།དེ་ལ་རྒྱུ་འདི་དག་གིས་ཀྱང་ང་ལྷ་ཁྱོད་ཉིད་ཀྱི་རྩར་ང་མ་འོངས་པ་ཡིན་པར་ཤེས་པར་གྱིས་ལ་མི་དགའ་བར་མི་བྱ་བ་དང་རྗེས་སུ་མཐུན་པར་བྱ་བ་དང་ཆོས་ལ་གུས་པར་བྱ་བ་རྣམས་བྱའོ། །དེ་ནས་དེའི་ཚིག་འདི་དག་རྣམས་ཐོས་ནས་མུ་སུ་ལུན་དྷས་འདི་སྐད་ཅེས་སྨྲས་སོ། །དམ་པ་ཁྱོད་ཀྱི་ཡོན་ཏན་འདི་དག་ཀྱང་ཤེས་ལགས་ཀྱི་འཇིགས་པར་མ་མཛད་ཅིག །ཁྱོད་ཉིད་ནི་འཐབ་བྲལ་ན་གནས་པའི་ལྷ་འདི་རྣམས་ཐམས་ཅད་ཀྱི་ཉེ་བར་གནས་པའི་དགེ་བའི་བཤེས་གཉེན་བཅོམ་ལྡན་འདས་ལགས་ཀྱིས་མཁའ་ལྡིང་ལ་མངའ་མཛད་པའི་རྒྱལ་པོ་གཤེགས་མཛོད། གང་ན་རྣམ་པར་ཡངས་པའི་རྫིང་བུ་ཡོད་པ་དེར་བདག་ཅག་གཤེགས་སོ། །འདིར་དེ་སྐད་ཅེས་ཕན་ཚུན་དུ་བརྗོད་ནས་མཁའ་ལྡིང་གི་རྒྱལ་པོ་དེ་ཡང་འཐབ་བྲལ་གྱི་བདག་པོ་དང་ལྷ་བརྒྱ་སྟོང་དུ་མས་ཁང་བུ་རྣམས་དང་ངང་པ་དུ་མ་རྣམས་ཀྱིས་ཀྱང་ཡོངས་སུ་བསྐོར་བར་གྱུར་ནས་གང་ན་རྣམ་པར་ཡངས་པའི་པད་མའི་རྫིང་བུ་དེར་ཉེ་བར་ལེགས་པར་འགྲོ་སྟེ། ནམ་མཁའི་དཀྱིལ་ནས་རོལ་མོའི་སྒྲ་དང་རྔ་སྒྲ་དང་གླུ་དང་བཅས་པས་མཆོག་ཏུ་དགེ་བར་གྱུར་པའི་སེམས་ཀྱིས་ཀུན་ནས་བདེ་བར་གཏོགས་པའི་ཡིད་དྲི་མ་མེད་པར་གྱུར་པས། བག་དང་ལྡན་པར་རྒྱུ་བ་དང་། དེ་བཞིན་དུ་རྣམ་པ་དེ་སྲིད་ཀྱི་བག་མེད་པའི་ས་རྣམས་ལ་འཇུག་པར་འགྱུར་བའི་འོད་ཟེར་གྱི་མཆོག་དང་ལྡན་པར་གྱུར་པ་རྣམས་རྔ་སྒྲ་དང་ལྡན་པར་སོང་ནས་རྣམ་པར་ཡངས་པའི་མིང་ཅན་གྱི་རྫིང་འདིར་ཞུགས་པར་གྱུར་ཏོ། །དེ་ནས་ཕྱིན་པར་གྱུར་པ་དང་ལྷ་གཞན་ཆེས་རབ་ཏུ་དགའ་བའི་ཡིད་ཀྱིས་པད་མའི་རྫིང་བུ་དེར་རྩེད་མོ་རྩེ་བ་རྣམས་ཀུན་ནས་ལེགས་པར་མཐོང་བར་གྱུར་པས་རྩེད་མོ་རབ་ཏུ་རྩེ་བར་རྩོམ་མོ། །རྩེ་བར་གྱུར་པའི་ལྷ་དེ་དག་རྣམས་ཐམས་ཅད་ཀྱིས་ཀྱང་སྒྲ་འཐུག་པོའི་སྒྲ་ཀུན་ནས་སྒྲོགས་པར་བྱེད་པ་བཞིན་དུ་ནམ་མཁའི་དཀྱིལ་དེ་དག་རྣམས་ཐམས་ཅད་ནས་ཐོས་པར་གྱུར་ཏེ། ཐོས་ནས་ཡིད་འཕྲོག་པར་བྱེད་པ་དང་དེས་ཁྲོ་བ་མེད་པར་བྱེད་པ་དང་རྣ་བ་དང་ཡིད་འཕྲོག་པར་བྱེད་པ་རྣམས་སོ། །དེ་ནས་ཕྱིན་པར་གྱུར་པ་དེ་དག་རྣམས་ཐམས་ཅད་པད་མའི་རྫིང་བུའི་བདེ་བ་འདོད་པ་དང་ཡང་ཡུད་ཙམ་ཅིག་ཉེ་བར་བྲལ་ཞིང་དེ་དག་རྣམས་ཐམས་ཅད་སྒྲ་ཡང་མེད་པར་གྱུར་པ་དང་། རྣམ་པ་དེ་སྲིད་ཀྱི་ལྷ་རྫས་ཀྱི་ཡུལ་རྣམས་ཀྱིས་ཀྱང་ཁྲིད་པར་མ་གྱུར་ཅིང་གཡོ་བར་གྱུར་པའི་སེམས་ཀྱང་ཆོས་ལ་གུས་པས་ཀུན་ཏུ་གནས་པས་གཡོ་བ་མེད་པའི་སེམས་སུ་གྱུར་ཅིང་། ཆུའི་རྩེད་མོ་ལ་རྣམ་པར་དགའ་བ་དང་པད་མའི་རྩེ་མོ་ལ་རྣམ་པར་དགའ་བ་རྣམས་དང་ཡང་བྲལ་བར་གྱུར་པ་དང་བྱས་པར་གྱུར་པའི་ལས་རྣམས་ཆུད་མི་འཛའ་བ་ལ་ཀུན་ཏུ་བལྟས་ནས་ནམ་མཁའ་ལ་འགྲོ་བའི་རྒྱལ་པོ་དེ་ལ་འཐབ་བྲལ་གྱི་བདག་པོ་དེས་འདི་སྐད་ཅེས་སྨྲས་སོ།