།སྐྱེས་བུ་འཆི་བའི་རྒྱུ་མཚན་དང་དེ་ངན་སོང་དུ་འགྲོ་བའི་རྒྱུ་མཚན་རབ་ཏུ་འོང་བ་རྣམས་ཀྱང་ཤེས་ཏེ། ཇི་ལྟར་བདག་ངན་སོང་དུ་འགྲོ་བར་འགྱུར་རོ། །དེའི་རབ་ཏུ་བྱ་བ་རྣམས་ཀྱང་ཀུན་དུ་རིག་གོ། །དེ་ལ་ཡང་སེམས་རབ་ཏུ་དང་ངོ་། །དེའི་སེམས་བསྐྱེད་པར་གྱུར་པ་ཙམ་གྱིས་ངན་སོང་དུ་འགྲོ་བའི་རྒྱུ་མཚན་དེ་དག་ནུབ་པར་འགྱུར་རོ། །བདེ་འགྲོའི་རྒྱུ་མཚན་ཡང་རབ་ཏུ་འབྱུང་བར་འགྱུར་རོ། །མཆོག་ཏུ་གྱུར་པའི་འབྲས་བུ་དེ་དག་རྣམས་ནི་བག་ཡོད་པ་ཡིན་ནོ། །མཆོག་ཏུ་སྡུག་བསྔལ་བར་གྱུར་པའི་འཆིང་བ་རྣམས་ཐམས་ཅད་ཀྱི་དྲུང་ན་ཡང་ལྷག་པར་གྱུར་པའི་འབྲས་བུ་ཡིན་ནོ། །དེ་དག་ནི་བག་མེད་པའི་སྐྱོན་ལྔ་དང་བག་ཡོད་པའི་ཡོན་ཏན་ལྔ་ཡིན་ནོ། །དེ་ནས་དེའི་ཚེ་དུས་བཟངས་དེས། འཁོར་བ་འཇིག་གིས་གསུངས་པའི་ཚིགས་སུ་བཅད་པ་རྗོད་པར་བྱེད་པ། འདོད་པ་རྣམ་པར་སྤངས་པ་ཡི། །བག་ཡོད་སངས་རྒྱས་བསྔགས་པར་མཛད། །རྒ་དང་འཆི་བའི་ཁོག་ཙེ་ཡི། །བག་མེད་པ་ནི་བཙོག་པ་ཡིན། །བག་མེད་སྐྱེ་བོ་གྲོལ་བ་མིན། །བག་མེད་སྡུག་བསྔལ་སྐལ་ལྡན་ཡིན། །བག་མེད་འཆི་བ་དེ་དག་གི། །བློ་དམན་རྣམས་ནི་གཅོད་པར་བྱེད། །བག་ཡོད་པས་ནི་དགེ་རྣམས་ཀྱི། །ལྷ་རྣམས་ཀྱི་ནི་གནས་སུ་འགྲོ། །དེ་ཕྱིར་གང་ཞིག་བག་མེད་པ། །རྗེས་སྟེན་སླར་ཡང་ལྟུང་བ་ཡིན། །བག་མེད་སྐྱེས་བུ་ཐམས་ཅད་ནི། །དེ་ལྟར་འཁོར་བ་ལས་སྒྲོལ་མིན། །གང་གིས་ལུས་ཅན་རྣམ་བསྡམས་པའི། །བག་མེད་ཞགས་པས་ཉེར་འགྲོ་རྣམས། །དོན་མིན་དོན་དང་འདྲ་བ་དང་། །དོན་ཡང་རྟག་ཏུ་དོན་མིན་བཞིན། །བག་མེད་པ་ཡི་སྐྱེས་བུ་ནི། །ཐམས་ཅད་ཕྱིན་ཅི་ལོག་ཏུ་མཐོང་། །འཇིག་རྟེན་དོན་ཡང་མེད་པ་ལ། །ངེས་པར་ལེགས་པ་ག་ལ་ཡོད། །མཁས་པ་བློ་ཡི་ཕ་རོལ་འགྲོས། །བག་མེད་ཀུན་དུ་རབ་མི་བསྔགས། །དེ་ཕྱིར་བག་མེད་པ་ནི་མི་ཡིས་སྟེན་མི་བྱ། །དེ་ནི་ངན་སོང་རྣམས་ཀྱི་དང་པོའི་རྩེ་མོ་ཡིན། །སྐྱེ་གནས་སྟོང་དུ་འགྲོ་བར་བྱེད་པའི་སྡུག་བསྔལ་དེ། །བརྟན་པ་སྲིད་པའི་ཕ་རོལ་མཆོག་ཏུ་འགྲོ་བས་སྤོངས། །དེ་ལྟར་དུས་བཟངས་འདིས་ལྷ་བརྒྱ་སྟོང་དུ་མ་རྣམས་ཀྱིས་ཡོངས་སུ་བསྐོར་བར་གྱུར་པའི་མུ་སུ་ལུན་དྷ་དེའི་མདུན་དུ་ཆོས་བཤད་པར་གྱུར་ཏེ། གཞན་ཡང་ཕན་པ་ལ་རབ་ཏུ་ཞུགས་པར་གྱུར་ཅིང་ལྷ་དང་མི་རྣམས་ལ་ཕན་པར་འདོད་པའི་ཕྱིར་རོ། །གཞན་ཡང་མཁའ་ལྡིང་གི་རྒྱལ་པོ་དེ་ཉིད་ཀྱིས་མུ་སུ་ལུན་དྷ་ལ་ཆོས་ཀྱི་མཆོག་རྣམས་སྟོན་པར་བྱེད་དོ།