དེ་ལྟར་བདེ་བ་རྒྱ་ཆེན་པོའི་ས་ན་གནས་པའི་འཐབ་བྲལ་བའི་ལྷ་རྣམས་ལ་ཕན་པར་བྱ་བའི་དོན་དུ་ལྷ་དང་མི་དང་ལྷ་མ་ཡིན་རྣམས་ཀྱི་མི་རྟག་པ་ཉིད་འཐབ་བྲལ་གྱི་བདག་པོ་འདིས་བསྟན་པ་ཡིན་ནོ། །དེའི་རྗེས་ཐོགས་ལ་གང་དག་རང་བཞིན་གྱི་ལྷ་དེ་དག་རྣམས་ཀྱིས་མཐོང་བར་སྤྲུལ་པ་གཞན་དག་རྣམས་བྱེད་པ་ནི་འདི་ལྟ་སྟེ། སྲིད་པ་བར་མ་དོ་པའི་ཚོགས་རྣམ་པ་དུ་མ་རྣམས་སོ། །ཇི་ལྟར་ཤི་བར་གྱུར་ནས་སེམས་ཅན་རྣམས་ལས་སྣ་ཚོགས་པ་རྣམས་ཀྱི་དབང་གིས་དམྱལ་བ་དང་ཡི་དགས་དང་དུད་འགྲོ་དང་ལྷ་དང་མི་རྣམས་སུ་སྐྱེ་བ་དེ་བཞིན་དུ་སྲིད་པ་བར་མ་དོ་པ་རྣམས་སྤྲུལ་པ་བྱེད་དེ། ཇི་ལྟར་འགྲོ་བ་ལྔ་པོ་རྣམས་ཀུན་དུ་རྒྱུ་བར་བྱེད་པ་རྣམས་ལྷ་རང་བཞིན་པས་མངོན་སུམ་ཉིད་དུ་མཐོང་བར་འགྱུར་རོ། །དེ་ལ་ལས་དུ་མ་རྣམས་ལས་སེམས་ཀྱི་ཐ་མའི་བསམ་པའི་དབང་གིས་སྐྱེ་བར་འགྱུར་རོ། །དེ་ལས་རང་བཞིན་གྱི་ལྷ་དེ་དག་རྣམས་ཉིད་ངེས་པར་སྐྱོ་བར་བྱ་བའི་དོན་དུ་རྣམ་པ་དུ་མར་ལན་བརྒྱ་སྟོང་དུ་སྐྱེ་དགུ་རྣམས་འགྲོ་བ་ལྔར་སྐྱེ་བ་སྤྲུལ་པར་བྱེད་དོ། །མཚོ་དེ་ཉིད་དུ་བསམ་གྱིས་མི་ཁྱབ་པ་ཤིན་ཏུ་ངོ་མཚར་བ་གཞན་རྣམས་དང་མི་འདྲ་བ་དེ་དག་རྣམས་མངོན་པར་མཐོང་ཞིང་རང་བཞིན་གྱིས་ལྷ་དེ་དག་གིས་མངོན་སུམ་ཁོ་ནར་མཐོང་བར་འགྱུར་རོ། །དེ་ལ་ཡང་འགྲོ་བ་ལྔར་ཀུན་དུ་རྒྱུ་བར་བྱེད་པའི་འབྱུང་པོ་རྣམས་ཐམས་ཅད་ལས་དང་ཉོན་མོངས་པ་རྣམས་ཀྱི་དབང་གིས་དྲངས་པར་གྱུར་པས་འགྲོ་བ་གཞན་ནས་འགྲོ་བ་གཞན་རྣམས་སུ་དམྱལ་བ་དང་། ཡི་དགས་དང་། དུད་འགྲོ་དང་། ལྷ་དང་མིའི་འགྲོ་བ་རྣམས་ལ་ཡོངས་སུ་འཁྱམ་པར་གྱུར་པ་ལ་ནི་སྐྱབས་མེད་པ་དང་གྲོགས་མེད་པར་གྱུར་པས་སྲིད་པ་གཞན་རྣམས་བརྗེ་བསོར་བྱེད་པ། དམྱལ་བ་དང་། ཡི་དགས་དང་། དུད་འགྲོ་དང་། ལྷ་དང་མི་རྣམས་ཀྱི་ནང་དུ་བརྗེ་བསོར་བྱེད་པ་རྣམས་མཐོང་ངོ་། །དེ་ལ་སྲིད་པ་བར་མ་དོ་པ་རྣམས་ཀྱི་ཡ་མཚན་ཆེ་བར་གྱུར་པ་ཤིན་ཏུ་འཇིགས་སུ་རུང་བ། ཀུན་ནས་ཤིན་ཏུ་འཇིགས་པར་བྱེད་པ་མཆོག་ཏུ་སྐྱོ་བ་སྐྱེ་བར་བྱེད་པ་ཐམས་ཅད་ལ་རབ་ཏུ་འཇིགས་པར་བྱེད་པར་གྱུར་པ་དེ་དག་རྣམས་རང་བཞིན་གྱི་ལྷ་རྣམས་ཀྱིས་མཐོང་བར་འགྱུར་རོ།