གང་གིས་དཔེར་བྱེད་པར་གྱུར་པའི་འཇིག་རྟེན་ཀུན་ཏུ་གསལ་བར་བྱེད་པའི་ཉི་མ་ཡང་གང་དག་གིས་ཁྱད་པར་གྱིས་སྲིན་བུ་མེ་ཁྱེར་ཙམ་དུ་ཡང་མ་ཡིན་ནོ། །འོད་ཟེར་གྱི་དབང་དུ་བྱས་ནས་དེ་ལས་གཞན་པ་རྣམས་གང་དག་གིས་དཔེར་བྱེད་པ་ཡིན། དེ་ལྟར་ལྷ་རྣམས་ནི་དཔེ་མེད་པའི་ཡུལ་རྣམས་ཀྱིས་ཉེ་བར་འཚོ་བ་ཡིན་ནོ། །རོ་རྣམས་ཀྱི་ཡང་དཔེ་བྱ་བར་ནུས་པ་མ་ཡིན་ཏེ། མི་རྣམས་ཀྱི་ཡང་གང་གི་ཕྱིར་རོའི་མཆོག་ཏུ་གྱུར་པ་རྣམས་ལ་འདི་ལྟ་སྟེ། སྦྲང་རྩི་དང་བཅོས་པའི་ཆང་དང་བུ་རམ་ཤིང་དང་ཤའི་རིགས་སུ་གྱུར་པ་རྣམས་དང་སྟེ། ཤིན་ཏུ་ལེགས་པར་སྦྱར་བའི་རོ་དེ་རྣམས་ཐམས་ཅད་དང་ཡང་དག་པར་ལྡན་པས་ཀྱང་། བདུད་རྩི་དམར་པོ་དག་གི་ཁྱད་པར་གྱིས་བིམ་པའི་འབྲས་བུ་ཙམ་དང་ཡང་འདྲ་བ་མ་ཡིན་ནོ། །མི་རྣམས་ཀྱི་རོ་ཐམས་ཅད་དང་ཡང་དག་པར་ལྡན་པ་དེ་གང་གིས་དཔེར་བྱེད་པར་འགྱུར། རོའི་དབང་དུ་བྱས་ནས་ལྷ་རྣམས་ཀྱི་བཅུ་དྲུག་ཆར་ཡང་མི་ཕོད་དོ། །དྲི་རྣམས་ཀྱི་ཡང་དཔེར་བྱ་བ་ནུས་པ་མ་ཡིན་ཏེ། འདི་ན་མི་རྣམས་ཀྱི་དྲི་ཞིམ་པར་གྱུར་པ་རྣམས་ཐམས་ཅད་ལ་འདི་ལྟ་སྟེ། ཙན་དན་དང་། ཨ་ག་རུ་དང་། ཕྱེ་མ་དང་། བྱུག་པ་དང་། ནི་ཁུ་སྟི་དང་། ཙམ་པ་ཀ་དང་། ཀེ་ཏ་ཀ་དང་། ཡིད་བདེ་བའི་མེ་ཏོག་དང་། ཛཱ་ཏིའི་དྲི་དང་། དབྱར་གྱི་དུས་པ་དང་། ཨུད་པ་ལ་དང་། ཀུ་སུ་མཱ་དང་། ནི་ཙུ་ལ་ལ་སོགས་པའིའོ། །དེ་དག་རྣམས་བསྡོམས་ནས་གཅིག་ཏུ་བྱས་པས་ཀྱང་ལྷ་རྣམས་ཀྱི་མེ་ཏོག་ཐམས་ཅད་ཀྱི་ཐ་མར་གྱུར་པ་ནིམ་པའི་ལོ་མའི་བཅུ་དྲུག་གི་ཆར་ཡང་མི་ཆོག་གོ། །དེ་ལྟར་བྱས་ནས་དྲི་རྣམས་ཀྱི་དཔེར་བྱ་བར་ཡང་མི་ནུས་སོ། །ལྷ་རྣམས་ཀྱི་རེག་བྱ་ནི་དཔེ་མེད་པ་དང་ཡང་དག་པར་ལྡན་པ་ཡིན་ཏེ་ལྷ་རྣམས་ཀྱི་གང་ཡིན་པ་ལ་ནི་མི་རྣམས་ཀྱིས་རྟོགས་པའི་ཡུལ་མ་ཡིན་ནོ། །མི་རྣམས་ཀྱི་རེག་བྱ་རྣམས་ཐམས་ཅད་ཀྱི་མཆོག་ཏུ་གྱུར་པ་རྣམས་ཀྱང་འདི་ལྟ་སྟེ། སྲིན་བལ་དང་། མོན་དར་དང་། དུ་ཀུ་ལ་དང་། བལ་དང་། རས་བལ་ལ་སོགས་པ་དང་གཞན་ཡང་མི་རྣམས་ཀྱི་གང་དག་རྣམ་པ་དེ་ལྟ་བུར་གྱུར་པ་དེ་དག་ཐམས་ཅད་བསྡོམས་པར་གྱུར་པས་ཀྱང་། ལྷ་རྣམས་ཀྱི་རེག་བྱ་ཐམས་ཅད་ལས་ཐ་མར་གྱུར་པ་འདི་ལྟ་སྟེ། ལྷ་རྫས་ཀྱི་རྡོ་རྗེར་གྱུར་པའི་སྲིད་པའི་སྡུག་བསྔལ་བྱེད་པ་རྣམས་ཀྱི་ཡང་བཅུ་དྲུག་ཆར་ཕྱེ་བ་ཙམ་དུ་ཡང་མི་ཆོག་པར་འདོད་དོ། །རྒྱུ་དེས་ན་ལྷ་རྣམས་ཀྱི་རེག་བྱ་ཡང་དཔེ་མེད་པ་ཡིན་ལ་དེ་དག་ལ་ཡང་དཔེ་བྱ་བར་ནུས་པ་མ་ཡིན་ནོ། །སྒྲ་རྣམས་ཀྱང་དཔེ་མེད་པ་དང་ཡང་དག་པར་ལྡན་པས་ལྷ་རྣམས་རྒྱུ་བ་ཡིན་ནོ།