།གཞན་ཡང་མཁའ་ལྡིང་གི་རྒྱལ་པོ་དེ་ཉིད་ཀྱིས་མུ་སུ་ལུན་དྷ་ལ་ཆོས་ཀྱི་མཆོག་རྣམས་སྟོན་པར་བྱེད་དོ། །ཇི་ལྟར་ལྔ་པོ་འདི་དག་རྣམས་ནི་བག་མེད་པ་སྐྱེས་པའི་གཉེན་པོར་གྱུར་པ་ལ་འདི་ལྟ་སྟེ། འདི་ན་བག་མེད་པའི་སྐྱེས་བུ་རྣམས་ནི་ཐམས་ཅད་ལས་ཁྱད་པར་དུ་སྡུག་བསྔལ་བར་འགྱུར་རོ། །དེ་བག་མེད་པའི་སྐྱོན་རྣམས་གང་དང་གང་གིས་སྡུག་བསྔལ་དང་ལྡན་པར་འགྱུར་རོ། །དེ་སྐྱོན་དང་བཅས་པ་ཡིན་པར་ཤེས་པར་གྱུར་ནས་ཡོངས་སུ་སྤང་བར་བྱ་སྟེ། ཡོན་ཏན་དང་སྐྱོན་དག་ཤེས་པར་གྱུར་ཅིང་ཡོན་ཏན་དང་སྐྱོན་དག་མཐོང་བར་གྱུར་པ་རྣམས་ཀྱིས་དེ་ཡོངས་སུ་སྤངས་པར་གྱུར་པ་ལས་ནི་འདི་དག་དོན་མ་ཡིན་པར་མི་འགྱུར་རོ། །སྡུག་བསྔལ་བར་ཡང་མི་འགྱུར་རོ། །མི་དགེ་བ་མངོན་པར་འཕེལ་བར་ཡང་མི་འགྱུར་རོ། །ཤེས་བཞིན་དུ་ཡང་རྒྱུ་བར་འགྱུར་རོ། །འདི་ནི་བག་མེད་པའི་གཉེན་པོར་གྱུར་པ་གཅིག་ཡིན་ནོ། །གཞན་ཡང་བག་མེད་པའི་གཉེན་པོར་གྱུར་པ་གཉིས་པ་གང་ཞེ་ན། ཡང་དག་པ་ཇི་ལྟ་བའི་དོན་མཐོང་བའོ། །ཡང་དག་པ་མཐོང་བར་གྱུར་པས་ཀྱང་སྐྱེས་བུ་རྣམས་ཀྱིས་ཐམས་ཅད་ངེས་པར་ལེགས་པར་རྟོགས་པར་འགྱུར་ཏེ་དེ་ཁོ་ན་ཉིད་བཞིན་ཁོ་ནར་མཐོང་བར་འགྱུར་རོ། །དེ་ཁོ་ན་ཉིད་རིག་པ་དེ་ནི་བག་མེད་པའི་སྐྱོན་རྣམས་ཤེས་པར་གྱུར་ནས་བག་མེད་པས་ཀུན་དུ་བཀྲི་བར་མི་ནུས་སོ། །གཞན་ཡང་བག་མེད་པའི་གཉེན་པོ་གསུམ་པར་གྱུར་པ་རྣམས་འདི་ལྟ་སྟེ། བག་ཡོད་པ་སྟེན་པར་བྱེད་པ་གང་ཡིན་པ་དེ་དག་རྣམས་ལ་སྟེན་པར་བྱེད་དོ། །དེ་དག་རྣམས་ཀྱི་དྲུང་ནས་ཚུལ་ཁྲིམས་སྲུང་བར་བྱེད་དོ། །སྤྱོད་པ་རྣམས་རྣམ་པར་འགྲང་བར་བྱེད་དོ། །ལུས་ངག་གི་བྱ་བ་རྣམས་ཀྱང་སློབ་པར་བྱེད་དོ། །ཚུལ་ཁྲིམས་དེ་དང་མཉམ་པ་ཡོད་པ་རྣམས་དང་ལྷན་ཅིག་ཏུ་གནས་པར་བྱེད་དོ། །བག་མེད་པ་དེ་དག་ཉིད་ཀྱི་སྐྱོན་རྣམས་ཤེས་པར་གྱུར་ནས་ཡོངས་སུ་སྤོང་བར་བྱེད་པ་རྣམས་ཀྱི་ནི་མཐར་འབྲལ་བར་འགྱུར་རོ། །གཞན་ཡང་བག་མེད་པའི་གཉེན་པོར་གྱུར་པ་བཞི་པ་འདི་དག་ཀྱང་གང་ཞེ་ན་འདི་ལྟ་སྟེ། ཡེ་ཤེས་དང་ཚུལ་ཁྲིམས་དང་ལྡན་པར་གྱུར་པའི་སྐྱེས་བུ་རྣམས་ནི་རྟག་ཏུ་ཡང་དེ་ཉིད་ལ་མངོན་པར་དགའ་བར་གྱུར་པས་བག་མེད་པ་རབ་ཏུ་འཇོམས་སོ། །བག་ཡོད་པ་རབ་ཏུ་སྟེན་པར་བྱེད་དོ། །བག་མེད་པ་རབ་ཏུ་བཅོམ་པར་གྱུར་པ་དེའི་བདེ་བ་རྣམས་ཉེ་བར་འགྱུར་རོ། །སྡུག་བསྔལ་རིང་དུ་བྱས་པར་འགྱུར་རོ། །གཞན་ཡང་དེས་བག་མེད་པའི་སྐྱོན་རྣམས་མཐོང་བར་གྱུར་ཅིང་དེ་དེ་ཁོ་ན་བཞིན་དུ་བག་མེད་པ་རྣམས་སྤོང་བར་བྱེད་དོ།