པད་མའི་ནང་ནས་པད་མའི་ནང་དང་། རླབས་ནས་རླབས་གཞན་རྣམས་ལ་ཡང་ང་རྩེ་བར་བྱེད་དེ། ཇི་ལྟར་འདོད་པར་འདོད་པ་རྣམས་ལ་སྤྱོད་པ་ཐམས་ཅད་དུ་འབྱིང་བ་མེད་པར་འགྲོ་བ་ཐམས་ཅད་དུ་འགྱིང་བ་དང་། རྒོད་པ་དང་བཅས་པ་མཆོག་ཏུ་དགའ་བའི་ཡིད་ཀྱིས་བདག་རྒྱུའོ། །དེ་བཞིན་དུ་ཡང་བདག་གལ་ཏེ། དགའ་བ་བརྒྱས་རྩེ་བའི་དབང་དུ་བྱས་ནས་བདག་ཉིད་རང་ཐང་གི་གཤོང་ན་ལེགས་པར་གནས་པར་གྱུར་པ་ལ་ལྷ་བརྒྱ་སྟོང་གིས་ཡོངས་སུ་བསྐོར་ནས་བདག་རྩེ་སྟེ། རི་ནས་རི། རི་བོའི་རྩེ་ནས་རི་བོའི་རྩེ། ཕུག་ནས་ཕུག་ཏུ། སྐྱེད་མོས་ཚལ་ནས་སྐྱེད་མོས་ཚལ། རི་ཁྲོད་ནས་རི་ཁྲོད་དུའོ། །དེ་ཁོ་ན་བཞིན་དུ་ང་ཐམས་ཅད་དུ་ཐོགས་པ་མེད་པར་འགྲོ་བས་རྣམ་པར་སྤྱོད་པ་ཡིན་ནོ། །དེ་བཞིན་དུ་ནམ་མཁའ་ལ་ཡང་ཁང་པ་བརྒྱ་སྟོང་གིས་ཡོངས་སུ་བསྐོར་བར་གྱུར་ནས་ལྷ་བརྒྱ་སྟོང་གིས་གང་བས་རོལ་མོའི་སྒྲ་དང་། གར་དང་། གླུ་དང་། དགོད་པ་དང་། འགྱིང་བ་དང་། ལྷན་ཅིག་ཏུ་ལྷའི་འཇིག་རྟེན་འདི་མ་ལུས་པར་རྩེ་བར་གྱུར་པས་མཐོང་སྟེ། ཡུལ་གྱི་ཆ་དཔེ་མེད་པར་གྱུར་པ་རིན་པོ་ཆེ་བདུན་དང་ལྡན་པ་དེའི་འོད་ཀྱིས་ཉེ་བར་མཛེས་པར་གྱུར་པའི་ཡུལ་གྱི་ཆ་དང་། དེ་བཞིན་དུ་རིའི་རྩེ་མོ་རྣམས་ལས་གཞན་དུ་ཡང་མཐོང་བ་པད་མ་བརྒྱ་སྟོང་དུ་མ་སྐྱེས་པའི་ཀླུང་རྣམས་ཀྱིས་ལེགས་པར་རྣམ་པར་ཕྱེ་བའི་ཕྱོགས་ཀྱི་ཆ་དང་། དེ་ཁོ་ན་བཞིན་དུ་ངས་ཡང་མཐོང་བ་ལྷའི་ཚོགས་ཀྱིས་ཡོངས་སུ་བསྐོར་བར་གྱུར་ནས་ནམ་མཁའི་དཀྱིལ་ན་ལེགས་པར་གནས་པ། འདོད་པའི་ཡོན་ཏན་ཐམས་ཅད་དང་ལྡན་པ། ལྷའི་འཇིག་རྟེན་འདི་རྒྱ་ཆེན་པོར་ཁང་བུ་བརྒྱ་སྟོང་གིས་ཡོངས་སུ་བསྐོར་བར་གྱུར་ནས་ཐམས་ཅད་ལ་ཀུན་ཏུ་ཐོགས་པ་མེད་པར་ང་འགྲོ་བར་བྱེད་དེ། ཆུ་དང་ཐང་དང་། དེ་བཞིན་དུ་ནམ་མཁའ་དང་གསུམ་ལ་ཡང་དེ་ལྟར་རྩེ་བར་གྱུར་པ་ན་འགའ་ཞིག་ན་བདག་གིས་རིང་བ་ནས་མཐོང་བར་གྱུར་པ་ལ་འོད་ཟེར་དེ་དག་རྣམས་ཐམས་ཅད་ཟིལ་གྱིས་གནོན་པར་བྱེད་པའི་འོད་ཟེར་དྲུག་གི་རང་བཞིན་གྱི་རིར་གྱུར་པ། ནམ་མཁའི་དཀྱིལ་བརྟོལ་བར་གྱུར་ནས་རབ་ཏུ་འབར་བར་བྱེད་དེ། དེ་ལས་ངའི་ངོ་མཚར་བ་འཕངས་པའི་ཡིད་མཉམ་པར་མ་བཞག་པར་གྱུར་པས་འདི་སྙམ་དུ་སེམས་པར་གྱུར་ཏེ། རྨད་དུ་བྱུང་བ་གཞན་འདི་དག་རྣམས་ཅི་ཞིག་མཐོང་བར་གྱུར་ན་ང་རང་ཁང་བུའི་ཕྲེང་བ་རྣམས་ཀྱིས་ཡོངས་སུ་བསྐོར་བར་གྱུར་པས་རིངས་པ་ཉིད་དུ་ནམ་མཁའ་ལས་གང་ནས་འོད་ཟེར་དྲུག་པོ་དེ་དག་མཐོང་བར་གྱུར་པ་དང་དེར་ཕྱིན་པར་འགྱུར་རོ།