འདི་ལྟར་སྲོག་གཅོད་པར་བྱེད་པ་མིག་གི་ཚེར་མར་གྱུར་པ་རྟག་ཏུ་མི་འཐུན་པའི་དགྲ་རྣམས་དང་ལྷན་ཅིག་ཀུན་ཏུ་ཕྲད་པ་འདི་ནི་མི་སྡུག་པ་དང་ཀུན་ཏུ་ཕྲད་པ་གཅིག་ཡིན་ནོ། །གཞན་ཡང་མི་སྡུག་པ་དང་ཀུན་ཏུ་ཕྲད་པར་གྱུར་པ་ལ་འདི་ལྟ་སྟེ། སྡིག་པའི་གྲོགས་པོ་དང་ལས་ལྷན་ཅིག་སྤྱོད་པར་བྱེད་པའོ། །ངེས་པར་འདིར་མི་སྡུག་པ་དང་ཕྲད་པ་གསུམ་པ་འདི་ལྟ་སྟེ་འགྲས་པར་གྱུར་པ་ནང་དུ་སྦས་ནས་དུས་གཞན་དུ་ཀུན་ནས་འཇོམས་པར་བྱེད་པའོ། །འདི་དག་རྣམས་ནི་ངེས་པར་མི་སྡུག་པ་དང་ཕྲད་པ་གཞན་རྣམ་པ་གསུམ་ཞེས་བརྗོད་དོ། །ཀྱེའི་ལྷ་དག་དེ་དག་རྣམས་ནི་མིའི་འཇིག་རྟེན་པའི་མི་རྣམས་ཀྱི་སྡུག་བསྔལ་ཆེན་པོ་རྣམ་པ་དུ་མ་གཞན་རྣམས་ཡིན་ནོ། །གཞན་ཡང་མུ་སུ་ལུན་དྷ་དེས་སྡུག་བསྔལ་ལས་ལྷ་དེ་དག་རྣམས་ཀྱི་ཡིད་སྐྱོ་བ་བསྐྱེད་པར་བྱ་བའི་དོན་དུ་སྟོན་པར་བྱེད་པ་ལས། འདི་ལྟ་སྟེ་སྡུག་པ་དང་བྲལ་བའོ། །སྡུག་པ་ཞེས་བྱ་བའི་མིང་ཡང་གང་དག་གིས་འཇིག་རྟེན་གཉིས་སུ་ཕན་པར་བྱེད་པ་ཡིན་ནོ། །རྟག་ཏུ་ཕན་པར་འདོད་པའི་དགེ་བའི་གྲོགས་པོ་དེ་དང་ལྷན་ཅིག་ཏུ་བྲལ་བར་གྱུར་པའོ། །དེ་ལ་འདི་ནི་སྡུག་བསྔལ་ཆེན་པོ་ཡིན་ནོ། །ཡང་དེ་མ་དང་ཕ་དང་སྤུན་དང་སྲིང་མོ་དང་བུ་དང་བུ་མོ་དང་འབྲེལ་པ་རྣམས་དང་གཞན་ཡང་སྲེད་པའི་གནས་སུ་གྱུར་པ་རྣམས་ཀྱེ་མ་གནོད་པར་བྱེད་པ་ཚ་བ་རྩུབ་པ། མཚོན་ཆ་དང་མེར་ལྷུང་བ་ལས་ལྷག་པར་སེམས་སྲེག་པ་སྐྱེ་བར་འགྱུར་རོ། །འདི་དག་ནི་སྡུག་པ་རྣམས་དང་བྲལ་བ་ལས་གྱུར་པའི་སྡུག་བསྔལ་ཞེས་བརྗོད་དོ། །གཞན་ཡང་འཐབ་བྲལ་བའི་མངའ་བདག་དེས་ལྷ་དེ་དག་རྣམས་ལ་ཕན་པར་བྱ་བའི་དོན་དུ་ཆོས་སྟོན་པར་བྱེད་པ་ནི། འདི་ལྟ་སྟེ་གྲང་བ་དང་ཚ་བ་གཉིས་པོ་དག་གིས་སྡུག་བསྔལ་ལོ། །གཞན་ཡང་འཐབ་བྲལ་གྱི་བདག་པོ་དེས་ལྷ་དེ་དག་རྣམས་ཉིད་ལ་མངོན་པར་བརྗོད་པ། ལྷ་དག་མི་རྣམས་ཀྱི་མིའི་འཇིག་རྟེན་འདི་ན་སྡུག་བསྔལ་དེ་དག་རྣམས་གང་དག་ཅེ་ན། འདི་ལྟ་སྟེ་གྲང་བ་དང་ཚ་བ་ལ་སོགས་པ་གཉིས་དག་གིས་སྡུག་བསྔལ་ལོ། །དེ་ལ་ཤིན་ཏུ་སྟེན་པས་ཀྱང་སྟེ། ལྷ་དག་གྲང་བ་ཧ་ཅང་སྟེན་པར་བྱེད་པའི་མི་རྣམས་ནི་མིའི་འཇིག་རྟེན་དུ་སྡུག་བསྔལ་དེ་ལ་ཡང་ལོངས་སྤྱད་ནས་གང་ཡང་ཚ་བ་རྣམས་ལ་སྟེན་པར་བྱེད་པས། མིའི་འཇིག་རྟེན་པ་རྣམས་དེ་ལས་ཀྱང་སྡུག་བསྔལ་བར་འགྱུར་རོ།