།དེ་ནས་མུ་སུ་ལུན་དྷ་ལ་སོགས་པའི་ལྷ་དེ་དག་རྣམས་འདོད་པ་ལ་མཆོག་ཏུ་ཡིད་བྱུང་བར་གྱུར་པས་འདོད་པ་རྣམས་མ་ཡིན་ཞིང་འདོད་པའི་མཐའ་ལ་ཡང་མི་འཇུག་གོ། །བཅོམ་ལྡན་འདས་དང་བཅོམ་ལྡན་འདས་ཀྱི་མཆོད་རྟེན་དེ་ལ་ཡང་རབ་ཏུ་དང་བའི་ཡིད་དང་ལྡན་པའི་མགོ་བོས་ཕྱག་འཚལ་ནས་ཐམས་ཅད་ཇི་ལྟར་འོངས་པ་དེ་ལྟར་ཕྱིར་སོང་ངོ་། །བཅོམ་ལྡན་འདས་འོད་སྲུང་གི་མདོ་རྫོགས་སོ།། །།མདོ་དྲུག་པ་དང་ཚོགས་པ་རྒྱུ་བ་ན་རྣམ་པར་རྒྱུ་བའི་ས་ཡང་རྫོགས་སོ།། །།དེ་ནས་ལྷ་དེ་དག་རྣམས་བཅོམ་ལྡན་འདས་འོད་སྲུང་གི་མཆོད་རྟེན་དེ་ལས་ཕྱིར་འོངས་པར་གྱུར་པ་གང་གི་ཚེ་དེ་མུ་སུ་ལུན་དྷ་ལ་འདྲིའོ། །ལྷ་ཇི་ལྟར་རྣམ་པ་གང་གིས་ཁྱོད་ཀྱིས་མཆོད་རྟེན་དེ་མཐོང་། དེ་ནས་ལྷ་དེ་རྣམས་ཀྱི་དྲུང་ནས་ཐོས་པར་གྱུར་ནས་མུ་སུ་ལུན་དྷ་དེས་འདི་སྐད་ཅེས་སྨྲས་ཏེ། ངས་རྣམ་པ་གང་དག་དང་། རྒྱུ་མཚན་དང་བཅས་པས་མཆོད་རྟེན་དེ་དག་མཐོང་བར་གྱུར་པ་ཇི་ལྟ་བ་བཞིན་དུ་མཉན་པར་གྱིས་ཤིག། དེ་ལ་སྔོན་ལྷའི་འཇིག་རྟེན་དུ་ང་སྔོན་སྐྱེས་ནས་བག་མེད་པ་སྤྱོད་པ་ཡུལ་ལ་ཆེད་ཆེར་བྱེད་པ་འདོད་པ་ལྔའི་ཞགས་པས་ཀུན་ནས་བཅིངས་པར་གྱུར་པས་ངས་འཐབ་བྲལ་དེ་དག་རྣམས་ཐམས་ཅད་ཕྱིར་ཞིང་ལྟ་བར་བྱེད་དེ། རྩེ་བར་གྱུར་ཅིང་འདོད་པའི་ཡོན་ཏན་ལྔ་དང་བཅས་ཤིང་ཡང་དག་པར་ལྡན་པས་རྩེ་བ་དང་ཀུན་ཏུ་སྤྱོད་པར་བྱེད་དེ། ནགས་ནས་ནགས་དང་། རི་བོའི་ངོས་ནས་རི་བོའི་ངོས་རྣམས་དང་པད་མའི་རྫིང་བུ་ནས་པད་མའི་རྫིང་བུ་དང་། བུང་བ་རྒྱ་ཆེ་བ་ནས་བུང་བ་རྒྱ་ཆེ་བར་ལྷ་མོ་བརྒྱ་སྟོང་དུ་མས་ཡོངས་སུ་བསྐོར་བ་དེ་བཞིན་དུ་རྒྱན་དང་ཆ་བྱད་དང་ལྡན་པའི་ལྷ་བརྒྱ་སྟོང་གིས་ཀུན་དུ་གང་བར་གྱུར་པས་མདུན་ན་གར་བྱེད་པར་གྱུར། གླུ་ལེན་པར་གྱུར། རྒོད་པར་བྱེད་པར་གྱུར། འགྱིང་བར་བྱེད་པར་གྱུར་པས་ཡོངས་སུ་བསྐོར་བས་ལྷའི་འཇིག་རྟེན་འདི་ཐམས་ཅད་དུ་བདག་ཅག་འགྲོ་སྟེ། ཡུལ་རྣམས་ལ་དད་ཆེ་བར་གྱུར་པ། འདོད་པའི་ཡོན་ཏན་ལྔ་ལ་དགའ་བའི་སྲེད་པས་འཁྲིད་པར་གྱུར་པ་སྟེ། དེ་ལ་དེ་དག་ངོམས་པ་མེད་པར་གྱུར་ནས་འགྲོ་བ་དང་། སྤྱོད་པར་བྱེད་པའི་འགྲོས་ཐོགས་པ་མེད་པར་གྱུར་པ་ལ་འདི་ལྟ་སྟེ། ཆུ་ལ་ངང་པའི་རྒྱབ་ནས་ངང་པའི་རྒྱབ་དང་། ཀཱ་རཎ་ཌ་བའི་རྒྱབ་ནས་ཀཱ་རཎ་ཌ་བའི་རྒྱབ་དང་། བལ་ལཱི་ནིའི་རྒྱབ་ནས་བལ་ལཱི་ནིའི་རྒྱབ་དང་། པད་མའི་ནང་ནས་པད་མའི་ནང་དང་།