།ཡང་ན་འཐུན་པར་སྨྲ་བ་སྔོན་དུ་བཏང་བས་ནི་སེམས་རབ་ཏུ་དང་བར་གྱུར་ནས་སྐྱེ་བོ་རྣམས་ཀྱིས་གཞན་རྣམས་ལ་གོ་བར་བྱེད་པར་འགྱུར་རོ། །སྙན་པར་སྨྲ་བའི་ཚིག་གི་རྒྱུ་དེས་དེ་ལ་དགའ་བར་འགྱུར་རོ། །སྙན་པར་སྨྲ་བའི་རྒྱུ་དེ་དང་ཡང་དག་པར་ལྡན་པའི་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་གཞན་གྱི་མདུན་དུ་རྣམ་པར་རྒྱལ་བར་འགྱུར་རོ། །རང་བཞིན་གྱིས་ཀྱང་དགའ་བར་འགྱུར་བ་ལ། བདེན་པ་དང་སྦྱིན་པ་དང་བསྲེས་པའི་སྙན་པའི་ཚིག་གིས་ཕྱིར་ཡང་དགའ་བར་བྱེད་དོ། །སྙན་པར་སྨྲ་བར་བྱེད་པའི་རང་བཞིན་ཅན་གྱི་རྒྱལ་པོ་ལ་ནི་དགྲ་རྣམས་ཀྱང་གྲོགས་པོར་འདུད་པར་བྱེད་ན་བར་མར་གནས་པ་དང་། གྲོགས་པོ་རྣམས་ལྟ་སྨོས་ཀྱང་ཅི་དགོས། དེ་ལྟར་སྙན་པར་སྨྲ་བར་གྱུར་པའི་རང་བཞིན་ཅན་དེ་ལ་ཚོམས་གཅིག་ཏུ་འགྱུར་རོ། །འདི་ལྟ་སྟེ་གྲོགས་པོ་ཉིད་ཀྱི་ཚོམས་སུ་འགྱུར་གྱི། བར་མར་གནས་པ་ནི་མ་ཡིན་ཏེ། རང་བཞིན་གྱིས་སྐྱེ་བོ་ཐམས་ཅད་དགའ་བ་དང་མཆོག་ཏུ་མཆོད་པ་དང་། དུས་རིང་དུ་ཡང་རྒྱལ་པོ་བྱེད་པར་འགྱུར་རོ། །སྙན་པར་སྨྲས་པའི་རྒྱུ་དང་རྐྱེན་གྱིས་ལུས་ཞིག་པར་གྱུར་ནས་ཤི་བའི་འོག་ཏུ་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཆོས་གཞན་ཡང་རྒྱལ་པོས་རབ་ཏུ་བརྩོན་པ་མང་པོས་ཆོས་རྣམས་ཤིན་ཏུ་བསྟེན་པར་བྱའོ། །འདི་ཡང་གང་ཞེ་ན། འདི་ལྟ་སྟེ། བདེན་པར་སྨྲ་བ་ཞེས་བྱ་བ་འཁོར་བ་ན་ཀུན་ནས་བཅིངས་པའི་སྐྱེ་བོ་རྣམས་ཐམས་ཅད་ངེས་པར་འབྱིན་པའི་རྒྱུ་ངེས་པར་འབྱུང་བའི་རྒྱུར་གྱུར་པ་ཉོ་བའི་རིན་ཐང་བྱར་མེད་པའི་ཟད་པ་མེད་པའི་ནོར་གཏེར་དུ་བརྡུངས་ནས་བསྐྱེད་པ་ཐུན་མོང་མ་ཡིན་པའི་ནོར་སྙིང་གི་རྒྱུར་གྱུར་པར་གནས་པ། མཆོག་ཏུ་ལྟ་བར་མཛེས་པའི་རིན་པོ་ཆེ་ཆེན་པོ་དམ་པའི་སྐྱེ་བོ་ཐམས་ཅད་ཀྱིས་བསྟེན་པའི་འཇིག་རྟེན་ཕ་རོལ་དང་འཇིག་རྟེན་འདིར་ཡང་སྐྱབས་སུ་གྱུར་པ་མྱ་ངན་ལས་འདས་པ་ལ་བརྩོན་པ་དང་ལྡན་པ་རྣམས་ཀྱི་སྒོ་གཉེར་བར་གྱུར་པ་ཡོན་ཏན་དང་ཀུན་ཏུ་འབྲེལ་བ་རྣམས་ཟད་པར་མི་འགྲོ་བ་སྐྱོན་རྣམས་འཇིགས་པར་བྱེད་པ་པོ་ཡིད་ཆེས་པ་སྐྱེད་པར་བྱེད་པ་པོ་དབུལ་བ་འཇིག་པར་བྱེད་པ་པོ་བདེན་པར་སྨྲ་བ་ནི། གཟུགས་ཐམས་ཅད་དང་བྲལ་བ་ཡིན་ཡང་གཟུགས་དང་ལྡན་པ་ཐམས་ཅད་ལས་ལྷག་པ་ཡིན་ཏེ།