།སྟོབས་དང་སྐྱེས་བུ་བརྩོན་འགྲུས་ཅན། །དགོས་པ་གང་དག་བརྩམ་གྱུར་པ། །དེ་དག་དེ་ནི་རབ་འགྲུབ་ཅིང་། །རྣམ་བྱང་བར་ཡང་འགྱུར་བ་ཡིན། །འཇིག་རྟེན་འདས་པའི་དོན་འགའ་ཞིག །ལྷ་ཡི་འཇིག་རྟེན་ལས་འདོད་པ། །དེ་ནི་བརྩོན་འགྲུས་ཀྱིས་རབ་འགྲུབ། །བརྩོན་འགྲུས་བྲལ་བས་ནམ་ཡང་མིན། །སྙིང་ལས་ཆུང་ཞིང་བརྩོན་འགྲུས་བྲལ། །ཆོས་ཀྱང་ཡོངས་སུ་སྤངས་པ་ཡི། །མི་ལ་དཔལ་ནི་རྒྱས་མིན་ཏེ། །ཞིམ་པོར་ཟ་ཞིང་ཟས་ཀྱི་བཞིན། །འཕགས་པའི་ལམ་ནི་ཡན་ལག་བརྒྱད། །ཤེས་པ་ལེགས་པར་ཡོངས་སུ་བསྐྱངས། །བརྩོན་འགྲུས་ལྡན་པ་སྤྲོ་བ་ཆེ། །འགྲོ་བའི་མཆོག་ཏུ་འགྲོ་བར་འགྱུར། །བརྩོན་འགྲུས་ཀྱིས་ཀྱང་བྱང་ཆུབ་འཐོབ། །བརྩོན་པས་དེ་བཞིན་མཐོ་རིས་དང་། །སངས་རྒྱས་ཉིད་ཀྱང་བརྩོན་ལྡན་པས། །བརྩོན་འགྲུས་དང་མཚུངས་འགྲོ་བ་མེད། །དེ་ཕྱིར་ཡོན་ཏན་དེ་རྟོགས་ལ། །བརྩོན་འགྲུས་ལྡན་པས་དབང་པོ་ཁྲིད། །བརྩོན་འགྲུས་བརྩམས་པའི་བློ་གྱིས་དང་། །བརྩོན་འགྲུས་མཚུངས་པའི་ནོར་ཡོད་མིན། །དེ་ལྟར་རྣམ་པར་བཀྲ་བ་ཞེས་བྱ་བའི་རྨ་བྱའི་རྒྱལ་པོ་དེས་དགའ་ལྡན་པའི་ལྷ་དེ་དག་རྣམས་དང་འཐབ་བྲལ་གྱི་ལྷ་དེ་དག་རྣམས་ལ་སྐྱེ་བ་གཞན་རྗེས་སུ་དྲན་པར་གྱུར་པས་གཙུག་ལག་གི་ཆོས་རྣམས་སྟོན་པར་བྱེད་དོ། །ལྷ་དེ་དག་ཉིད་ཐམས་ཅད་ཀྱང་གཙུག་ལག་གི་ཆོས་དེ་དག་རྣམས་ཐོས་པར་གྱུར་པ་དང་། བག་མེད་པ་རྣམས་དང་བྲལ་བ་དང་རྣ་བ་ཀུན་ནས་ལྷགས་ཤིང་ཡིད་ཀྱང་རྩེ་གཅིག་ཏུ་གྱུར་པས་རྣལ་དུ་ཕེབས་པའི་ལྷ་དེ་དག་རྣམས་ཀྱི་ཡིད་རྣམས་རྟོགས་ནས། །རྨ་བྱའི་མངའ་བདག་དེ་གཞན་ཡང་ཤིན་ཏུ་ལེགས་པར་བརྩམས་པའི་བློ་དང་ལྡན་པས་ཤིན་ཏུ་རབ་ཏུ་རངས་པར་གྱུར་པས་ཆོས་གཞན་སྟོན་པར་བྱེད་པ་ནི། ཐབས་སུ་གྱུར་པ་དང་ལེགས་པ་དང་ཤིས་པ་དང་མྱ་ངན་ལས་འདས་པར་འགྲོ་བར་འགྱུར་བ་རྣམས་ལྷ་དེ་དག་རྣམས་ལ་ཕན་པའི་དོན་དང་བདེ་བའི་དོན་དུ་སྟེ། གཞན་ལ་ཕན་པ་ལ་རབ་ཏུ་ཞུགས་པའི་བྱང་ཆུབ་སེམས་དཔའ་གཞན་ཡང་ཆོས་ཆེན་པོ་གཞན་ལྔ་པ་ལྷ་དང་མི་རྣམས་ཀྱི་དོན་དང་ཕན་པ་དང་བདེ་བར་འགྱུར་བའོ།