།རྣམ་པ་དེ་ལྟ་བུ་རྣམས་ཀྱི་མཚན་ཉིད་ལས་སྐྱེས་པའི་ལྕེའི་རྣམ་པར་ཤེས་པ་ལ་དེ་མངོན་པར་ཞེན་པར་མི་བྱེད་དོ། །དེ་ལ་ཀུན་ཏུ་ཆགས་པར་ཡང་མི་བྱེད་དོ། །ཡང་དག་པ་ཇི་ལྟ་བ་བཞིན་དུ་ཡང་ལྕེའི་རྣམ་པར་ཤེས་པ་དེ་ཤེས་སོ། །དེ་གང་གི་ཚེ་ཡང་དག་པར་ཤེས་པ་དེའི་ཚེ་རོ་ལ་དམིགས་པའི་རྣམ་པར་ཤེས་པ་དགའ་བའི་འདོད་ཆགས་དང་ཀུན་ཏུ་ལྡན་པའི་སྲེད་པས་མི་འཆིང་ངོ་། །དེ་དེ་ལས་གྲོལ་བས་མཆོག་ཏུ་བདེ་བ་དང་ལྡན་པར་འགྱུར་རོ། །ཇི་ལྟ་ཇི་ལྟར་ཡུལ་རྣམས་ཡང་དག་པ་ཇི་ལྟ་བ་བཞིན་དུ་མངོན་པར་ཤེས་པར་གྱུར་པ་ན་ཡང་། དེ་ལྟ་དེ་ལྟར་དྲི་མའི་རྙོག་མ་རྣམས་དང་རྣམ་པར་བྲལ་བའི་མཐར་ཕྱིན་པའི་བདེ་བ་རྣམས་འཐོབ་པའོ། །དེ་ལྟར་དགའ་བའི་འདོད་ཆགས་དང་ཀུན་ཏུ་ལྡན་པའི་སྲེད་པ་རྣམས་ཀྱིས་ཀུན་ཏུ་མི་འཆིང་ངོ་། །ཡང་དག་པ་ཇི་ལྟ་བ་བཞིན་དུ་དེས་ལྕེའི་རོ་རྣམས་ཐམས་ཅད་དང་། གནས་སྐབས་ཐམས་ཅད་དུ་ཇི་ལྟ་བ་བཞིན་དུ་རྟོགས་ནས། ལུས་ཀྱི་རེག་བྱའི་ཡུལ་རྣམས་ལ་ཀུན་ཏུ་ལྟ་བར་བྱེད་དེ། དེ་ལ་ལུས་ཀྱི་རྐྱེན་དང་རེག་བྱའི་རྐྱེན་དང་དེ་སྐྱེད་པའི་ཡིད་ལ་བྱེད་པའི་རྐྱེན་ལས་ཀྱང་རེག་བྱའི་རྣམ་པར་ཤེས་པ་སྐྱེ་བར་འགྱུར་རོ། །གསུམ་པོ་རྣམས་འདུས་པ་ལས་ནི་རེག་བྱའོ། །རེག་བྱ་དང་ལྷན་ཅིག་འགྲོགས་ནས་ཚོར་བ་དང་འདུ་ཤེས་དང་སེམས་པའོ། །དེ་ཡང་དགེ་སྦྱོང་དང་བྲམ་ཟེ་འདི་དག་གིས་ཡང་དག་པ་ཇི་ལྟ་བར་རེག་བྱ་དེ་ཉིད་ལ་ཀུན་ཏུ་ལྟ་བར་བྱེད་དེ། རེག་བྱ་འདི་དག་ནི་རྟག་པ་དང་བརྟན་པ་དང་ཐེར་ཟུག་པ་མ་ཡིན་ནོ། །གང་འདི་ལ་བདག་གིས་ཚུལ་བཞིན་མ་ཡིན་པ་ཡིད་ལ་བསྐྱེད་པར་གྱུར་ན། ཚུལ་བཞིན་མ་ཡིན་པར་ཡིད་ལ་བྱེད་པ་དེས་བདག་ལ་དོན་མ་ཡིན་པ་རྣམས་འབྱུང་བར་འགྱུར་རོ། །བདེ་བར་མི་འགྱུར་ཞིང་ཕན་པར་ཡང་མི་འགྱུར་རོ། །དེ་གང་གི་ཚེ་རེག་བྱ་དེ་ཡང་ཇི་ལྟ་བ་བཞིན་དུ་ཀུན་ནས་རྟོགས་པར་འགྱུར་ཞིང་ཚུལ་བཞིན་དུ་ཡིད་ལ་བྱེད་པས་སོ་སོར་རྟོག་པར་བྱེད་པ་ན། དེའི་ཚེ་འདི་དགའ་བའི་འདོད་ཆགས་དང་ལྡན་པར་གྱུར་པའི་སྲེད་པས་གནོད་པར་མི་འགྱུར་རོ། །ཡུལ་གྱི་སྟོབས་ཀྱིས་ཀྱང་ཀུན་ཏུ་སྦྱོར་བར་མི་བྱེད་དོ། །ཐབས་རྣམས་ཐམས་ཅད་ཀྱིས་ལུས་ཀྱི་རེག་བྱ་རྣམས་ཇི་ལྟ་བ་བཞིན་དུ་ཀུན་ཏུ་བརྟགས་པར་གྱུར་ནས་ཡིད་ཀྱིས་ཀྱང་ཆོས་ལ་ཀུན་ཏུ་ལྟ་བར་བྱེད་དེ།