།ཐབས་རྣམས་ཐམས་ཅད་ཀྱིས་ལུས་ཀྱི་རེག་བྱ་རྣམས་ཇི་ལྟ་བ་བཞིན་དུ་ཀུན་ཏུ་བརྟགས་པར་གྱུར་ནས་ཡིད་ཀྱིས་ཀྱང་ཆོས་ལ་ཀུན་ཏུ་ལྟ་བར་བྱེད་དེ། ཇི་ལྟར་ཡིད་ཀྱི་ཆོས་རྣམས་ཡིན་ན། འདི་ན་ཡིད་ཀྱི་རྐྱེན་དང་ཆོས་ཀྱི་རྐྱེན་ལས་ཀྱང་ཡིད་ཀྱི་རྣམ་པར་ཤེས་པ་དགེ་བའམ་མི་དགེ་བའམ་ལུང་དུ་མ་བསྟན་པ་ཡང་སྐྱེ་བར་འགྱུར་རོ། །དེ་ལ་གང་གི་ཚེ་མི་དགེ་བ་ལ་དམིགས་པར་གྱུར་པའི་ཡིད་ཀྱི་རྣམ་པར་ཤེས་པ་ཚུལ་བཞིན་མ་ཡིན་པ་འབྱུང་བར་འགྱུར་བ་དེའི་ཚེ། རིག་པར་འགྱུར་ཏེ་ཇི་ལྟར་བདག་ལས་སྐྱེས་པ་འདི་ནི་མི་དགེ་བའི་ཆོས་ཀྱི་དབང་དུ་བྱས་པའི་ཡིད་ཀྱི་རྣམ་པར་ཤེས་པ་སྐྱེས་པ་ཡིན་ལ། དགའ་བའི་འདོད་ཆགས་དང་ཀུན་ཏུ་ལྡན་པའི་སྲེད་པ་ཡིད་ལ་བྱུང་བས་ནི་བདག་དོན་མེད་པར་འགྱུར་རོ། །ཕན་པར་མི་འགྱུར་ཞིང་བདེ་བར་ཡང་མི་འགྱུར་རོ། །གང་དེ་ཁོ་ན་ལྟར་ཆོས་རྣམས་ཀྱི་འབྱུང་བ་དཔྱོད་པར་བྱེད་ཅིང་། དེ་ལྟར་ཆོས་རྣམས་ལ་ཆོས་ཀྱིས་རྗེས་སུ་ལྟ་བས་གནས་པར་གྱུར་པ་ནི། ཆོས་རྣམས་ཐམས་ཅད་ཀྱི་ཡང་རང་གི་མཚན་ཉིད་དང་། སྤྱིའི་མཚན་ཉིད་ལ་ཇི་ལྟ་བ་བཞིན་དུ་རྗེས་སུ་ལྟ་བས་དགའ་བའི་འདོད་ཆགས་དང་ལྷན་ཅིག་མཚུངས་པར་ལྡན་པའི་སྲིད་པ་ཡང་འབྱུང་བ་ཅན་གྱི་སྲེད་པ་རྣམས་ཀྱིས་འཆིང་བར་མི་འགྱུར་རོ། །དེ་དགའ་བའི་འདོད་ཆགས་ཀྱིས་བྱས་པའི་སྲེད་པ་དེ་དག་རྣམས་ལས་གྲོལ་བས་མཆོག་ཏུ་བདེ་བ་དང་ལྡན་པར་འགྱུར་རོ། །ཆོས་རྣམས་ཀྱི་ཡང་འཕེལ་བ་དང་འགྲིབ་པ་ཤེས་པར་འགྱུར་རོ། །དེ་ལྟར་གང་གི་ཚེ་ཇི་ལྟ་བ་བཞིན་དུ་ཡུལ་རྣམས་ཐམས་ཅད་ལ་ཡང་སོ་སོར་རྟོག་པར་བྱེད་པ་དེའི་ཚེ་འདི་ལ་ཡང་དག་པའི་ཤེས་པ་སྐྱེ་བར་འགྱུར་རོ། །དེའི་ཡང་དག་པའི་ཤེས་པ་དེས་ཉོན་མོངས་པ་རྣམས་ཟད་པར་བྱེད་དོ། །དེ་ཉོན་མོངས་པ་ཟད་པས་ཀྱང་ཟག་པ་མེད་པའི་ཡེ་ཤེས་སྐྱེ་བར་འགྱུར་རོ། །དེ་དེ་དང་ཡང་དག་པར་ལྡན་པས་གོ་འཕང་གི་མཆོག་འཐོབ་པར་འགྱུར་རོ། །དེ་ལྟར་དགེ་སྦྱོང་ངམ་བྲམ་ཟེའམ་གཞན་ཡང་དེའི་རིགས་ཅན་རྣམས་ཀྱིས་རྟག་པ་ཉིད་དུ་ཡུལ་རྣམས་ལ་ཡིད་ཆེས་པར་མི་བྱའོ། །དགྲ་ལྟ་བུར་གྱུར་པ་ཡིན་པ་གང་གི་ཕྱིར་ཡུལ་རྣམས་ནི་བཏང་སྙོམས་སུ་གཞག་པར་བྱ་སྟེ། སྲོག་ཆགས་རྣམས་ཐམས་ཅད་ཐུལ་འོག་ཏུ་འཇུག་པར་བྱེད་པ་ཡིན་ནོ། །དེའི་ཕྱིར་ཇི་སྲིད་དུ་ཟག་པ་མེད་པའི་ཡེ་ཤེས་སྐྱེས་པར་མ་གྱུར་པ་དེ་སྲིད་དུ་ཡུལ་རྣམས་ལ་ནམ་ཡང་འགའ་ཞིག་ལ་ཡང་ཡིད་ཆེས་པར་མི་བྱའོ།