དགེ་ལེགས་སུ་གྱུར་པའི་སྐྱེས་བུ་གཞན་དག་གང་ཡང་རུང་བ་རྣམས་ཀྱིས་ཆོས་ལ་མཆོད་པར་བྱ་བའི་རྒྱུ་མཚན་དུའམ་དགེ་འདུན་ལ་ཡང་རུང་སྟེ། བདུག་སྤོས་ཕུལ་བར་གྱུར་པ་ལས་བློ་གྲོས་དམན་པར་གྱུར་པ་དང་ཡིད་མོང་རྟུལ་བར་གྱུར་པ་གང་དག་གིས་ཇི་ལྟར་འགྲོ་བར་གྱུར་པ་ནའམ་འདུག་པར་གྱུར་པ་ན་ཡང་རུང་སྟེ། འདུན་པའི་འདོད་ཆགས་སྔོན་དུ་འགྲོ་བས་དང་། མངོན་པར་གཙེ་བ་སྔོན་དུ་འགྲོ་བས་དང་། གུས་པ་མེད་པ་སྔོན་དུ་བཏང་བས་དང་། ཐུལ་འོག་ཏུ་འཇུག་པ་སྔོན་དུ་བཏང་བས་ཀྱང་རུང་སྟེ། ཀུན་ནས་ཆགས་པ་སྣ་ཕྱོགས་སུ་བཏང་བས་དེ་ཡང་སྣོམ་པར་བྱེད་དོ། །དེའི་རྒྱུ་ལས་ལུས་ཞིག་པར་གྱུར་ནས་ངན་སོང་ལོག་པར་ལྟུང་བར་དམྱལ་བར་སྐྱེའོ། །སྐྱེས་བུ་ངན་པ་རྣམས་སྣའི་རྒྱུ་དང་སྣ་དང་ཀུན་དུ་འབྲེལ་པ་ལས་མི་དགེ་བའི་བློ་དང་ལྡན་པ་རྣམས་ནི་ལུས་ཞིག་པར་གྱུར་པ་དང་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །ཀྱེ་ལྷ་དག་འདི་ནི་མི་རྣམས་ཀྱི་མིའི་འཇིག་རྟེན་ན་མི་སྡུག་པ་རྣམས་དང་ཕྲད་པ་ལས་ཀུན་དུ་སྐྱེས་པའི་སྡུག་བསྔལ་ཞེས་བརྗོད་དོ། །གཞན་ཡང་མི་སྡུག་པ་དང་ཕྲད་པ་ལས་སྐྱེས་པའི་ཤིན་ཏུ་སྡུག་བསྔལ་བ་རྣམས་ཡོད་དོ། །དེ་ཡང་གང་ཞེ་ན། འདི་ལྟ་སྟེ་མི་རྣམས་ཀྱི་མིའི་འཇིག་རྟེན་ན་བློ་གྲོས་ངན་པ་དང་ལྡན་པའི་སྐྱེས་བུ་ངན་པ་རྣམས་རོའི་དོན་དུ་ཉེས་པ་བྱེད་པའི་ལས་རྣམས་བྱེད་པ་རྣམས་ཡིན་ལ། གང་དག་གི་རྒྱུས་ལུས་ཞིག་པ་ན་ངན་སོང་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །གང་ཡང་དགེ་སྦྱོང་མ་ཡིན་པར་དགེ་སྦྱོང་གི་ཆ་བྱད་འཛིན་པ་ནང་རུལ་པར་གྱུར་པ་ཐོས་པ་དང་མི་ལྡན་པ་དུང་གི་སྒྲ་དང་མཚུངས་པར་སྤྱོད་པ་རྣམས། དགེ་འདུན་གྱི་ནང་དུ་ཞུགས་པར་གྱུར་པའམ་སྦྱིན་བདག་གི་ཁྱིམ་དུ་སོང་བར་གྱུར་པ་ན་ཡང་རུང་སྟེ། ལྕེ་དང་རབ་ཏུ་འབྲེལ་བ་དང་དེ་ལ་སོང་བའི་བློས་དགེ་སློང་གི་ཆ་བྱད་འཛིན་པས་རོ་དག་མྱོང་བར་བྱེད་པ་ནི། རྒྱུ་དེ་དང་རྐྱེན་དེ་དག་གིས་ལུས་ཞིག་པ་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །གང་ཡང་ལེ་ལོ་ཅན་གྱི་དགེ་སློང་གཞན་རྣམས་ནི་བསམ་གཏན་གྱིས་བསམ་གཏན་དུ་བྱེད་པའི་བྱ་བ་ཡོངས་སུ་བཏང་ནས། ཡིད་དེ་ལ་སོང་བ་དང་རང་གི་འདུན་པའི་འདོད་ཆགས་སྔོན་དུ་འགྲོ་བས་ཟས་ཀྱི་དོན་དུ་གནས་ན་གནས་རྣམས་སུ་ཉེ་བར་འགྲོ་བར་བྱེད་དོ།