།འདི་ལྟ་སྟེ་ཆོས་གཞན་འདི་ཡང་ཐེག་པ་ཆེན་པོ་ལ་ལེགས་པར་རབ་ཏུ་གནས་པའི་དགེ་སྦྱོང་ངམ་བྲམ་ཟེའམ་དེ་དག་དང་འདྲ་བ་རྣམས་ཀྱིས་ཀྱང་ཡིད་ལ་བྱའོ། །འདི་ཡང་གང་ཞེ་ན། འདི་ལྟ་སྟེ་རབ་ཏུ་རྟེན་པའོ། །རབ་ཏུ་རྟེན་པ་ཞེས་བྱ་བའི་ཆོས་ནི་ཐམས་ཅད་ནས་ཐམས་ཅད་ལ་མཛེས་སོ། །དེ་དང་ཡང་དག་པར་ལྡན་པའི་དགེ་སྦྱོང་ངམ་བྲམ་ཟེའམ་དེ་དག་དང་རང་བཞིན་མཚུངས་པར་གྱུར་པ་གཞན་རྣམས་ཐམས་ཅད་དང་། ཁྱིམ་པའམ་རབ་ཏུ་བྱུང་བའམ་གཞན་དག་ཀྱང་བྱིས་པའམ་རྒན་པོ་ཡང་རུང་སྟེ། དེ་དག་དང་ཡང་དག་པར་ལྡན་པར་གྱུར་ཅིང་། དེས་རབ་ཏུ་གཡོགས་པ་རྣམས་ནི་མཛེས་པ་ཡིན་ནོ། །དེ་དང་མི་ལྡན་པའི་སྐྱེས་བུ་རྣམས་ནི་ཅེ་སྤྱང་དང་ཁྭ་ཏ་དང་མཚུངས་པ་རྣམ་པར་གྱུར་པ་འདྲ་བ་མ་ཡིན་པ་རྣམས་ཡིན་ནོ། །རེ་ཞིག་རབ་ཏུ་རྟེན་པ་འདི་ཡང་རབ་ཏུ་བྱུང་བས་ཇི་ལྟར་བྱ་ཞེ་ན། རེ་ཞིག་དང་པོ་ཁོ་ནར་རབ་ཏུ་བྱུང་བ་རྣམས་ཀྱིས་རབ་ཏུ་བརྟེན་པར་བྱའོ། །དེ་ནི་རྣམ་པ་བདུན་ཏེ། རྣམ་པ་བདུན་པོ་འདི་དག་ཀྱང་གང་ཞེ་ན། འདི་ལྟ་སྟེ་ཡུལ་གྱི་རྗེས་སུ་འཐུན་པར་གྱུར་པའི་ཕྱག་དར་ཁྲོད་ཡུལ་གང་དང་གང་ན་ཇི་ལྟ་བུའི་གོས་དང་ཁྱིམ་པ་རྣམས་གྱོན་པར་བྱེད་པ་དེ་ཆེད་དུ་བོར་བར་གྱུར་པ་དང་། དུར་ཁྲོད་ན་གནས་པ་དེ་དག་ཀྱང་རབ་ཏུ་བྱུང་བས་བླང་བར་བྱའོ། །དེའི་ཕྱིར་གང་ཡང་དྲི་མ་ཅན་དང་ཧྲུལ་པོ་དང་སྦོམ་པ་དེ་དག་བླང་བར་བྱའོ། །འདི་ནི་ཆོས་གོས་ཀྱི་རབ་ཀྱི་རྟེན་ཡིན་ནོ། །གཞན་ཡང་ལྟ་བ་ལ་རབ་ཏུ་རྟེན་པ་ནི་མིག་རབ་ཏུ་ལྟ་བར་བྱེད་པ་རྣམ་པ་ཇི་ལྟ་བུ་ཡིན་ན། འདི་ན་གང་དགེ་སློང་དག་གཉའ་ཤིང་གང་ཙམ་དུ་ལམ་དུ་ལྟ་བར་བྱེད་པ་དང་། སྦྱིན་པ་པོ་དང་སྦྱིན་བདག་རྣམས་ཀྱི་ཁྱིམ་དུ་རྗེས་སུ་ཞུགས་པ་ན་ཡང་ས་ལ་ལྟ་བར་བྱེད་དོ། །དེ་ཡང་ན་སངས་རྒྱས་ཀྱི་སྐུ་གཟུགས་ལ་གཅིག་ཏུ་དྲན་པ་ཉེ་བར་གནས་པར་བྱེད་དོ། །དབང་པོ་གཅིག་ཏུ་བསྡམས་པ་དང་། ལུས་ཐམས་ཅད་ཤིན་དུ་ལེགས་པར་བསྡམས་པ་དང་། དབུགས་དབྱུང་བ་དང་རྔུབ་པ་བགྲང་བར་གྱུར་པས་ལུས་ཀྱི་དབང་དུ་བྱས་ནས་ཀྱང་དྲན་པ་དང་ལྡན་པས་རྒྱུ་བར་བྱེད་ཀྱི། སྦྱིན་བདག་གི་ཁྱིམ་དུ་རྣམ་པ་ཐམས་ཅད་དུ་ཡང་ཉེ་བར་མཁོ་བའི་སྣོད་སྤྱད་རྣམས་ཡོངས་སུ་སྤྱད་ནས་ལྟ་བར་མི་བྱེད་དོ།