།དེའི་ཕྱིར་ཇི་སྲིད་དུ་ཟག་པ་མེད་པའི་ཡེ་ཤེས་སྐྱེས་པར་མ་གྱུར་པ་དེ་སྲིད་དུ་ཡུལ་རྣམས་ལ་ནམ་ཡང་འགའ་ཞིག་ལ་ཡང་ཡིད་ཆེས་པར་མི་བྱའོ། །རྐོ་ཏྲོག་ཅན་དེ་དག་ནི་གྲོགས་པོའི་གཟུགས་སུ་འཆོས་པའི་དགྲ་བོ་རྣམས་ཡིན་ཞིང་། འཁོར་བའི་འཆིང་བ་རྣམས་ཐམས་ཅད་ཀྱང་དེ་དག་རྣམས་ཡིན་ནོ། །དེ་ནས་དེའི་དུས་དེར་རྨ་བྱའི་མངའ་བདག་དེས་ཚིགས་སུ་བཅད་པ་བརྗོད་པ། ཇི་ལྟར། ཡུལ་གྱི་དེ་ཉིད་མཐོང་བ་ཡིས། །ཡེ་ཤེས་ལྕགས་ཀྱུས་འཛིན་པར་བྱེད། །དེས་མ་བཟུང་བས་མི་བཟད་གཡོ། །དོན་མིན་ཐམས་ཅད་བྱེད་པར་འདོད། །ཡུལ་གྱི་བསམ་པ་རྨོངས་པ་རྣམས། །ཀུན་ཏུ་རྟོག་པ་སྙིང་ལ་སེམས། །འཚོ་བའི་བསམ་པ་ཀུན་སྡོམ་པའི། །འཆི་བདག་ཞགས་པ་འདིར་འོང་འགྱུར། །ཡང་མོའི་སེམས་ཀྱི་སྲོག་ཆགས་རྣམས། །ཡུལ་རྣམས་ཀྱིས་ནི་ཡོངས་སུ་དྲངས། །གཏི་མུག་གིས་ནི་ཡོངས་བསླུས་པས། །ཀུན་རྨོངས་ཀྱིས་ཀྱང་ཤེས་པ་མིན། །གཡོ་བས་ཡུལ་རྣམས་ཐམས་ཅད་ནི། །དྲི་ཟའི་གྲོང་ཁྱེར་འདྲ་བ་ཡིན། །སྡུག་བསྔལ་ཀུན་ཏུ་སྤེལ་བྱེད་དེ། །དམྱལ་བ་ཡི་ཡང་རྒྱུ་རྣམས་ཡིན། །འདོད་པས་རྣམ་རྨོངས་བྱིས་པ་རྣམས། །ཡུལ་རྣམས་མེ་ཡིས་སྲེག་པར་བྱེད། །སྲེག་བཞིན་དུ་ཡང་མི་གོ་བར། །དེ་ཉིད་ལ་ནི་ཡོངས་སུ་འཇུག །ཀུན་རྟོག་ལས་ནི་འདོད་ཆགས་སྐྱེ། །ཆགས་ལས་ཁོང་ཁྲོ་རབ་ཏུ་འཇུག །ཁྲོ་བས་གཟིར་བའི་སྐྱེས་བུ་ནི། །དམྱལ་བའི་རྗེས་སུ་རྒྱུག་པར་འགྱུར། །དེ་ཕྱིར་འདོད་པ་ཡོངས་སུ་སྤོངས། །མཁས་པས་ཁྲོ་བ་ཞི་བར་གྱིས། །གཏི་མུག་མྱུར་དུ་ཡོངས་སྤངས་ནས། །མྱ་ངན་འདས་པ་མངོན་དུ་འགྱུར། །དགྲ་བོ་བཞིན་དུ་ཡུལ་ཤེས་བྱ། །གྲོགས་པོ་དང་འདྲ་མྱ་ངན་འདས། །མྱང་འདས་ཡུལ་ཅན་བརྟན་པ་ནི། །མྱ་ངན་འདས་པ་རྟོགས་པར་འགྱུར། །དེ་ལྟར་རྨ་བྱ་རྣམས་ཀྱི་བདག་པོ་དེས་ལྷ་དེ་དག་རྣམས་ལ་གཙུག་ལག་གི་མདོ་དེ་དག་སྟོན་པར་བྱེད་དོ། །ཆོས་གཞན་ཡང་ལེགས་པར་བསྲུང་བར་བྱ་བ་གཅེས་པར་གྱུར་པ་ཡོད་དོ། །འདི་ཡང་གང་ཞེ་ན། འདི་ལྟ་སྟེ། སེམས་ལ་ཡིད་ཆེས་པར་མི་བྱའོ། །འདི་ན་དགེ་སྦྱོང་ངམ་བྲམ་ཟེའམ་གཞན་ཡང་དེའི་རིགས་ཅན་རྣམས་ཀྱིས་ཀྱང་ཇི་སྲིད་འཚོའི་བར་དུ་དེ་ལྟར་སེམས་ལ་ཡིད་ཆེས་པས་བགྲོད་པར་མི་བྱའོ།