།དེ་དག་རྣམས་འཁོད་པར་གྱུར་པ་དང་དེ་ནི་བདེན་པ་ལ་འཇུག་པ་ཞེས་བྱ་བའི་བྱ་དེས་ཚིགས་སུ་བཅད་པ་བརྗོད་པ། ཇི་ལྟར། ལེགས་པར་བྱས་འབྲས་ཚོར་བར་བཅས། །མྱུར་བར་འགྲོ་ཞིང་རབ་ཏུ་འགྲོ། །ཡུལ་རྣམས་ཀྱིས་ནི་རབ་བཅོམ་པའི། །ཀུན་ཏུ་རྨོངས་པས་གོ་བའང་ཡིན། །དུས་གང་ཉིད་ནི་ལྟུང་གྱུར་པ། །དེ་ཉིད་འཆི་བའི་མཐའ་ཡིན་ནོ། །བདེ་ལ་རྨོངས་པའི་རྒྱགས་པ་ཡིས། །ལྷ་རྣམས་ཀྱིས་ནི་དེ་མི་གོ། །གསོན་པར་མྱུར་བར་འགྲོ་བ་ཡང་། །རྣམ་པར་རྨོངས་པས་མི་གོའོ། །ལེགས་བྱས་རྣམས་ནི་མཐོང་བའང་ཡིན། །སྲེད་པ་རྣམ་པར་འཇོམས་པའང་མིན། །སྲིད་ནས་སྲིད་པར་ལུས་ཅན་གྱི། །སྲེད་པ་ཕྱི་བཞིན་འབྲང་བ་ཡིན། །སེམས་ཅན་རྣམ་པར་རྨོངས་པ་ཡིས། །དགེ་དང་མི་དགེ་དེ་མི་རིག །དགེ་བའི་འབྲས་ཉིད་ཡིད་འོང་བ། །གང་གིས་སྔོན་དུ་ཉེར་ལོངས་སྤྱོད། །མི་དགེ་བ་ཡང་དེ་བཞིན་མཐོང་། །མི་དགེ་ལོག་པར་ལྟུང་བར་སྐྱེ། །དགེ་དང་མི་དགེ་རབ་ཏུ་བྲལ། །གང་གིས་འདུ་འཛིའི་སྐྱོན་རྣམས་སྤངས། །རྒ་ཤི་སྤངས་པར་གྱུར་པ་དེ། །དེ་ནི་ནགས་ཀྱི་མཆོག་ཏུ་སོང་། །དེ་ནི་རྣམ་གྲོལ་བདེ་བར་འགྲོ། །འདོད་ལས་བདེ་བ་སྲིད་མ་ཡིན། །ལྷ་གང་དེ་བཞིན་གཞན་ཡང་རུང་། །ལས་ཟད་པས་ནི་གྲོལ་བར་འགྱུར། །མི་རྟག་འགྱུར་བར་དེ་དག་ཀྱང་། །རྟག་པ་མཛེས་པར་འགྱུར་བ་ཡིན། །སྲེད་པ་མངོན་ཞེན་ལས་སྐྱེས་བདེ། །ལོག་པར་ལྟུང་མཐས་དམད་པ་ཡིན། །དེ་ལྟར་བདེན་པར་སྨྲ་བར་བྱེད་པའི་བྱ་དེ་དག་གིས་འཁོད་པར་གྱུར་པའི་ལྷ་དེ་དག་རྣམས་ལ་རྗོད་པར་བྱེད་དོ། །དེ་དག་གི་དྲུང་ནས་ཐོས་པར་གྱུར་ནས་ཀྱང་ལྷ་གང་དག་ཤིན་ཏུ་བག་མེད་པས་རྒྱུ་བ་མ་ཡིན་པ་དེ་དག་རྣམས་ཀྱིས་ནི་ཐོས་པར་འགྱུར་རོ། །གང་ཡང་བག་མེད་པར་རྒྱུ་བ་དེ་དག་རྣམས་ནི་བག་མེད་པའི་སྐྱོན་གྱིས་ཐོས་པར་མི་འགྱུར་བ་ཉིད་དོ། །ལྷ་དེ་དག་རྣམས་ཀྱི་ཡིད་ཡུལ་གྱིས་ཉེ་བར་འཕྲོགས་པར་གྱུར་པའི་ཕྱིར་ནི་ཕན་པར་གྱུར་པ་དང་དེ་ཁོ་ན་ཉིད་དུ་གྱུར་པའི་བྱ་རྣམས་ཀྱིས་བརྗོད་པ་དེ་དག་རྣམས་ཐམས་ཅད་ལ་བརྩི་བགྲང་དུ་མི་བྱེད་པར་སླར་ཡང་དེ་ཁོ་ན་བཞིན་དུ་ཆེས་རབ་ཏུ་དགའ་བར་གྱུར་པས། གང་ན་རིའི་མཆོག་དེའི་རྩེ་མོ་མཐོ་བ་ཡོད་པ་དེས་མཐོང་བ་ལ་ལེགས་པར་བརྟེན་ནས་ཁང་བུའི་ཕྲེང་བ་ལ་ཞོན་ཏེ་སྔ་མ་བཞིན་ནོ།