།དེ་དག་ནི་རྟག་ཏུ་ཡང་རི་དང་དགོན་པར་གནས་པར་འགྱུར་ཞིང་ཆོག་ཤེས་པར་ཡང་འགྱུར་རོ། །འདོད་པ་དང་བརྣབ་སེམས་ལ་སྟེན་པར་མི་བྱེད་དོ། །ཡུལ་ལྗོངས་ཀྱི་སྐྱོན་རྣམས་ཐམས་ཅད་སྤོང་བར་བྱེད་དོ། །ཁ་ན་མ་ཐོ་བ་ཅུང་ཟད་ཙམ་ལ་ཡང་འཇིགས་པར་ལྟ་བར་འགྱུར་རོ། །དེ་ལྟར་འཇིག་རྟེན་ན་གྲགས་པ་མ་ཡིན་པ་རྣམས་ཀྱིས་འཇིགས་པར་གྱུར་པ་གང་ཡིན་པ་དེ་ནི་དགེ་སློང་ཡིན་ནོ། །དེ་ནི་དགེ་བའི་སྐལ་བ་ཅན་ཡིན་ནོ། །གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་དགེ་སློང་རྣམས་ལ་གཅེས་པར་གྱུར་པའི་ཆོས་ཡོད་དོ། །འདི་ཡང་གང་ཞེ་ན། འདི་ལྟ་སྟེ། མངོན་པར་ཞེན་པ་མེད་པའོ། །མངོན་པར་ཞེན་པ་མེད་པ་ཞེས་བྱ་བའི་ཆོས་ནི་མཆོག་ཏུ་དགའ་བར་གྱུར་པ་ཡིན་ནོ། །འདི་ནི་དགེ་སློང་དག་མངོན་པར་ཞེན་པ་མེད་པ་ནི་དག་པ་དང་འབའ་ཞིག་པ་དང་ཀུན་ཏུ་ཆགས་པ་མེད་པའི་བློ་དང་ལྡན་པ་དང་། གཅིག་ཏུ་ངེས་པར་རྒྱུ་བ་དང་བློ་ལེགས་པར་གནས་པར་གྱུར་པ་དང་། འཚོ་བ་དག་པ་རྣམས་མཆོག་ཏུ་མྱ་ངན་དང་བྲལ་བར་འགྱུར་བ་ཡིན་ནོ། །མཆོག་ཏུ་རྣལ་དུ་ཕེབས་པའི་ཡིད་འཛིན་པ་ཡིན་ནོ། །དེ་སྡུག་བསྔལ་བས་ཞུམ་པར་མི་འགྱུར་རོ། །ཁྲོ་བ་དང་འཁྲུག་པ་འབྱུང་བར་མི་འགྱུར་རོ། །དགའ་བ་ཡ་ཡ་བོའི་གནས་རྣམས་ལ་དགའ་བར་ཡང་མི་འགྱུར་རོ། །འཇིགས་པའི་གནས་རྣམས་ལ་ཡང་རྣམ་པར་མི་འཇིགས་སོ། །གཉེན་བཤེས་རྣམས་ལ་སྙིང་ཉེ་བར་ཆགས་པར་གྱུར་ནས་རང་གི་དོན་རྣམས་ལས་ཡོངས་སུ་ཉམས་པ་མ་ཡིན་ནོ། །གྲོང་ཁྱེར་པ་རྣམས་ཀྱིས་བགད་པ་དང་འགྱིང་བག་བྱས་པ་དང་རྩེས་པ་དང་ཡོངས་སུ་སྤྱད་པ་རྣམས་ལ་ཡང་མངོན་པར་ཞེན་པར་མི་བྱེད་དོ། །ཉེ་བར་འགྲོ་བའི་རང་བཞིན་ཅན་མ་ཡིན་ནོ། །གྲོང་ནས་གྲོང་དང་གྲོང་ཁྱེར་ནས་གྲོང་ཁྱེར་དང་། ཚོང་འདུས་ནས་ཚོང་འདུས་རྣམས་དང་། ཁྱིམ་ནས་ཁྱིམ་ཀུན་ཏུ་ཆགས་པ་མེད་པའི་བློས་གཅིག་ཏུ་བདེ་བར་ཉལ་བ་དང་རབ་ཏུ་སད་པར་ཡང་འགྱུར་རོ། །དེའི་བློས་མངོན་པར་ཆགས་པ་མེད་པ་དང་རྣམ་པར་དག་པ་ཡིན་ནོ། །ཀུན་ཏུ་སྤྱོད་པ་རྣམ་པར་དག་པ་དེ་ནི་བདུད་དམ་སྒྲ་དང་རེག་བྱ་དང་། རོ་དང་གཟུགས་དང་དྲི་དང་དེ་དག་གིས་ཀྱང་ཕྲོགས་པར་མི་འགྱུར་རོ། །རྙེད་པ་དང་བཀུར་སྟི་རྣམས་ལ་མངོན་པར་དགའ་བར་མི་འགྱུར་རོ།