འཇིག་རྟེན་ཕ་རོལ་ལ་སྐུར་པ་མི་འདེབས་སོ། །བླ་མ་རྣམས་མཆོད་པར་བྱེད་དོ། །སེམས་འཇམ་པོར་འགྱུར་རོ། །བློ་གྲོས་མཉམ་པར་བཞག་པར་འགྱུར་རོ། །སེམས་ཀྱིས་ཀུན་དུ་སྒོམ་པར་བྱེད་དོ། །དངོས་པོ་རྣམས་ཡོངས་སུ་གཏོང་བར་བྱེད་དོ། །ལོངས་སྤྱོད་ཆེན་པོར་འགྱུར་བའི་རྒྱུ་རྣམས་ཀུན་དུ་འཕེན་པར་བྱེད་དོ། །སེར་སྣ་རྣམས་རབ་ཏུ་འཇོམས་པར་བྱེད་དོ། །ཞིང་རྣམ་པ་གསུམ་པོ་ཡོན་ཏན་དང་། ཚུལ་ཁྲིམས་དང་། གཉི་ག་སྲིད་པ་རྣམས་ལ་སྦྱིན་པའི་ས་བོན་ཆང་བས་འདེབས་པར་བྱེད་དོ། །དེ་དེ་ལྟར་ལེགས་པར་བསྒོམས་པར་གྱུར་པའི་ཡིད་ཅན་མཆོག་ཏུ་རྣམ་པར་དག་པའི་ཡིད་དང་ལྡན་པ་ནི་དུས་རིང་དུ་མངའ་བདག་བྱེད་པར་འགྱུར་རོ། །དུས་རིང་དུ་འཚེ་བ་མེད་པ་དང་སྐྱོན་མེད་པར་གྱུར་པའི་ལོངས་སྤྱོད་རྣམས་དང་ལྡན་ཞིང་འཇིགས་པ་དང་མྱ་ངན་དང་རྣམ་པར་བྲལ་བ་དང་ལུས་ཞིག་པར་གྱུར་ནས་ཤི་བའི་འོག་ཏུ་ཡང་མཐོ་རིས་བདེ་འགྲོའི་འཇིག་རྟེན་འཐབ་བྲལ་བ་རྣམས་ཀྱི་མངའ་བདག་ཏུ་འགྱུར་ཏེ། དེས་སྔོན་བྱས་པར་གྱུར་པའི་ལས་རྣམས་ཀྱི་རྒྱུ་དང་རྐྱེན་གྱིས་སོ། །ཆོས་གཞན་ཡང་རྒྱལ་པོས་རབ་ཏུ་བརྩོན་པར་བྱའོ། །འདི་ཡང་གང་ཞེ་ན། འདི་ལྟ་སྟེ། འཐུན་པར་བྱེད་པ་དང་སྙན་པའི་ངག་གོ། །རྒྱལ་པོ་འཐུན་པར་སྙན་པར་སྨྲ་བ་ནི། གང་གི་ཕྱིར་ཆོས་ལུགས་ལེགས་པ་དང་ལྡན་པར་འགྱུར་རོ། །རང་བཞིན་གྱིས་ཐམས་ཅད་ཀྱང་ཤིན་ཏུ་སྡུག་པར་འཛིན་པར་འགྱུར་རོ། །གང་འཐུན་པར་འཛིན་པའི་སྙན་པའི་ངག་གིས་བྱེད་པ་ལྟར་ནི་ཡོ་བྱད་ཀྱིས་ཀྱང་བྱ་བར་ནུས་པ་མ་ཡིན་ནོ། །ཇི་ལྟར་སྙན་པའི་ཚིག་གིས་ཡུལ་ལྗོངས་པ་དེ་དག་རྣམས་ཐམས་ཅད་དགའ་བར་འགྱུར་བ་ལྟར་རྣམ་པ་དེ་ལྟ་བུར་རབ་ཏུ་དགའ་བར་བྱེད་པ་དང་། ཡུལ་ལྗོངས་ཀྱི་སྐྱེ་བོ་རྣམས་ཐམས་ཅད་ཤིན་ཏུ་མྱུར་བར་ཡིད་རབ་ཏུ་ཚིམ་པར་བྱེད་པ་ནི་ཡོད་པ་མ་ཡིན་ནོ། །རྒྱུ་མཚན་འདི་དག་གི་ཕྱིར་ན་སྙན་པའི་ཚིག་དེ་བྱའོ། །ཡང་ན་འཐུན་པར་སྨྲ་བ་སྔོན་དུ་བཏང་བས་ནི་སེམས་རབ་ཏུ་དང་བར་གྱུར་ནས་སྐྱེ་བོ་རྣམས་ཀྱིས་གཞན་རྣམས་ལ་གོ་བར་བྱེད་པར་འགྱུར་རོ།