འབྱུང་བ་ཆེན་པོ་བཞི་པོ་རྣམས་ནི་བློ་ཀུན་ཏུ་གནས་པར་འགྱུར་བ་ཡིན་ནོ། །སེམས་འཇམ་པོ་རྣམས་ཀྱང་དེ་ཁོ་ན་བཞིན་དུ་ཡིན་ཏེ། སེམས་ལས་སུ་རུང་བ་དང་དད་པ་དང་ལྡན་པ་དང་རབ་ཏུ་བརྩོན་པ་དང་ལྡན་པ་དང་ཕྱིན་ཅི་མ་ལོག་པར་སྟོན་པར་བྱེད་པ་དང་རྒྱུ་དང་འབྲས་བུ་ལ་དད་པ་དང་ལྡན་པ་ལ་ནི་མྱ་ངན་ལས་འདས་པ་མདུན་ཉིད་ན་གནས་སོ། །དེ་ནས་དུས་དེར་རྨ་བྱའི་རྒྱལ་པོ་དེས་གཙུག་ལག་གི་ཚིགས་སུ་བཅད་པའི་དབྱངས་ཀྱིས་བསྙད་པ། ཇི་ལྟར། གང་གི་སྙིང་ནི་བཏུལ་བྱས་པ། །ཞུ་བར་གྱུར་པའི་གསེར་བཞིན་ནོ། །དེ་ནས་ངེས་པར་ཕན་དགེ་བའི། །སྡུག་བསྔལ་ལས་ནི་མྱུར་དུ་འགྲོ། །ཀུན་ནས་ཉོན་མོངས་བཏུལ་བ་ཡིས། །གང་གི་སེམས་ནི་སྣོད་དུ་བྱས། །དེ་ལ་བདེ་ལེགས་སྐྱེ་འགྱུར་ཏེ། །ཞིང་རྣང་གི་ནི་སཱ་ལུ་བཞིན། །སེམས་ཀྱི་ཁྱིམ་གྱི་གཏེར་ལྡན་པ། །ལུས་ཅན་ཀུན་ལ་དེ་མི་བཟད། །མི་རྣམས་གཡོ་སྒྱུ་ཆེན་པོ་ཡིས། །དབུལ་བ་ཀུན་ནས་འཇོམས་པར་བྱེད། །དབང་པོ་རྣོ་ཞིང་ཞི་བ་དང་། །རྟག་ཏུ་བསམ་གཏན་གྱིས་གནས་ཤིང་། །ཡུལ་རྣམས་ལ་ཡང་བག་དང་ལྡན། །སྡུག་བསྔལ་དག་གིས་གནོད་པའང་མེད། །དེ་ལྟར་རྨ་བྱའི་མངའ་བདག་དེས་ཚིགས་སུ་བཅད་པ་བརྗོད་པ་ལ་འཐབ་བྲལ་བའི་ལྷ་དང་དགའ་ལྡན་པའི་ལྷ་དེ་དག་རྣམས་ཀྱང་ངོམས་པ་མེད་པས། སླར་ཡང་ཆོས་འདུལ་བ་དེ་ཉིད་ཉན་པར་འདོད་པས་ཐལ་མོ་ཁ་སྦྱར་ཏེ། དམ་པའི་ཆོས་ལ་གུས་པར་འགྱུར་ཞིང་། སླར་ཡང་ཆོས་ཉན་པར་འདོད་པས་རབ་ཏུ་སྨྲས་པ། འཕགས་པས་བཤད་དུ་གསོལ། རྨ་བྱའི་མངའ་བདག་གིས་བསྟན་དུ་གསོལ། སེམས་དཔའ་ཆེན་པོ་བདག་ཅག་རྣམས་སླར་ཉིད་ཀྱང་གཉིས་ཀྱིས་ལྷག་པའི་ཆོས་ཀྱི་རྣམ་གྲངས་ཉི་ཤུ་པ་འདི་དག་གང་ཐོས་པར་གྱུར་ནས་བདག་ཅག་རྣམས་མཆོག་ཏུ་བདེ་ལེགས་རྣམས་ཐོབ་པར་འགྱུར་བ་ལགས་སོ། །དེ་ནས་རྨ་བྱའི་མངའ་བདག་རྣམ་པར་བཀྲ་བ་དེ་ཉིད་སླར་ཉིད་ཀྱང་ལྷ་དེ་དག་རྣམས་ཉིད་ལ་ཆོས་ཀྱི་རྣམ་གྲངས་གཉིས་ཀྱིས་ལྷག་པའི་ཉི་ཤུ་པ་དེ་ཉིད་འཆད་པར་བྱེད་དོ། །འདི་ལྟ་སྟེ་ཆོས་གཞན་འདི་ཡང་ཐེག་པ་ཆེན་པོ་ལ་ལེགས་པར་རབ་ཏུ་གནས་པའི་དགེ་སྦྱོང་ངམ་བྲམ་ཟེའམ་དེ་དག་དང་འདྲ་བ་རྣམས་ཀྱིས་ཀྱང་ཡིད་ལ་བྱའོ།