།དེ་ལ་རྣམ་པ་དེ་ལྟ་བུའི་ཚུལ་ཁྲིམས་རྣམས་ཡོངས་སུ་སྤངས་ནས་གང་ལྷར་སྐྱེས་པར་གྱུར་པ་རྣམས་ནི་མཆོག་ཏུ་བག་མེད་པར་རྒྱུ་བར་འགྱུར་རོ། །དེ་ཡང་ལྷའི་འཇིག་རྟེན་རྣམས་ལས་ཉམས་ནས་དེད་དཔོན་གྱི་མཆོག་ལས་དེ་བཞིན་དུ་དེད་དཔོན་དམྱལ་བ་དང་། ཡི་དགས་དང་། དུད་འགྲོའི་འགྲོ་བ་རྣམས་སུ་སྐྱེ་བར་འགྱུར་བས་ཤིན་ཏུ་སྡུག་བསྔལ་བར་གྱུར་པའི་འགྱོད་པའི་མེས་སྲེག་པར་བྱེད་དོ། །འདི་ལ་སྐྱོབ་པར་བྱེད་པ་རྣམས་ཀྱང་འགའ་ཞིག་ཀྱང་མེད་དོ། །བག་མེད་པར་གྱུར་པ་བརྒྱའི་བག་མེད་པ་རྣམས་ཀྱིས་ཉེ་བར་བཅོམ་པར་གྱུར་པས་འགྱོད་པའི་མེས་བསྲེགས་པར་གྱུར་ནས་དམྱལ་བ་དང་། ཡི་དགས་ཀྱི་ས་གཞིར་སྐྱེ་བར་འགྱུར་རོ། །དེའི་ཕྱིར་ཇི་སྲིད་དུ་འཆི་འཕོ་བའི་དུས་ཀྱི་སྣང་བ་འོངས་པར་མ་གྱུར་པ་དེ་སྲིད་དུ་དམ་པའི་ཆོས་ཡིད་ལ་བྱ་བའི་སྟེང་དུ་ཡང་སངས་རྒྱས་དགྲ་བཅོམ་པ་རྣམས་ཐམས་ཅད་ཀྱི་བསྟན་པ་གང་ཡིན་པ་འདི་ལ་དེ་དག་རྣམས་ཐམས་ཅད་ཉི་མ་རེ་རེ་ཞིང་ལན་ཅིག་མ་ཡིན། ཕྱོགས་གཅིག་མ་ཡིན་པར་བྱ་བ་ཁོ་ནའོ། །བག་མེད་པས་མཆོག་ཏུ་བག་མེད་པར་གྱུར་པ་གང་ཡིན་པའི་ལྷ་དེ་དག་རྣམས་ལྷར་སྐྱེས་པར་གྱུར་པ་ནི་མིར་གྱུར་པ་ཐམས་ཅད་ཀྱིས་ཀྱང་ཚུལ་ཁྲིམས་ལེགས་པར་བསྒོམས་ཤིང་ལེགས་པར་ལས་སུ་བྱས་པ་དང་། སེམས་བཟང་པོར་བྱས་པར་གྱུར་པས་དེ་ཤི་ནས། སྐྱེས་བུ་ལུས་ཞིག་པར་གྱུར་ཏེ། ཤི་བའི་འོག་ཏུ་ལྷ་རྣམས་སུ་སྐྱེའོ། །ཅི་བདག་ཅག་རྣམས་ལས་ཆུང་ངུན་གྱིས་སྐྱེས་པ་ཞིག་ཡིན་ནམ་ཞེས་དེ་ལྷ་རྣམས་ཀྱིས་ཤེས་པ་མ་ཡིན་པ་དེ་དག་བསྟན་པར་བྱ་བའི་དོན་དུ་ཆོས་བཅུ་གསུམ་པོ་འདི་གསུངས་པ་ཡིན་ནོ། །མིའི་འཇིག་རྟེན་པའི་སྐྱེས་བུ་རྣམས་དང་ལྷ་རྣམས་ཕན་ཚུན་དུ་རྒྱུར་གྱུར་པ་ཡིན་ཏེ། ལྷ་རྣམས་དང་སྐྱེས་བུ་རྣམས་ཀྱང་ཚུལ་ཁྲིམས་དང་ལྡན་པ་ནི་ཤི་ནས་ལྷར་སྐྱེའོ། །ལྷའི་བག་མེད་པ་རྣམས་ཤི་འཕོས་ནས་མི་རྣམས་སུ་སྐྱེའོ། །དེ་ལ་རྒྱུ་འདི་དག་རྣམས་ཀྱིས་ལྷ་དང་མི་རྣམས་ལ་ཕན་པ་དང་། བདེ་བ་དང་། མཐར་མྱ་ངན་ལས་འདའ་བར་འགྱུར་བ་དང་། འཇིག་རྟེན་པའི་ཕན་པ་རྣམས་ཀྱང་མཛད་པའི་བཅོམ་ལྡན་འདས་འོད་སྲུང་དེས་མདོ་འདི་དག་གསུངས་པ་ཡིན་ནོ། །དེ་ནས་མུ་སུ་ལུན་དྷ་ལ་སོགས་པའི་ལྷ་དེ་དག་རྣམས་འདོད་པ་ལ་མཆོག་ཏུ་ཡིད་བྱུང་བར་གྱུར་པས་འདོད་པ་རྣམས་མ་ཡིན་ཞིང་འདོད་པའི་མཐའ་ལ་ཡང་མི་འཇུག་གོ།