསེར་གྱི་འདབ་མའོ། །ཨིན་དྲ་ནཱི་ལའི་ཡལ་ག་རྣམས་ལ་ནི་པད་མ་རཱ་གའི་འདབ་མའོ། །ཤེལ་གྱི་རང་བཞིན་གྱི་ཡལ་ག་རྣམས་ལ་ནི་བཻ་ཌཱུརྱ་དང་གསེར་དང་ཨིན་དྲ་ནཱི་ལའི་རང་བཞིན་གྱི་འདབ་མ་རྣམས་སོ། །བཻ་ཌཱུརྱའི་སྡོང་བུ་ཅན་རྣམས་ལ་ནི་གསེར་དང་དངུལ་དང་ཨིན་དྲ་ནཱི་ལའི་རང་བཞིན་གྱི་འདབ་མའོ། །སྔོན་པོ་ཆེན་པོའི་རང་བཞིན་གྱི་སྡོང་བུ་རྣམས་ལ་ནི་ཤེལ་དང་ཨིན་དྲ་ནཱི་ལའི་ཡལ་ག་རྣམས་ལ་གསེར་བཙོ་མའི་རང་བཞིན་གྱི་ལོ་མའོ།