དགའ་བའི་པད་མའི་དབུས་ཀྱི་སྙིང་པོ་གང་ཡིན་པ་དེ་ལ་ཉེ་བར་གནས་ཤིང་ཆོས་ཉན་པར་འདོད་པས་ལྷན་ཅིག་སྤྱོད་པས་ཡོངས་སུ་བསྐོར་ནས་གང་ནས་བྱང་ཆུབ་སེམས་དཔའ་དུས་བཟངས་ནམ་མཁའ་ལྡིང་གི་རྒྱལ་པོ་ཡོད་པ་དེར་འོངས་པ་ཡིན་ནོ། །དེ་ནས་ནམ་མཁའ་ལྡིང་གི་རྒྱལ་པོ་བྱང་ཆུབ་སེམས་དཔའ་དེས་དེ་དག་ཉེ་བར་མཐོང་བར་གྱུར་ནས་རྩོམ་པ་ཆེན་པོས་དེ་རིངས་པར་འགྲོ་བར་བྱེད་དེ་དེ་ཡང་ངང་མོ་གཞན་དག་རྣམས་ཀྱིས་ཡོངས་སུ་བསྐོར་ཞིང་། ངང་པ་ཡང་རིན་པོ་ཆེ་བདུན་གྱི་ནོར་བུའི་ཐིག་ལེ་རྣམས་ཀྱིས་རྣམ་པར་བཀྲ་བར་གྱུར་པ་བརྒྱ་སྟོང་དུ་མས་ཡོངས་སུ་བསྐོར་ནས་ནམ་མཁའི་དཀྱིལ་དུ་འཕགས་པར་གྱུར་ནས། གང་ན་འཐབ་བྲལ་གྱི་མངའ་བདག་ཡོད་པ་དེར་ཉེ་བར་ཕྱིན་ཏོ། །ངང་པ་དེ་དག་གིས་ཀྱང་དགའ་བའི་དབྱངས་དག་ཀྱང་ཉེ་བར་བསྒྲགས་སོ། །དེ་བཞིན་དུ་ལྷ་དང་བྱའི་རྒྱལ་པོ་དག་ཕན་ཚུན་དུ་གུས་པ་དང་བཅས་པ་དང་རབ་ཏུ་འདུད་པས་ཕྱག་བྱས་ནས། སྨོན་ལམ་གྱི་དབང་གིས་འཐབ་བྲལ་གྱི་ལྷ་རྣམས་ཀྱི་བག་མེད་པ་གདུལ་བའི་དོན་དུ་སྐྱེས་པར་གྱུར་པའི་བྱང་ཆུབ་སེམས་དཔའ་དུས་བཟངས་དེས་ལྷ་རྣམས་ཀྱི་མངའ་བདག་དེ་ལ་བརྗོད་པ། རྣམ་པར་ཡངས་པའི་པད་མའི་རྫིང་བུ་གང་ཡིན་པ་འདིར་འཐབ་བྲལ་གྱི་བདག་པོ་དུས་ཤིན་ཏུ་རིང་བ་ནས་ཅི་ལ་འོངས་པ་ལགས། ངས་ཀྱང་ལྷ་གཞན་གྱི་དྲུང་ནས་ཐོས་པ་ཡང་ཇི་ལྟར། མུ་སུ་ལུན་དྷ་ནི་བག་མེད་པས་བག་མེད་པར་མི་རྒྱུ་བ་དང་ཚོགས་པ་རྒྱུ་བ་རྣམ་པར་རྒྱུ་བའི་ས་དག་ཏུ་དེ་བཞིན་གཤེགས་པ་དྲུག་གི་མཆོད་རྟེན་དེ་དག་རྣམས་ལ་འདིས་ཕྱག་བྱས་ཤིང་ལྷའི་ཚོགས་དང་བཅས་པ་རྣམས་ཀྱིས་གང་རྫུ་འཕྲུལ་གྱི་སྟོབས་ཀྱིས་མངོན་པར་བྲིས་པར་གྱུར་པའི་མདོ་དེ་དག་ཀྱང་བཀླགས་ཤིང་ལྷ་རྣམས་ལ་ཡང་ཉེ་བར་བསྟན་ནོ། །ལྷ་རྣམས་ཀྱང་ངེས་པར་བདེན་པ་ཡིན་པའི་རྒྱུ་འདིས་ང་ཁྱེད་ཀྱི་དྲུང་དུ་མ་འོངས་སོ། །ངས་རྣམ་པར་ཡངས་པའི་པད་མའི་རྫིང་དུ་འོངས་ནས་རྩེད་མོ་རྩེ་བར་བྱེད་པའི་ལྷ་གཞན་དག་རྣམས་ལ་ཆོས་བསྟན་ཏེ། དོན་དམ་པར་གྱུར་པ་ཉེ་བར་འཕེལ་བར་བྱེད་པ་དགེ་བར་གྱུར་པ་བག་མེད་པ་དང་བྲལ་བར་བྱེད་པ་པོ་ཐམས་ཅད་ལ་མཐར་ཐུག་པར་ཕན་པར་བྱེད་པར་གྱུར་པའོ། །དེ་ལ་རྒྱུ་འདི་དག་གིས་ཀྱང་ང་ལྷ་ཁྱོད་ཉིད་ཀྱི་རྩར་ང་མ་འོངས་པ་ཡིན་པར་ཤེས་པར་གྱིས་ལ་མི་དགའ་བར་མི་བྱ་བ་དང་རྗེས་སུ་མཐུན་པར་བྱ་བ་དང་ཆོས་ལ་གུས་པར་བྱ་བ་རྣམས་བྱའོ།