མིའི་འཇིག་རྟེན་པ་རྣམས་དེ་ལས་ཀྱང་སྡུག་བསྔལ་བར་འགྱུར་རོ། །དེ་བཞིན་དུ་ཁ་ཟས་ཧ་ཅང་བསྟེན་པས་ཀྱང་སྡུག་བསྔལ་བར་འགྱུར་རོ། །དུས་ཡུན་རིང་དུ་འདུག་པ་བསྟེན་པས་ཀྱང་སྡུག་བསྔལ་ལོ། །དུས་རིང་དུ་ལངས་པ་དང་འགྲོ་བ་ཡང་སྡུག་བསྔལ་ཉིད་དོ། །དེ་བཞིན་དུ་བཏུང་བ་ཤིན་ཏུ་བསྟེན་པའི་སྡུག་བསྔལ་དང་། རྨི་ལམ་གྱི་སྡུག་བསྔལ་ཉིད་དང་མཚན་མོ་མལ་སྟན་ལ་གཞོགས་ངོས་གཅིག་གིས་སྟན་ལ་ཉལ་བས་ཀྱང་ཤིན་ཏུ་སྡུག་བསྔལ་བར་འགྱུར་རོ། །དེ་བཞིན་དུ་གཞོགས་གཉིས་པས་ཀྱང་ཤིན་ཏུ་དུས་རིང་དུ་ཉལ་བར་གྱུར་ན་ཤིན་ཏུ་སྡུག་བསྔལ་བ་སྐྱེ་བར་འགྱུར་རོ། །གཉིས་གཉིས་ལས་སྐྱེས་པའི་བདེ་བ་ལྟར་སྣང་བ་རྣམས་ཀྱིས་མི་རྣམས་མིའི་འཇིག་རྟེན་དུ་བསླུས་པའི་ཕྱིར་ན་སེམས་ཅན་རྣམས་ལེགས་པར་བྱ་བའི་ལས་རྣམས་ནི་མི་བྱེད་དོ། །བདེ་བས་ཤིན་ཏུ་རྣམ་པར་བཅོམ་པ་དེས་དམྱལ་བར་རྒྱུག་པར་འགྱུར་རོ། །ལྷ་དག་མི་རྣམས་ཀྱི་མིའི་འཇིག་རྟེན་ན་ཤིན་ཏུ་སྡུག་བསྔལ་བ་དེ་ཡང་བདེ་བའི་གཟུགས་བརྙན་གྱི་སྡུག་བསྔལ་བ་རྣམས་ཡིན་ནོ། །ལྷ་རྣམས་དེ་བཞིན་དུ་མ་གྱུར་ཅིག་ཅེས་ཕན་པར་བྱ་བའི་དོན་དུ་དེ་ལྟར་མུ་སུ་ལུན་དྷ་དེས་འཐབ་བྲལ་གྱི་ལྷ་རྣམས་ལ་ཆོས་སྟོན་པར་བྱེད་དེ་མིའི་འཇིག་རྟེན་དེ་ལ་སྐྱེས་པ་རྣམས་ཀྱི་བདེ་བ་ཇི་ལྟ་བ་བཞིན་དུ་བདག་ཅག་རྣམས་ཀྱི་བདེ་བ་ཡང་འགྱུར་བ་དེ་དགག་པར་བྱ་བའི་དོན་དང་། དེ་དག་ལ་སྐྱོ་བ་བསྐྱེད་པར་བྱ་བའི་དོན་དུ་འཁོར་བ་ལས་ཁ་ཕྱིར་ཕྱོགས་པར་འགྱུར་བའི་ཆོས་སྟོན་པར་བྱེད་དོ། །འཐབ་བྲལ་གྱི་བདག་པོ་དེ་འཁོར་བ་ལས་ཁ་ཕྱིར་ཕྱོགས་པས་ཕན་པར་བྱ་བའི་དོན་དུ་བག་མེད་པས་བག་མེད་པ་རྣམས་འདུལ་བར་བྱ་བའི་ཕྱིར་རོ། །གཞན་ཡང་འཐབ་བྲལ་གྱི་བདག་པོ་དེ་ལྷ་དེ་དག་རྣམས་ཉིད་ལ་མི་རྣམས་ཀྱི་སྡུག་བསྔལ་གཞན་དག་སྟོན་པར་བྱེད་དོ། །ཇི་ལྟར་མི་རྣམས་ཀྱི་མིའི་འཇིག་རྟེན་དུ་ནད་རྣམས་འབྱུང་བར་འགྱུར་བ་དེ་ལ། རྣམ་པ་དུ་མ་དང་རྣམ་པར་རྟོག་པ་མང་པོ་དང་ཀུན་ནས་སློང་བ་དུ་མ་རྣམས་ཀྱིས་རིམས་ནད་དང་ཤིན་ཏུ་འཁྲུ་བ་དང་དབུགས་མི་བདེ་བ་དང་གློ་ལུ་བ་ལ་སོགས་པའི་ནད་རྣམས་ཏེ། ནད་བཞི་བརྒྱ་རྩ་བཞིར་འགྱུར་བ་ཡིན་ནོ། །གཉིས་གཉིས་ཀྱི་སྡུག་བསྔལ་གང་དག་གིས་མངོན་པར་བཅོམ་པར་གྱུར་པའི་སེམས་ཅན་རྣམས་ནི་ཕྱི་ནས་ཡང་ནད་ཀྱིས་ཉེ་བར་འཇོམས་པར་འགྱུར་རོ།