།རྣམ་པ་དུ་མ་དང་རྣམ་པར་རྟོག་པ་དུ་མར་ཡང་སྲིན་བུའི་སྐྱོན་ཕུལ་དུ་ཕྱིན་པའི་སྡུག་བསྔལ་གྱིས་འཆི་བ་མངོན་པར་མཐོང་ནས། རང་བཞིན་གྱི་ལྷ་དེ་དག་མཆོག་ཏུ་ཡིད་བྱུང་བ་དང་ལྡན་པར་གྱུར་ནས། འཆི་བའི་སྡུག་བསྔལ་འདི་ནི་ངེས་པར་བསླང་བ་ཡིན་ཏེ། དེ་ལྟར་ཡང་སྲོག་ཆགས་སུ་གྱུར་པ་གང་ཡིན་པ་འདི་དག་རྣམས་ཐམས་ཅད་ཀྱང་རྒ་བ་དང་ནད་དང་འཆི་བ་རྣམས་ཀྱིས་མཐར་ཐུག་པར་བྱེད་པ་ཡིན་པ་རབ་ཏུ་མི་ཤེས་ན། དེ་དག་རྣམས་ཀྱང་གང་དུ་སོང་གང་གིས་ཁྲིད་པར་གྱུར་པ་ཡིན། ཕུན་སུམ་ཚོགས་པ་རྣམས་ཐམས་ཅད་ནི་མི་རྟག་པ་ཡིན་པ་དང་། བདེ་བ་རྣམས་ཐམས་ཅད་ཀྱང་སྲིད་པའི་སྐྱོན་དང་ཀུན་དུ་འདྲེས་པའི་འདུས་བྱས་ཞེས་བྱ་བ་གཡོ་བ་མཐར་འཇིག་པར་འགྱུར་བ་འདི་ལ་བློ་དང་ལྡན་པའི་སྐྱེས་བུ་རྣམས་ཀྱིས་ཡིད་ཆེས་པར་མི་བྱའོ། །རབ་ཏུ་རྣམ་པར་འཇིག་པར་འགྱུར་བའི་ཆོས་ཅན་འདི་དག་རྣམས་ཐམས་ཅད་ལ་འདི་དང་སྲིད་པ་གཞན་དུ་ཡང་བདེ་བ་ཡོད་པ་མ་ཡིན་ནོ། །མཆོག་ཏུ་སྐྱོ་བ་སྐྱེས་པའི་ཡིད་དང་ལྡན་པའི་ལེགས་པར་སྐྱོ་བ་སྐྱེས་པའི་བློ་དང་ལྡན་པའི་རང་བཞིན་གྱི་ལྷ་དེ་དག་རྣམས་དེ་ལྟར་ཕན་ཚུན་དུ་རྗོད་པར་བྱེད་དོ། །དེ་ནས་འཐབ་བྲལ་གྱི་བདག་པོ་དེས་དེ་དག་རྣམས་ཀྱི་སེམས་དང་སེམས་ལས་བྱུང་བ་དེ་དག་རིག་པར་གྱུར་ནས་སྤྲུལ་པ་གཞན་ཡང་བྱེད་པར་གྱུར་པ་ལས། དེ་ནས་སྐྱེས་བུ་གང་དག་ང་མེད་པ་ངའི་བ་མེད་པར་གྱུར་པ། ངེས་པར་གོང་དུ་འགྲོ་བ་དེ་དག་རྣམས་ནི། འདི་ལྟ་སྟེ་གང་བྱང་ཕྱོགས་སྒྲ་མི་སྙན་པ་གང་ཡིན་པ་རྣམས་ཏེ། དེ་དག་རྣམས་ནི་ལྷ་རྣམས་ཀྱི་དྲུང་ན་ཅུང་ཟད་པ་ཅིག་གིས་ཆུང་བའི་མཆོག་ཏུ་སྐྱིད་པར་གྱུར་པའོ། །དེ་དག་རྣམས་ཀྱང་རྒས་པ་དང་ནད་ཀྱིས་གཟིར་བར་གྱུར་ནས་འཆི་བདག་གི་ཞགས་པས་འདྲེན་པར་བྱེད་དོ། །ཤིན་ཏུ་འཇིགས་སུ་རུང་བའི་ལུས་རྣམས་ལ་སྲིན་བུ་བརྒྱ་སྟོང་གིས་ཀུན་ནས་གཡོགས་པར་གྱུར་པ། ལུས་པོ་འདི་དག་ལ་སྐྱེ་བོ་རྣམས་ཐམས་ཅད་ཀྱིས་བལྟ་བར་རྗེས་སུ་མི་འཐུན་པ། བཤང་བའི་ཕུང་པོ་རྣམས་ཀྱིས་ཀུན་དུ་གང་བར་གྱུར་པའི་བྱང་ཕྱོགས་སྒྲ་མི་སྙན་པ་འདི་དག་རྣམས་སོ། །