།དེ་དེ་དག་རྣམས་ཟད་པར་གྱུར་ཅིང་ལྷའི་རིགས་དེ་ལས་ཤི་འཕོས་པར་གྱུར་ནས་ཀྱང་ཇི་ལྟར་ལས་ཀྱིས་ཉེ་བར་འགྲོ་བ་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །གལ་ཏེ་ན་འགའ་ཞིག་མི་རྣམས་དང་སྐལ་བ་འཐུན་པར་གྱུར་པ་མིར་སྐྱེས་ན། དེ་མཆོག་ཏུ་སྐྱིད་པ་ཉིད་དུ་འགྱུར་ཏེ། ལས་དེའི་རྒྱུ་འཐུན་པས་ཡིད་གཞུངས་པ་དང་ཤེས་རབ་ཀྱིས་འཚོ་བ་དང་རྒྱལ་པོ་མངོན་པར་འདོད་པ་དང་ཤིན་ཏུ་ཕུན་སུམ་ཚོགས་པར་འགྱུར་རོ། །འགྲོ་བ་དང་ཡང་དག་པར་ལྡན་པའི་ས་རྫོགས་སོ།། །།གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་འཐབ་བྲལ་བའི་ལྷ་རྣམས་ཀྱི་ས་ལ་ཀུན་དུ་ལྟ་བར་བྱེད་དོ། །ཇི་ལྟར་ཡོད་པའི་འཐབ་བྲལ་བ་རྣམས་ཀྱིས་འོད་ཟེར་འཕྲོ་བ་ཞེས་བྱ་བ་དེས་ཐོས་པ་ལས་བྱུང་བའི་ཤེས་རབ་ཀྱིས་མཐོང་ངོ་། །དེར་ལས་གང་གིས་སེམས་ཅན་རྣམས་སྐྱེ་བར་འགྱུར་བ་ཡང་དེས་མཐོང་བར་གྱུར་པ་ནི་སྐྱེས་བུ་དམ་པ་གང་གིས་ཐོས་པའི་དོན་དང་ལྡན་ཞིང་ཚུལ་ཁྲིམས་དང་ལྡན་པར་འགྱུར་ཏེ། མཆོག་ཏུ་གྱུར་པའི་ཡང་དག་པའི་ལྟ་བ་དང་ལྡན་པ་གང་གིས་ཕ་རོལ་ལ་ཡིད་གདུང་བར་མི་བྱེད་པ་དང་དྲང་པོ་དང་ཡིད་དྲང་པོར་གྱུར་པས་སྲོག་གཅོད་པ་དང་མ་བྱིན་པར་ལེན་པ་ཡང་སྤངས་པར་གྱུར་པ་རྣམས་ནི་སྔར་བཞིན་ནོ། །འདོད་པ་ལ་ལོག་པར་གཡེམ་པ་ཡང་རྣམ་པར་སྤངས་པར་གྱུར་པའོ། །དེ་ལྟར་ཡང་ཅུང་ཟད་ཅིག་ཀྱང་བུད་མེད་དག་ལ་ཚུལ་བཞིན་མ་ཡིན་པ་ཡིད་ལ་བྱེད་པར་གྱུར་པས་ལྟ་བར་མི་བྱེད་དེ། འདོད་པ་ལ་ལོག་པར་གཡེམ་པར་གྱུར་པའི་འཇིགས་པ་རྣམས་ཀྱིས་འཇིགས་པའི་ཕྱིར་རོ། །ཤིན་ཏུ་རྣམ་པར་དག་པའི་ལས་ཤིན་ཏུ་རྣམ་པར་དག་པའི་འཚོ་བ་ལས་ཀྱི་མཐའ་རྣམས་ཤིན་ཏུ་རྣམ་པར་དག་པར་གྱུར་པ། དེ་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་འོད་ཟེར་འཕྲོ་བ་ཅན་གྱི་སར་སྐྱེ་བར་འགྱུར་རོ། །དེ་ལ་སྐྱེས་པར་གྱུར་པ་ནི་ལྷ་རྫས་ཀྱི་ཡུལ་རྣམས་ལ་ལོངས་སྤྱོད་པར་གྱུར་པའི་བུད་མེད་བརྒྱ་སྟོང་གིས་ཡོངས་སུ་བསྐོར་བ་ལས་ཀྱི་མཐའ་རྣམས་ཡོངས་སུ་དག་པ། འདོད་པའི་ཡོན་ཏན་ལྔའི་རྒྱགས་པས་དབང་པོ་དྲུག་གི་དབང་དུ་སོང་བར་གྱུར་ནས་དེ་ནགས་དང་ཉེ་བའི་ནགས་ཀུན་དུ་བལྟ་བ་ལ་བག་མེད་པ་རྣམས་ཇི་ལྟ་ཇི་ལྟར་ལྷ་དེས་ལྷ་རྫས་ཀྱི་སྲེད་པ་དུ་མ་རྣམས་རྣམ་པ་དུ་མར་མཐོང་བར་གྱུར་པ་དེ་ལྟར་བག་མེད་པར་རྒྱུ་བར་འགྱུར་རོ། །འདི་ལྟར་གྱུར་པ་ཡིན་ཏེ་ལྷ་དེ་ལྷ་རྫས་ཀྱི་ཡུལ་དེ་དག་རྣམས་ཉིད་སྒྲུབ་པ་ལ་ཆེད་ཆེ་བ་ཡོངས་སུ་སྒྲུབ་པ་ལྷག་པར་འགྱུར་རོ།