།རྟག་ཏུ་འདོད་པ་རྗེས་སུ་ཚོལ། །བུ་དང་ཆུང་མ་ལ་རབ་ཆགས། །ལུས་ཅན་རྣམས་ལ་མཐར་བྱེད་འབྱུང་། །ཀུན་ནས་ཉོན་མོངས་རྟག་ཏུ་འཐུག །སྐྱོན་ནི་དེ་དང་དེ་ཡིས་གང་། །ངན་སོང་ལ་ནི་སེམས་འབབ་ཅིང་། །ལུས་ཅན་རྣམས་ནི་སེམས་ཀྱིས་བཅིངས། །གདུལ་བར་དཀའ་དང་དབྱུག་པ་གསུམ། །རྟག་ཏུ་ཡང་ནི་གླགས་གཅོད་པ། །དེ་ཡང་མི་རྣམས་དགྲར་གྱུར་པའི། །སེམས་ཀྱི་དབང་དུ་མ་འགྲོ་དང་། །དགྲ་བོ་ཤིན་ཏུ་མིག་རྣོ་དེས། །རྣམ་པ་དུ་མར་སྒོམ་པར་བྱེད། །རྨུ་རྒོད་རྟ་ནི་ཇི་ལྟ་བར། །སེམས་དེ་ཆོས་ཀྱིས་ཡང་དག་བྱོས། །དེ་ལྟར་མཆོག་ཏུ་ཟབ་པར་གྱུར་པའི་ཞིང་གི་ཡོན་ཏན་རྣམས་རབ་ཏུ་བསྔགས་ཏེ། ཤེས་པས་ལྷ་དེ་དག་རྣམས་ལ་ཕན་པར་འདོད་པའི་བྱང་ཆུབ་སེམས་དཔའ་དེ་སྨོན་ལམ་གྱི་དབང་གིས་དེར་སྐྱེས་ནས་གཞན་ལ་ཕན་པ་ལ་རབ་ཏུ་ཞུགས་པས། རྣམ་པ་དུ་མར་ཆོས་བསྟན་པར་གྱུར་ཅིང་ཆོས་ཀྱི་ཡོན་ཏན་རྣམས་ཀྱང་རབ་ཏུ་བསྒྲགས་པར་གྱུར་ཏོ། །ཆོས་འདུལ་བ་དེ་དག་ཐོས་པར་གྱུར་ནས་ཀྱང་ལྷ་དེ་དག་ཡིད་ཆེས་པར་རབ་ཏུ་དང་བ་དང་ཐམས་ཅད་ཀྱང་ཡིད་རྩེ་གཅིག་ཏུ་གྱུར་པས་ཉན་པར་བྱེད་པ་དང་གཏམ་རྗོད་པར་ཡང་བྱེད་དེ། ཇི་ལྟར་འགལ་བ་མེད་པར་ཆོས་འདི་དག་སྟོན་པར་བྱེད་དོ། །གང་བྱའི་རྒྱལ་པོ་འདིས་བདག་ཅག་དགའ་ལྡན་པ་རྣམས་ལ་སྟོན་པ་དེ་ནི། དགའ་ལྡན་གྱི་མངའ་བདག་ཉེ་བར་ཞི་བའི་ཆོས་དེ་དང་འདི་ལ་ཡང་འགལ་བར་ཅུང་ཟད་ཀྱང་མེད་ཅིང་ཐ་དད་དུ་བྱ་བ་ཡང་ཅུང་ཟད་ཀྱང་མེད་དོ། །སོ་སོ་དང་ཁྱད་པར་དུ་བྱ་བ་ཡང་ཅུང་ཟད་ཀྱང་མེད་དོ། །ཆོས་འདུལ་བ་འདི་ཐམས་ཅད་ནས་ཡོངས་སུ་བརྟགས་པར་གྱུར་པ་ནི། ཐོག་མ་དང་བར་དང་ཐ་མར་དགེ་བ་དང་མཆོག་ཏུ་རབ་ཏུ་དང་བ་དང་མཆོག་ཏུ་དགེ་ལེགས་སུ་གྱུར་པ་དང་། མཆོག་ཏུ་བདེ་ལེགས་ཀུན་ཏུ་འཐོབ་པ་དང་ལྷ་དང་མི་རྣམས་ཐམས་ཅད་ལ་ཕན་པར་བྱེད་པ་དང་ཤིས་པར་བྱེད་པ་ཡིན་ནོ། །དེ་ནས་ལྷ་དེ་དག་གིས་དེ་སྐད་ཅེས་བརྗོད་ནས་སླར་ཉིད་ཀྱང་ཇི་ལྟར་བདག་ཅག་རྣམས་ཐམས་ཅད་ལ་ཕན་པ་དང་བདེ་བ་དང་མྱ་ངན་ལས་འདས་པའི་མཐར་ཐུག་པར་འགྱུར་བར་ཉི་ཤུ་རྩ་གཉིས་པར་གྱུར་པའི་ཆོས་ཀྱི་རྣམ་གྲངས་འདི་རྨ་བྱའི་མངའ་བདག་གིས་བཤད་དུ་གསོལ།