།འདི་ལྟར་གྱུར་པ་ཡིན་ཏེ་ལྷ་དེ་ལྷ་རྫས་ཀྱི་ཡུལ་དེ་དག་རྣམས་ཉིད་སྒྲུབ་པ་ལ་ཆེད་ཆེ་བ་ཡོངས་སུ་སྒྲུབ་པ་ལྷག་པར་འགྱུར་རོ། །དེ་དགའ་བར་གྱུར་པའི་ས་གཞི་མཉམ་པ་མནན་ན་ནེམ་པ་བཏེག་ན་འཕར་བ་འཇམ་པོར་གྱུར་པ་རིན་པོ་ཆེ་བདུན་དང་ལྡན་པས་ཤིན་ཏུ་རྣམ་པར་ཕྱེ་བའི་ས་གཞི་ཆ་མཆོག་ཏུ་དགའ་བར་གྱུར་པ་ལ་རབ་ཏུ་འཇུག་པར་བྱེད་དོ། །ས་གཞི་དེ་ནི་རྣམ་པ་དེ་ལྟ་བུ་རྣམས་ཡིན་ཏེ། ཤིང་གང་དག་ལ་ཞོན་པར་གྱུར་པ་དེ་དག་རྣམས་ཀྱང་དེ་ཁོ་ན་བཞིན་དུ་རེག་པར་བཟོད་པར་འགྱུར་རོ། །མཆོག་ཏུ་མཉེན་པར་གྱུར་པ་སྦྱངས་པ་འཇམ་པོའི་གསེར་གྱི་འདབ་མ་དང་འབྲས་བུ་རྣམས་ཇི་ལྟར་འདོད་པར་གྱུར་པའི་རོ་དང་དྲི་དང་ཁ་དོག་དང་ལྡན་པས་ཤིན་ཏུ་ཡང་ལྷ་རྣམས་ཀྱི་ཟས་ཀྱི་རྒྱུར་འགྱུར་རོ། །དེ་ལྟར་ལྷ་དེ་དག་རྣམས་ཉིད་འདི་ལྟར་འགྱུར་ཏེ། གང་གི་ཚེ་བདག་ཅག་རྣམས་འབྲས་བུ་འདི་དག་རྣམས་ལས་མཆོག་ཏུ་རོ་དང་དྲི་དང་ཁ་དོག་དང་རེག་བྱ་རྣམས་ཕུན་སུམ་ཚོགས་པའི་བཏུང་བ་འབྲས་བུ་དེ་དག་ལས་འབབ་པར་གྱུར་མོད། དེ་ནས་སེམས་བསྐྱེད་པ་ཙམ་ཉིད་ན་ལྷ་དེ་རྣམས་ཉིད་ཀྱི་དྲུང་དུ་འབྲས་བུ་བཟང་པོ་དེ་དག་ལས་བཏུང་བ་སྔ་ན་མེད་པ་རོ་དང་ཁ་དོག་གི་ཡོན་ཏན་དང་ལྡན་པ་རབ་ཏུ་འབབ་པའོ། །དེ་ཡང་ལྷས་ནོར་བུའི་རང་བཞིན་གྱི་སྣོད་ལེགས་པར་བཞག་ནས་ལྷ་མོ་དང་བཅས་པ་རྣམས་འཐུང་བར་བྱེད་དོ། །དེ་དག་རྣམས་ཀྱི་བཏུང་བ་དེ་ཡང་དམན་པ་དང་བར་མ་དང་མཆོག་ཏུ་གྱུར་པའི་ཁ་དོག་དང་རོ་དང་དྲིར་འགྱུར་ཏེ། ལས་དུ་མ་རྣམས་དང་འདྲ་བ་ཡིན་པས་ཇི་ལྟར་ལེགས་པར་བྱས་པར་གྱུར་པའི་ལས་རྣམས་ནི་རོས་ཀྱང་སོ་སོར་སྟོན་པར་བྱེད་པ་ལྟ་བུར་འགྱུར་རོ། །དེ་ནས་ལྷ་དེ་དག་རྣམས་བཏུང་བ་དེ་འཐུངས་པར་གྱུར་ནས་གཞན་ཡང་རྒྱགས་པ་དུ་མས་རྒྱུ་བར་བྱེད་ཅིང་བག་མེད་པར་རྒྱུ་བས་བསྲེགས་ནས་ནགས་དང་ཉེ་བའི་ནགས་རྣམས་ལྟ་བའི་གཡོ་འགུལ་གྱིས་བསྲེགས་པས་རབ་ཏུ་གར་བྱེད་པ་དང་གླུ་དང་གར་དང་དགོད་པ་དང་ཕན་ཚུན་དུ་ལྷན་ཅིག་ཏུ་སྐྱོད་པར་བྱེད་པས་གང་ན་ནགས་དང་ཉེ་བའི་ནགས་རྣམས་ཡོད་པ་དེར་ཉེ་བར་འགྲོ་བར་བྱེད་དེ་བལྟ་བར་བྱ་བའི་དོན་དུའོ། །དེ་གང་ཁོ་ན་ནས་ཇི་ལྟར་འགྲོ་བར་བྱེད་པ་དེས་དེ་དེ་ཁོ་ན་ནས་རྣམ་པ་དུ་མར་དཔེ་མེད་པའི་ལྷ་རྫས་ཀྱི་གཟུགས་རྣམས་མཐོང་བར་འགྱུར་རོ། །སོ་སོར་སྟོན་པར་བྱེད་པ་ལྟ་བུར་གྱུར་པའི་རོ་ཡང་མྱོང་བར་བྱེད་དོ། །དེ་ལ་དེས་རྣམ་པ་དུ་མ་དང་རྣམ་པར་རྟོག་པ་དུ་མར་གྱུར་པའི་རོ་རྣམས་མྱོང་བར་བྱེད་དོ། །དེ་བཞིན་དུ་ཡིད་འཕྲོག་པར་བྱེད་པ་གང་ཡིན་པ་ཁོ་ནའི་དྲི་རྣམས་སྣོམ་པར་བྱེད་དོ། །དེ་ལ་དེས་རྣམ་པ་དུ་མ་དང་རྣམ་པར་རྟོག་པ་དུ་མར་གྱུར་པ་རྣམས་སྣོམ་པར་བྱེད་དོ།