།གཞན་ཡང་དེས་བག་མེད་པའི་སྐྱོན་རྣམས་མཐོང་བར་གྱུར་ཅིང་དེ་དེ་ཁོ་ན་བཞིན་དུ་བག་མེད་པ་རྣམས་སྤོང་བར་བྱེད་དོ། །འདི་ནི་བག་མེད་པའི་གཉེན་པོ་བཞི་པ་ཡིན་ནོ། །གཞན་ཡང་བག་མེད་པའི་གཉེན་པོ་ལྔ་པ་འདི་ལྟ་སྟེ། སྐྱེས་བུ་བག་མེད་པའི་ཉེས་དམིགས་ཅན་རྣམས་ལ་རྒྱལ་པོའམ་རྒྱལ་པོའི་བློན་པོ་རྣམས་ཀྱིས་ཀྱང་རུང་སྟེ་ཆད་པས་གཅོད་པར་བྱེད་པ་རྣམས་ཇི་ལྟ་བ་བཞིན་དུ་མཐོང་བའོ། །དེའི་སྲོག་གི་ཆད་པའམ་དེའི་རང་གི་ཐམས་ཅད་འཕྲོག་པར་བྱེད་པའི་ཆད་པའམ་དེའི་ལུས་སྒྱུར་བར་བྱེད་པའམ་དེའི་ལག་པ་གཅོད་པར་བྱེད་པའམ་རྣམ་པ་དེ་ལྟ་བུའི་ཆད་པ་རྣམས་བག་མེད་པ་ལས་འབྱུང་བར་གྱུར་པ་གང་གི་ཚེ་མཐོང་བ་དེའི་ཚེ་དེ་ལས་གཞན་པའི་བག་མེད་པ་རྣམས་ལ་ཡང་འཇིགས་པར་འགྱུར་རོ། །དེ་འཇིགས་པ་དང་བཅས་པར་གྱུར་པ་ཉིད་ཀྱིས་དྲི་མ་ཅན་བག་མེད་པ་རྣམས་ཡོངས་སུ་སྤོང་བར་བྱེད་དོ། །དེ་བཞིན་དུ་བག་མེད་པ་རྣམས་རབ་ཏུ་འཇོམས་པར་ཡང་བྱེད་དོ། །བག་ཡོད་པ་ཡང་ཀུན་ནས་སྟེན་པར་བྱེད་དོ། །དེ་ལས་རྗེས་སུ་དཔགས་ནས་དེ་སྡིག་པ་རྣམས་མི་བྱེད་དེ་བདག་དམྱལ་བར་སྐྱེ་བར་མ་གྱུར་ཅིག་སྙམ་དུ་བསམས་པའི་ཕྱིར་རོ། །བག་མེད་པ་སྟེན་པར་གྱུར་པའི་ལྷ་དེ་དག་རྣམས་ནི་སྡིག་པ་བྱེད་དོ། །འདི་ནི་བག་མེད་པའི་གཉེན་པོ་ལྔ་པའོ། །དེ་ལྟར་བག་མེད་པ་དེ་དག་རྣམས་ནི་ལྷ་རྣམས་ལ་མཛེས་པ་མ་ཡིན་ལ་མི་རྣམས་ལ་ཡང་མ་ཡིན་ནོ། །མདོ་དེ་དག་ཐོས་ནས་ཀྱང་ལྷ་མང་པོ་རྣམས་མཆོག་ཏུ་ཡིད་བྱུང་བར་གྱུར་ནས་བག་མེད་པ་ཡོངས་སུ་སྤོང་བར་བྱེད་དོ། །མུ་སུ་ལུན་དྷས་ཀྱང་མཁའ་ལྡིང་གི་རྒྱལ་པོ་དེས་བཤད་པ་དེ་རྣམས་ལ་མངོན་པར་དགའ་ཞིང་རྗེས་སུ་ཡི་རང་བར་ཡང་གྱུར་ནས་སླར་ཡང་ལྷའི་ཚོགས་དེ་དག་རྣམས་ཉིད་དང་ཇི་ལྟར་འོངས་པར་གྱུར་པ་ལྟར་ནམ་མཁའ་ལ་འཕགས་ཏེ་དོང་ངོ་། །དེ་དག་རྣམས་ལས་ཀྱང་གཞན་དུ་གྱུར་པའི་ལྷ་ལྷག་མ་རྣམས་ཁ་ཅིག་ནི་རྣམ་པར་ཡངས་པ་དེ་ཉིད་ཀྱི་ནང་ན་རྩེད་མོ་རྩེ་བར་བྱེད་དོ། །ཁ་ཅིག་ནི་ཇི་ལྟར་འོངས་པར་གྱུར་པ་དེ་བཞིན་དུ་སླར་ཡང་ནགས་དང་ཉེ་བའི་ནགས་རྣམས་སུ་ཞུགས་པར་གྱུར་ཅིང་ལྷ་དག་རབ་ཏུ་རྩེ་བར་ཡང་བྱེད་དེ། དེ་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པར་གྱུར་པའི་ལེགས་པར་བྱས་པའི་ལས་རྣམས་ཟད་པར་མ་གྱུར་པའི་དུས་དེ་སྲིད་དུ་ལྷའི་རིགས་དེར་རྩེ་བར་བྱེད་ཅིང་དགའ་བར་ཡང་བྱེད་དོ། །དེ་དེ་དག་རྣམས་ཟད་པར་གྱུར་ཅིང་ལྷའི་རིགས་དེ་ལས་ཤི་འཕོས་པར་གྱུར་ནས་ཀྱང་ཇི་ལྟར་ལས་ཀྱིས་ཉེ་བར་འགྲོ་བ་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ།