ཡིད་དེ་ལ་སོང་བ་དང་རང་གི་འདུན་པའི་འདོད་ཆགས་སྔོན་དུ་འགྲོ་བས་ཟས་ཀྱི་དོན་དུ་གནས་ན་གནས་རྣམས་སུ་ཉེ་བར་འགྲོ་བར་བྱེད་དོ། །རྒྱུ་དེ་ལས་ལེ་ལོ་ཅན་དེ་ལུས་ཞིག་པ་ན་ངན་སོང་ལོག་པར་ལྟུང་བ་དམྱལ་བར་སྐྱེ་བར་འགྱུར་རོ། །ཀྱེ་ཡེའི་ལྷ་དག་དེ་ལ་འདི་ནི་མིའི་འཇིག་རྟེན་དུ་མི་རྣམས་ལ་ལྕེ་རོ་དང་ཀུན་དུ་འབྲེལ་པའི་མི་སྡུག་པ་དང་ཕྲད་པ་ལས་བྱུང་བའི་སྡུག་བསྔལ་ཡིན་ནོ། །གཞན་ཡང་ཀྱེ་ལྷ་དག་མི་རྣམས་ཕན་པ་འདོད་པས་བྱས་པའི་མིའི་འཇིག་རྟེན་དུ་མི་སྡུག་པ་དང་ཕྲད་པ་ལས་བྱུང་བའི་སྡུག་བསྔལ་གང་ཞེ་ན། དེ་འདི་ལྟ་སྟེ་ལུས་ཀྱིས་རེག་བྱ་ལ་རེག་པར་བྱེད་དེ། དེ་དང་རབ་ཏུ་འབྲེལ་བའི་བློར་གྱུར་པ་དགེ་བ་རྣམས་སེམས་པར་མི་བྱེད་དོ། །ཆོས་ཀྱིས་ལམ་དུ་ངེས་པར་འཇུག་པར་མི་བྱེད་དོ། །བློ་མཉམ་པར་བཞག་པར་མི་འགྱུར་རོ། །འདི་ནི་སྐྱེས་བུ་ངན་པ་ཡུལ་ངན་པ་དང་རབ་ཏུ་འབྲེལ་བའི་བློ་དང་ལྡན་པ་ཞེས་བརྗོད་དེ། ལུས་ཞིག་པར་གྱུར་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །ཀྱེ་ལྷ་དག་འདི་ནི་མི་རྣམས་ལ་མིའི་འཇིག་རྟེན་དུ་མི་སྡུག་པ་དང་ཀུན་ནས་ཕྲད་པའི་སྡུག་བསྔལ་ཞེས་བརྗོད་དོ། །ཀྱེ་ཡེའི་ལྷ་དག་གཞན་ཡང་མི་རྣམས་ལ་མིའི་འཇིག་རྟེན་དུ་མི་སྡུག་པ་དང་ཀུན་ནས་ཕྲད་པ་ལས་སྐྱེས་པའི་སྡུག་བསྔལ་རྣམས་གང་ཞེ་ན། འདི་ལྟ་སྟེ་གང་འགའ་ཞིག་བློ་གཡོ་བ་དང་བློ་རྣམ་པར་གནས་པ་མེད་པ་དང་གཅིག་ཏུ་མ་ངེས་པའི་བློ་དང་བློ་རྣམ་པར་གཡེངས་པར་གྱུར་པས་རྟག་ཏུ་ཡང་ཆོས་ངན་པ་ཡིད་ཀྱིས་སེམས་པར་བྱེད་པ་ཡིན་ནོ། །གལ་ཏེ་ཆོས་ལ་དགའ་བ་དང་དགེ་བ་སྟེན་པར་བྱེད་པ་དང་བདག་ལ་ཕན་པར་བྱེད་པ་མ་ཡིན་པ་དེ་དག་ནི། གང་དག་གི་རྒྱུས་ལུས་ཞིག་པར་གྱུར་ནས་ངན་སོང་ལོག་པར་ལྟུང་བ་དམྱལ་བར་སྐྱེ་བར་འགྱུར་རོ། །ཀྭའི་ལྷ་དག་འདི་ནི་མི་རྣམས་ཀྱི་མིའི་འཇིག་རྟེན་ན་མི་སྡུག་པ་དང་ཀུན་ཏུ་ཕྲད་པ་ལས་སྐྱེས་པའི་སྡུག་བསྔལ་ཞེས་བརྗོད་དོ། །རིགས་དུ་མ་དང་ཚུལ་ལུགས་དུ་མར་རྣམ་པ་སྣ་ཚོགས་པའི་སྡུག་བསྔལ་གཞན་དང་གཞན་རྣམས་ཀྱང་ཉམས་སུ་མྱོང་བར་འགྱུར་རོ། །དེ་ལ་རྣམ་པ་གསུམ་པོ་འདི་ནི་ངེས་པར་མི་སྡུག་པ་དང་ཕྲད་པ་ཡིན་ཏེ། འདི་ལྟར་སྲོག་གཅོད་པར་བྱེད་པ་མིག་གི་ཚེར་མར་གྱུར་པ་རྟག་ཏུ་མི་འཐུན་པའི་དགྲ་རྣམས་དང་ལྷན་ཅིག་ཀུན་ཏུ་ཕྲད་པ་འདི་ནི་མི་སྡུག་པ་དང་ཀུན་ཏུ་ཕྲད་པ་གཅིག་ཡིན་ནོ།