།མཚན་ཉིད་འདིར་ནི་བརྗོད་པ་ཡིན། །རྟག་ཏུ་བཟང་པོ་དང་འགྲོགས་པའི། །དགེ་སློང་སྙན་གྲགས་དང་ལེགས་ལྡན། །ངན་པ་དང་ནི་འགྲོགས་པ་ནི། །སྐྱེས་བུ་ངན་པར་མྱུར་དུ་འགྲོ། །གང་དག་ངན་པ་རྣམ་སྤོང་བའི། །དེ་དག་སྙིང་པོ་རྟག་ཏུ་གྱིས། །ལེགས་རྟག་ལྷན་ཅིག་གནས་པ་དང་། །མ་རུངས་པ་ཡང་སྤང་བར་གྱིས། །དེ་ལྟར་རྨ་བྱའི་བདག་པོ་འདིས་ལྷ་དེ་དག་རྣམས་ལ་ཆོས་སྟོན་པར་བྱེད་དོ། །གྲགས་པ་མ་ཡིན་པས་འཇིགས་པར་གྱུར་པའི་དགེ་སློང་རྣམས་ཀྱང་ཡོན་ཏན་བདུན་དང་ཡང་དག་པར་ལྡན་པར་འགྱུར་བ་ལ། འདི་ལྟ་སྟེ། སྡིག་པ་ཅན་གྱི་སྐྱེ་བོ་རྣམས་ལ་མི་སྟེན་ནོ། །རྙེད་པ་དང་བཀུར་སྟི་རྣམས་ལ་མངོན་པར་དགའ་བར་མི་འགྱུར་རོ། །ཆོག་ཤེས་པ་དང་ལྡན་པ་རྣམས་ལ་སྦྱིན་པ་པོ་དང་སྦྱིན་བདག་རྣམས་རབ་ཏུ་དང་བར་འགྱུར་རོ། །རིའི་ཁྲོད་རྣམས་སུ་སྟེན་པར་འགྱུར་རོ། །དེ་དག་ནི་དགེ་ལེགས་ཀྱི་སྐལ་བ་ཅན་དུ་འགྱུར་རོ། །མང་དུ་ཀུན་བརྗོད་པར་མི་འགྱུར་རོ། །གྲོང་དུ་རྒྱུ་བར་མི་འགྱུར་ཞིང་། འཐུང་བ་དག་གི་ཁང་པར་ཡང་མི་འཇུག་གོ། །ཉོ་བ་དང་འཚོང་བར་ཡང་མི་བྱེད་དོ། །དེ་དེ་ལྟ་བུའི་ཡོན་ཏན་རྣམས་དང་ཡང་དག་པར་ལྡན་པ་ལེགས་པར་རྒྱུ་བའི་དགེ་སློང་ནི་ཆུད་འཛའ་བར་མི་འགྱུར་རོ། །སྐྱེ་བོའི་ཚོགས་མང་པོ་རྣམས་ཀྱང་གུས་པ་དང་བཅས་པར་འགྱུར་རོ། །དེའི་ཕྱིར་བག་མེད་པའི་རྒྱུའི་རྩེ་མོ་ནི་འདི་ཡིན་ཏེ། འདི་ལྟར་དགེ་སློང་གྲགས་པ་མ་ཡིན་པ་རྣམས་ཀྱིས་འཇིགས་པ་མེད་པའོ། །གང་ཡང་དགེ་སློང་གྲགས་པ་མ་ཡིན་ནས་འཇིགས་པ་མེད་པ་དེ་ཁྱིམ་པ་རྣམས་ཀྱི་དྲུང་ན་ཡང་ཤིན་ཏུ་ལྷག་པ་ཡིན་ཏེ། སྐྱོན་རྣམས་ལས་དེ་ཅི་དགའ་བར་སྤྱོད་པར་བྱེད་པ་དང་། ཅི་རུང་བར་སྨྲ་བ་དང་ངོ་ཚ་མེད་པ་དང་ཁྲེལ་མེད་པ་དང་། ཚུལ་ཁྲིམས་འཆལ་པ་མང་དུ་བྱེད་པར་འགྱུར་རོ། །དེ་ལུས་ཞིག་པར་གྱུར་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །གྲགས་པ་མ་ཡིན་པས་འཇིགས་པ་ནི་གཅིག་པུ་རྒྱུ་བར་འགྱུར་བ་དང་ཁྱིམ་རྣམས་སུ་སྟེན་པར་མི་བྱེད་དོ། །དེ་དག་ནི་རྟག་ཏུ་ཡང་རི་དང་དགོན་པར་གནས་པར་འགྱུར་ཞིང་ཆོག་ཤེས་པར་ཡང་འགྱུར་རོ།