།གཞན་ཡང་དགེ་སྦྱོང་ངམ་བྲམ་ཟེ་དང་དེ་དག་ཉིད་དང་དེའི་རིགས་ཅན་རྣམས་ཀྱིས་ཀྱང་སྣས་དྲི་རྣམས་བསྣམས་ནས་ཇི་ལྟར་ཤེས་པར་བྱེད་པ་ཡིན་ན། འདི་ན་སྣའི་རྐྱེན་དང་དྲིའི་རྐྱེན་ལས་ཀྱང་སྣའི་རྣམ་པར་ཤེས་པ་སྐྱེ་བར་འགྱུར་ལ། དེ་སྐྱེས་པའི་ཡིད་ལ་བྱེད་པའི་རྐྱེན་གྱིས་ཀྱང་གང་གི་ཚེ་མི་དགེ་བའི་ཡིད་ལ་བྱེད་པ་སྐྱེས་པར་གྱུར་པ་དེའི་ཚེ། དགེ་སྦྱོང་ངམ་བྲམ་ཟེ་འདི་དག་གིས་རྣམ་པར་ཤེས་པ་ཡིན་ཏེ། ཇི་ལྟར་མི་དགེ་བའི་ཆོས་སྡིག་པ་ཅན་འདི་དག་སྐྱེས་པར་གྱུར་ཏོ། །དེས་ཀྱང་བདག་ལ་དོན་མ་ཡིན་པ་རྣམས་འབྱུང་བར་འགྱུར་རོ། །བདེ་བ་མ་ཡིན་པ་འདི་དག་བདག་གིས་ཡོངས་སུ་སྤང་བར་བྱའོ། །དེ་གང་གི་ཚེ་མི་དགེ་བའི་ཡིད་ལ་བྱེད་པ་དེ་དག་རྣམས་ཡོངས་སུ་སྤོང་བར་བྱེད་པ་དེའི་ཚེ། འདི་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་དོ། །དེའི་ཚེ་འདི་ལ་ཚུལ་བཞིན་ཡིད་ལ་བྱེད་པ་རྣམས་ལེགས་པར་སྐྱེ་བར་འགྱུར་རོ། །དེ་ཚུལ་དང་འཐུན་པའི་ཡིད་ལ་བྱེད་པ་དེ་དང་ཡང་དག་པར་ལྡན་པས་དགའ་བའི་འདོད་ཆགས་དང་ལྡན་པའི་སྲེད་པ་རྣམས་རབ་ཏུ་འཇོམས་པར་བྱེད་དོ། །དེ་སླར་ཡང་དྲི་དེ་ཉིད་ལ་སོ་སོར་རྟོག་པར་བྱེད་དེ། དེ་ལྟར་སོ་སོར་རྟོགས་པར་གྱུར་པ་ན་དེ་ཐམས་ཅད་དུ་དྲི་རྣམས་ཐམས་ཅད་ལ་མངོན་པར་ཆགས་པར་མི་འགྱུར་རོ། །དེ་རབ་ཏུ་བཅོམ་པ་ལས་ཀྱང་སྐྱིད་པར་འགྱུར་རོ། །དེ་ཇི་ལྟ་ཇི་ལྟར་ཡང་དག་པར་ཇི་ལྟ་བར་ཡུལ་རྣམས་མངོན་པར་ཤེས་པར་གྱུར་པ་དེ་ལྟ་དེ་ལྟར་ཤིན་ཏུ་མཐར་ཐུག་པ་མཆོག་གི་བདེ་ལེགས་རྣམས་འཐོབ་པར་འགྱུར་རོ། །དེ་ལྟར་སྣས་ཀྱང་དྲི་རྣམས་བསྣམས་ནས་ཡང་དག་པ་ཇི་ལྟ་བ་བཞིན་དུ་ལྟ་བས་དྲི་དེ་དག་རྣམས་ལ་ཀུན་ཏུ་ཆགས་པར་མི་འགྱུར་རོ། །གཞན་ཡང་དགེ་སྦྱོང་དང་བྲམ་ཟེ་དེ་དག་རྣམས་ཉིད་ཀྱི་ལྕེས་རོ་རྣམས་མྱངས་པར་བྱས་པ་ན་ཡང་། གང་དེ་ལ་མི་དགེ་བའི་འདུན་པའི་འདོད་ཆགས་སྐྱེས་པར་གྱུར་པ་དེ་དག་རྣམས་ཀྱང་འདིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཇི་ལྟར་ལྕེའི་རྐྱེན་གྱིས་དང་རོའི་རྐྱེན་གྱིས་ཀྱང་ལྕེའི་རྣམ་པར་ཤེས་པ་སྐྱེ་བར་འགྱུར་ཞིང་། དེ་སྐྱེད་པའི་ཡིད་ལ་བྱེད་པའི་རྐྱེན་ལས་ཀྱང་ལྕེའི་རྣམ་པར་ཤེས་པ་སྐྱེ་བ་ཡིན་ནོ། །རྣམ་པ་དེ་ལྟ་བུ་རྣམས་ཀྱི་མཚན་ཉིད་ལས་སྐྱེས་པའི་ལྕེའི་རྣམ་པར་ཤེས་པ་ལ་དེ་མངོན་པར་ཞེན་པར་མི་བྱེད་དོ།