།མདོག་དུ་མར་གྱུར་པའི་འདབ་མ་དེ་དག་རྣམས་ཀྱི་དབུས་ཀྱི་སྙིང་པོ་ནི་ཉི་མ་དམར་པོ་དང་མཚུངས་པའི་ཁ་དོག་དུ་རྣམ་པར་སྣང་ངོ་། །དེ་ཡང་རྣམ་པ་སྣ་ཚོགས་པ་ཉིད་ཀྱིས་རྣམ་པ་སྣ་ཚོགས་པའི་ཁ་དོག་གིས་སྙིང་པོའི་གོང་བུ་ལ་ཁྱབ་པའོ། །འདི་ལྟ་སྟེ་སྔོན་པོ་དང་སེར་པོ་དང་དམར་པོ་དང་དཀར་པོ་དང་སྐྱ་བོ་དང་ནག་པོ་དང་སྐྱ་རེངས་ཀྱི་མདོག་རྣམས་སོ། །ཟེའུ་འབྲུའི་དབུས་ཀྱི་སྙིང་པོ་ལ་ནི་ཡིད་དུ་འོང་བར་གྱུར་པའི་དྲི་རྣམས་ཀྱིས་ལེགས་པར་གང་བ་ཡིན་ནོ། །དེ་ནས་ལྷ་དེ་དག་རྣམས་ནམ་མཁའི་དཀྱིལ་དུ་མངོན་པར་འཕགས་ནས་མཚོ་གསལ་བར་དེར་འཇུག་གོ། །ཞུགས་ནས་ཀྱང་དེ་དག་རྣམས་ལས་ཁ་ཅིག་ནི་གསེར་གྱི་སྟེང་དུ་སྡོད་དོ། །ཁ་ཅིག་ནི་པད་མ་ལ་འདུག་པར་གྱུར་ནས་ལྷ་མོ་དང་བཅས་པས་ཡོངས་སུ་བསྐོར་ནས་རྩེ་བར་བྱེད་དོ། །ཁ་ཅིག་ནི་ཨུད་པལ་ལ་ལྷག་པར་གནས་ཏེ་ལྷ་མོའི་ཚོགས་རྣམས་དང་བཅས་པས་རྩེ་བར་བྱེད་དོ། །ཁ་ཅིག་ནི་ཨུད་པལ་ལ་གནས་པར་གྱུར་ནས་ཆུ་དེ་ཉིད་ཀྱི་ནང་དུ་རྩེ་བར་བྱེད་དོ། །ཁ་ཅིག་ནི་ངང་པའི་རྒྱབ་ཏུ་ཞོན་ནས་ཆུའི་རླབས་རྣམས་ལ་རྩེ་བར་བྱེད་དོ། །ཁ་ཅིག་ནི་ཐང་ལ་གནས་པའི་ཕུག་མཆོག་རྣམས་སུ་སོང་ནས་རྗེས་སུ་སྤྱོད་པ་དང་བཅས་པ་འདོད་པའི་ཡོན་ཏན་ལྔ་ཕུན་སུམ་ཚོགས་པ་རྣམས་ལ་གླུ་དང་རྒོད་པ་དང་འགྱིང་བར་གྱུར་པས་ཁང་བུ་རྣམས་སུ་དགའ་བར་བྱེད་དོ། །ཁ་ཅིག་ནི་ཡུལ་ཕྱོགས་གཞན་དུ་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་ར་རོ་བའི་སྐྱོན་དང་བྲལ་བའི་བཏུང་བ་ཕལ་པོ་ཆེ་རྣམས་འཐུང་བར་བྱེད་དེ། རྒྱགས་པའི་ཡོན་ཏན་རྣམས་རབ་ཏུ་ཉེ་བར་གནས་པའི་མདོག་དང་རོ་དང་རེག་བྱ་ཕུན་སུམ་ཚོགས་པའོ། །ཁ་ཅིག་ནི་ནོར་བུའི་རང་བཞིན་གྱི་སྣོད་རྣམས་སུ་འཐུང་བར་བྱེད་པ་ལ་འདི་ལྟ་སྟེ། ཨིན་དྲ་ནཱི་ལ་དང་། དངུལ་དང་། གསེར་དང་། བཻ་ཌཱུརྱ་དང་། པད་མ་རཱ་ག་དང་། ཤེལ་གྱི་རང་བཞིན་རྣམས་སུའོ། །ཁ་ཅིག་ནི་ཡང་འཁོར་གཞན་རྣམས་ཀྱིས་ཡོངས་སུ་བསྐོར་ནས་པད་མའི་འདབ་མར་གསེར་གྱི་རང་བཞིན་གྱི་རྩི་འཐུང་ངོ་། །ཁ་ཅིག་ནི་ཨུད་པ་ལ་ཁ་ཟུམ་པར་གྱུར་པ་རྣམས་ཕན་ཚུན་དུ་ལེགས་པར་བརྟེན་ནས་འདབ་མ་མ་རྡོལ་བ་རྣམས་སུ་རྩི་འཐུང་སྟེ། གླུ་ལེན་པར་གྱུར་ཅིང་རོལ་མོའི་སྒྲ་རྣམས་ཀྱིས་ཀྱང་རབ་ཏུ་དགའ་བའི་ཡིད་ཅན་ནོ།