།དེ་ནས་གཞན་ཡང་དེ་དག་རྣམས་ཉིད་ཀྱི་དཀྱིལ་དུ་སོང་ནས་ལྷ་དེ་གཅིག་པུ་གླུ་ལེན་ནོ། །གླུ་ཉན་པར་ཡང་བྱེད་དོ། །རྔ་སྐད་ཡན་ལག་ལྔ་དང་ལྡན་པ་ཐམས་ཅད་ཀྱི་རྣ་བ་དང་ཡིད་འཕྲོག་པར་བྱེད་པ་གང་ཡིན་པ་ནི་དངོས་པོ་གཞན་རྣམས་ཀྱི་དཔེ་བྱ་བར་ཡང་སླ་བ་མ་ཡིན་ནོ། །དེ་དེ་ལྟར་འདོད་པའི་ཡོན་ཏན་ལྔ་ལ་ཉེ་བར་ལོངས་སྤྱོད་པར་འགྱུར་བས་ཀྱང་ངོམས་པར་འགྱུར་བ་ཡང་མ་ཡིན་ནོ། །སྲིད་པས་རྣམ་པར་གདུངས་པར་གྱུར་པའི་བསམ་པ་ཅན་རྣམས་ནི་སྲིད་པས་རྣམ་པར་ངོམས་པར་འགྱུར་བ་ཡང་མ་ཡིན་ཏེ། ཇི་ལྟར་མེ་ནི་བུད་ཤིང་རྣམས་ཀྱིས་ངོམས་པར་མི་འགྱུར་ལ་དེ་བཞིན་དུ་འདོད་པ་དང་བཅས་པས་འདོད་པ་དང་ལྡན་པ་རྣམས་རྣམ་པར་ངོམས་པ་མི་སྐྱེའོ། །དེ་དེ་ན་རྣམ་པ་དུ་མ་དང་རྣམ་པར་རྟོག་པ་དུ་མའི་བདེ་བ་རྣམས་ཉེ་བར་ལོངས་སྤྱོད་པར་གྱུར་པས་དུས་རིང་དུ་རྩེ་འཇོ་བྱས་ནས། གཞན་ཡང་ནོར་བུའི་རང་བཞིན་གྱི་ཁང་བུ་དེ་ཉིད་ཀྱིས་ངང་པའི་ནགས་དེ་ཉིད་དུ་སླར་ཡང་རབ་ཏུ་འཇུག་པར་བྱེད་དེ། ཕྱིར་བཞིན་འབྲང་བར་གྱུར་པའི་འཁོར་རྣམས་ཐམས་ཅད་དང་དེ་སོང་ནས་ཕྱིར་ཞིང་ཉིད་ཀྱང་སྔ་ན་མ་མཐོང་བའི་ཡུལ་ཕྱོགས་གཞན་རྣམས་སུ་འཇུག་པར་བྱེད་དོ། །ནགས་དེའི་དགའ་བར་གྱུར་པ་ཡང་འདི་དག་ཡིན་ཏེ། ཇི་ལྟར་བལྟས་པར་གྱུར་པ་དེ་ལྟར་ནགས་དེ་ནི་ཆེས་དགའ་བར་གྱུར་པ་ཡིན་ནོ། །དབང་པོ་རྣམས་ཀྱང་ཡུལ་རྣམས་ཀྱིས་ངོམས་པ་ཡང་མེད་དོ། །དེ་ལྟར་བྱས་པས་ནགས་དེ་དག་ནི་བལྟ་བར་ནུས་པ་ཡང་མ་ཡིན་ནོ། །དེ་བཞིན་དུ་འབབ་ཆུ་དང་རྫིང་བུ་དང་ནགས་དང་ཉེ་བའི་ནགས་དང་ཤིང་གི་ཚོགས་རྣམས་དང་ལྷ་དང་ལྷ་མོའི་ཚོགས་རྣམ་པ་དུ་མ་རྣམས་ཀྱང་དེ་ན་མཐོང་ངོ་། །དེ་ཁོ་ན་བཞིན་དུ་རྔ་སྐད་ཡན་ལག་ལྔ་དང་ལྡན་པས་རྩེ་བར་གྱུར་པས་གཞན་ཡང་མཁའ་ལྡིང་གི་རྒྱལ་པོ་དུས་བཟངས་དེ་རྣམ་པར་ཡངས་པའི་པད་མའི་རྫིང་བུ་གང་ན་གནས་པར་གྱུར་པ་དེར་ལྷའི་བུ་མོའི་ཚོགས་ཀྱིས་ཡོངས་སུ་བསྐོར་བ་དང་བཅས་ནས་དེ་དག་རྣམས་ལེགས་པར་ཉེ་བར་འགྲོ་བར་བྱེད་དོ། །དེ་ལྟར་དེས་མང་དུ་མཐོང་ངོ་། །དེ་ལྟར་དེས་ལྷའི་ཚོགས་བརྒྱ་སྟོང་དུ་མ་རྣམས་གླུ་ལེན་པར་གྱུར་པ་དང་། ལྷ་རྫས་ཀྱི་རིམ་པས་བདེ་བ་དང་། ཡང་དག་པར་ལྡན་པར་གྱུར་པ་རྣམས་མཐོང་བར་འགྱུར་རོ། །གང་དག་ལ་དཔེས་གཞལ་བར་བྱ་བ་རྣམས་ནི་ཅུང་ཟད་ཀྱང་ཡོད་པ་མ་ཡིན་ལ། གང་གིས་དཔེར་བྱེད་པར་གྱུར་པའི་འཇིག་རྟེན་ཀུན་ཏུ་གསལ་བར་བྱེད་པའི་ཉི་མ་ཡང་གང་དག་གིས་ཁྱད་པར་གྱིས་སྲིན་བུ་མེ་ཁྱེར་ཙམ་དུ་ཡང་མ་ཡིན་ནོ།