།ལྷ་དེས་ལེགས་པར་བཤད་པ་དེ་དག་རྣམས་ལ་བརྩི་བགྲང་མ་བྱས་པས་དེ་བཞིན་དུ་ཡུལ་གྱིས་ཀུན་ཏུ་རྨོངས་པར་གྱུར་ནས་སླར་ཡང་དེ་ཉིད་ཀྱི་མདུན་དུ་རྩེ་བ་དང་དགའ་བ་དང་ཡོངས་སུ་སྤྱོད་པར་ཡང་བྱེད་ཅིང་། ཆུ་ལ་རྩེ་བར་བྱེད་དོ། །པད་མའི་རྫིང་བུར་ཞུགས་པར་གྱུར་ནས་པད་མ་དག་བཅད་དེ་ལྷའི་བུ་མོ་དེ་དག་དང་ལྷན་ཅིག་ཏུ་རྩེད་མོ་ཡང་རྩེ་བར་བྱེད་དེ་ལྷ་རྫས་ཀྱི་བདེ་བ་དང་ལྡན་པའི་ཡུལ་གྱིས་རྣམ་པར་རྨོངས་པའི་ཕྱིར་རོ། །ཕན་པའི་ཚིག་དེ་དག་རྣམས་ཉེ་བར་ཐོས་པར་གྱུར་ནས་ཀྱང་དགའ་བར་བྱེད་པ་ཉིད་ནི་འདོད་པའི་དབང་དུ་སོང་བའི་ཕྱིར་རོ། །དེ་ནས་ཡང་ནམ་མཁའ་ལྡིང་གི་རྒྱལ་པོ་དེ་མུན་པའི་སྣོད་ཀྱི་ལྷ་དེ་དག་རྣམས་ལ་གཞན་ཡང་རྗོད་པར་བྱེད་པ། ཇི་ལྟར་ཡུལ་འདི་དག་གིས་རྣམ་པར་རྨོངས་པར་གྱུར་པ་དེས་ན་ཕན་པའི་ཚིག་འདི་དག་རྣམས་མི་ཐོས་སོ། །མ་ཐོས་པར་གྱུར་ཡང་སོང་དང་དེ་ཤེས་པར་བྱེད་པ་འབྱུང་བར་འགྱུར་གྱིས། དེ་ལྟར་ནམ་མཁའ་ལྡིང་གི་རྒྱལ་པོ་དེས་རྗོད་པ་དང་། ལྷ་རྫས་ཀྱི་ཆེས་གཙོ་བོར་གྱུར་པ་མཆོག་ཏུ་ཡང་རྣ་བ་དང་ཡིད་འཕྲོག་པར་བྱེད་པའི་སྒྲ་དག་རིང་བ་ནས་ཐོས་པར་གྱུར་ཏོ། །ལེགས་པར་བྱས་པའི་ལས་ཆེས་ལྷག་པར་གྱུར་པའི་སྒྲ་གང་ཡིན་པ་དེས་པ་ཊ་ཧ་དང་། གླིང་བུ་དང་། པི་བང་དང་། རྔ་མུ་ར་བའི་ཚོགས་དང་ཆགས་པར་འགྱུར་བའི་གླུ་དང་རོལ་མོའི་སྒྲ་ཐམས་ཅད་ཉམས་པར་བྱེད་དོ། །དེ་ནས་ལྷ་གང་དག་རྣམ་པར་ཡངས་པའི་པད་མའི་རྫིང་བུ་ན་རྩེད་མོ་རྩེ་བར་བྱེད་པ་དེ་དག་ལས་དེ་རྣམས་ཐམས་ཅད་ཀྱང་གང་ནས་སྒྲ་ཐོས་པར་གྱུར་པ་དེར་ཁ་ཕྱོགས་ཏེ་གནས་སོ། །དེ་ནས་རིང་བ་ཉིད་ནས་འོངས་པར་གྱུར་པ་ནི་ཁང་བུ་བརྒྱ་སྟོང་གིས་ཡོངས་སུ་བསྐོར་ཅིང་ལྷ་རྫས་ཀྱི་གླུ་མཁན་གྱི་སྒྲས་ཆགས་པ་སྐྱེད་པར་བྱེད་པའི་སྒྲ་རྣམས་ཉེ་བར་བསྒྲགས་པར་གྱུར་པ་སྟེ། ཇི་ལྟར་གཟའ་དང་སྐར་མ་དང་རྒྱུན་སྐར་རྣམས་ཀྱིས་ཡོངས་སུ་བསྐོར་བའི་ཟླ་བ་རྣམ་པར་མཛེས་པ་བཞིན་དུ། དེ་ལྟར་རྣམ་པར་མཛེས་ཤིང་གསལ་བ་ཡིན་ནོ། །དེ་ལྟར་ཡང་ཁང་བུའི་ཕྲེང་བ་བརྒྱ་སྟོང་གིས་ཡོངས་སུ་བསྐོར་བར་གྱུར་པ་དང་དེའི་ལུས་ལས་ཀུན་ནས་འཕྲོ་བའི་འོད་ཟེར་གྱི་ཕྲེང་བ་རྣམས་ཀྱིས་ལྷའི་ཚོགས་ཐམས་ཅད་ཀྱི་ཡིད་འཕྲོག་པར་གྱུར་པས། མཆོག་ཏུ་གསལ་བར་བྱེད་པ་དང་ལྷ་མོ་བརྒྱ་སྟོང་གིས་ཀྱང་ཉེ་བར་གླུ་ལེན་པར་གྱུར་པས་ཤིན་ཏུ་འཐབ་བྲལ་བ་རྣམས་ཀྱི་བདག་པོ་འོངས་པར་གྱུར་ཏེ། འདབ་མ་སྟོང་ཕྲག་བརྒྱ་པ་རིན་པོ་ཆེ་སྣ་བདུན་གྱིས་ཉེ་བར་སྣང་བར་བྱེད་པ་མཆོག་ཏུ་མཛེས་པར་གྱུར་ཅིང་། དགའ་བའི་པད་མའི་དབུས་ཀྱི་སྙིང་པོ་གང་ཡིན་པ་དེ་ལ་ཉེ་བར་གནས་ཤིང་ཆོས་ཉན་པར་འདོད་པས་ལྷན་ཅིག་སྤྱོད་པས་ཡོངས་སུ་བསྐོར་ནས་གང་ནས་བྱང་ཆུབ་སེམས་དཔའ་དུས་བཟངས་ནམ་མཁའ་ལྡིང་གི་རྒྱལ་པོ་ཡོད་པ་དེར་འོངས་པ་ཡིན་ནོ།