གང་ན་རིའི་མཆོག་དེའི་རྩེ་མོ་མཐོ་བ་ཡོད་པ་དེས་མཐོང་བ་ལ་ལེགས་པར་བརྟེན་ནས་ཁང་བུའི་ཕྲེང་བ་ལ་ཞོན་ཏེ་སྔ་མ་བཞིན་ནོ། །རི་དེའི་རྩེ་མོ་ལ་ཡང་ཀུན་ནས་མཐོང་ན་དགའ་བ་ཞེས་བྱ་བའི་རི་ཡོད་དེ། གང་གི་ཕྱིར་སྟོང་ཕྲག་དུ་མའི་རི་འདི་དག་ཐམས་ཅད་ཀྱི་ནང་ན་ཉེ་འཁོར་ཀུན་ལས་ཀྱང་ཆེས་མཐོ་བ་ནི་རིའི་རྩེ་མོ་དེ་ཡིན་པར་འདོད་དེ་ཀུན་ལས་ལེགས་པར་མཐོང་ངོ་། །ལྷན་ཅིག་སྤྱོད་པའི་འཁོར་དང་བཅས་པའི་ལྷ་རྣམས་ཀྱིས་སྣ་ཚོགས་པའི་གླུ་དང་རོལ་མོའི་སྒྲ་དང་གར་དང་བཅས་པ་དེ་ལ་འཁོད་པར་གྱུར་ཏོ། །ལྷ་དང་ལྷ་མོའི་ཚོགས་རྣམས་རི་དེའི་རྩེ་མོ་ལ་འཁོད་པས་ཀྱང་མཐོང་བར་གྱུར་པ་རྣམས་ལ་ལེགས་པར་བྱས་པའི་ལས་དུ་མ་རྣམས་ཀྱིས་སྤྲུལ་པར་གྱུར་པ་ཆེ་ཞིང་ཁ་དོག་དུ་མ་དང་ལྡན་པའི་མཚོ་གསལ་བར་སྣང་བ་ཞེས་བྱ་བའི་མཚོ་དེ་གསལ་བར་གྱུར་པས་མཆོག་ཏུ་དགའ་བར་གྱུར་པ། རབ་ཏུ་དང་བར་གྱུར་ཅིང་གཙང་བའི་ཆུ་ན་གསེར་གྱི་ཉ་རྣམས་ཀྱིས་གང་བར་གྱུར་པ་རླབས་ཀྱི་འགྲམ་ན་མཆོག་ཏུ་ཡིད་འཕྲོག་པའི་ངང་པ་དང་། ཀཱ་རཎ་ཌ་བ་དང་ངང་ངུར་གྱི་ཚོགས་ཀྱིས་ཀུན་ཏུ་གང་བ་བྱའི་སྐད་རྣམ་པ་སྣ་ཚོགས་པ་རྣམས་ཐོས་པར་བྲེལ་བའི་སྒྲ་སྙན་པས་གང་བ་པད་མ་དང་ཨུད་པ་ལ་དང་ཀུ་མུ་ད་དང་ནི་ན་ད་དང་པད་མ་དམར་པོའི་མེ་ཏོག་གི་དབྱིབས་ལེགས་པ་རྣམས་ལ་རྣམ་པ་སྣ་ཚོགས་པའི་བུང་བའི་ཚོགས་རྣམས་ཀྱིས་སྦེར་བར་བྱེད་པའི་སྒྲ་ཡིད་འཕྲོག་པར་གྱུར་པ་རྣམས་དང་མན་དཱ་ར་བའི་ཤིང་གིས་ཡོངས་སུ་ཁྱབ་པ་གསེར་དང་ནོར་བུའི་སྟེགས་བུ་རྣམས་ཀྱིས་ཡོངས་སུ་གང་བར་གྱུར་པ་སྟེ། རྣམ་པ་དེ་ལྟར་གྱུར་པའི་རབ་ཏུ་དང་བའི་ཆུ་མཆོག་ཏུ་དགའ་བར་གྱུར་པ་དེ་དག་ན་མཚོའི་དབུ་བ་ཞེས་བྱ་བའི་པད་མ་འདབ་མ་སྟོང་ཕྲག་བརྒྱ་དང་ལྡན་པ་འདབ་མ་དེ་དག་རྣམས་ཀྱང་ཁ་དོག་དུ་མ་སྟེ། ཁ་ཅིག་ནི་ཨིན་དྲ་ནཱི་ལ་དང་མཚུངས་པའི་ཁ་དོག་གོ། །ཁ་ཅིག་ནི་ཤེལ་དང་མཚུངས་པའི་ཁ་དོག་གོ། །ཁ་ཅིག་ནི་གསེར་གྱི་རང་བཞིན་ནོ། །ཁ་ཅིག་ནི་དངུལ་གྱི་རང་བཞིན་ནོ། །ཁ་ཅིག་ནི་མུ་སཱ་རའི་རང་བཞིན་ནོ། །ཁ་ཅིག་ནི་ཀར་ཀེ་ཏ་ནའི་རང་བཞིན་ནོ། །ཁ་ཅིག་ནི་རྡོ་རྗེའི་རང་བཞིན་ནོ། །འདབ་མ་དེ་དག་རྣམས་ནི་མཆོག་གི་དྲི་དང་ཡང་ལྡན་ནོ། །མདོག་དུ་མར་གྱུར་པའི་འདབ་མ་དེ་དག་རྣམས་ཀྱི་དབུས་ཀྱི་སྙིང་པོ་ནི་ཉི་མ་དམར་པོ་དང་མཚུངས་པའི་ཁ་དོག་དུ་རྣམ་པར་སྣང་ངོ་།