།དེ་ཕྱིར་སྐྱོན་གཞོམ་རྗེས་སུ་བཙལ། །ཤེས་དང་ཚུལ་ཁྲིམས་རྟག་བསྒོམས་པས། །ལུས་ཅན་རྣམས་ཀྱི་བཅུ་གསུམ་པོ། །རྩ་བ་མེད་པར་ཀུན་རབ་འཇོམས། །ཡེ་ཤེས་མེས་ནི་ཉོན་མོངས་པའི། །བུད་ཤིང་ཆེན་པོ་ཆེར་འབར་བྱེད། །དེ་ལྟར་ཀུན་དུ་འདྲེ་བར་གནས་པ་རྣམས་ནི་ཐམས་ཅད་ཀྱིས་གནས་སྐབས་ཐམས་ཅད་དུ་མི་བྱའོ། །ཁྱིམ་གྱི་གནས་ལས་ངེས་པར་བྱུང་བ་གཅིག་ཏུ་རྒྱུ་བར་གྱུར་པའི་དགེ་སྦྱོང་རྣམས་ཀྱིས་ཀུན་ཏུ་རྟོག་པའི་རང་བཞིན་ཅན་དུ་མི་བྱའོ། །ལེ་ལོ་ཅན་དུ་མི་བྱའོ། །གྲོང་དང་། གྲོང་ཁྱེར་དང་། གྲོང་ཆུང་དང་། ཚོང་འདུས་རྣམས་ཉམས་སུ་མྱོང་བར་བྱེད་པའི་རྣམ་པར་རྟོག་པའི་རང་བཞིན་ཅན་དུ་མི་བྱའོ། །སྤྲོ་བ་ཆེན་པོར་གྱུར་པས་ལྷན་ཅིག་ཏུ་གནས་པ་དང་། ལྟ་བ་ལ་ཆེད་ཆེར་མི་བྱ། སློབ་མ་སྡུད་པ་ལ་ཆེད་ཆེར་མི་བྱའོ། །སྡིག་པའི་གྲོགས་པོ་དང་འགྲོགས་པའི་རང་བཞིན་ཅན་དུ་མི་བྱའོ། །སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་ལ་ཆེད་ཆེ་བར་གྱུར་ནས་མངོན་པར་ཞེན་པས་ཀུན་ཏུ་ཆགས་པར་གྱུར་པའི་སེམས་སུ་མི་བྱའོ། །འགྲོ་བ་དང་སྤྱོད་པ་རྣམས་ཀུན་དུ་མ་བསྡམས་པར་མི་བྱའོ། །སེམས་ཤིན་ཏུ་མྱུར་བར་བརྐམ་པར་མི་བྱའོ། །བསོད་སྙོམས་དང་། མལ་ཆ་དང་། སྟན་དང་། ནད་ཀྱི་རྐྱེན་སྨན་དང་། ཡོ་བྱད་རྣམས་ལ་མངོན་པར་དགའ་བར་མི་བྱའོ། །ཆོས་གོས་བཀྲ་བ་དང་། འཇོ་སྒེག་དང་། ཁྲུས་དང་། མཉེ་བསུག་དང་། སྒེག་ཆོས་སུ་བརྗོད་པའི་རང་བཞིན་ཅན་དུ་མི་བྱའོ། །ཐོག་མ་མེད་པའི་དུས་ནས་མུན་པའི་ཚོགས་སུ་གྱུར་པའི་ཉོན་མོངས་པའི་ཚོགས་འདི་དག་རྣམས་བསྲེག་པར་བྱ་ནུས་པ་མ་ཡིན་ན། ཀྱེ་མ་ཤིན་ཏུ་སྡུག་བསྔལ་བར་འགྱུར་བའི་འཁོར་བ་གང་ཡིན་པ་འདིར་འགྲོ་བ་ལྔའི་སྒོར་ཡུལ་དྲུག་གི་འོད་ཟེར་གྱི་རྣམ་པར་རྟོག་པས་སྡུག་བསྔལ་འབྱུང་བར་འགྱུར་བས་དེ་དག་རྣམས་དམྱལ་བ་དང་། ཡི་དགས་དང་། དུད་འགྲོ་རྣམས་སུ་ཉི་མ་རེ་རེ་ཞིང་བྱིས་པའི་སྐྱེ་བོ་འདི་དག་ཐམས་ཅད་ཐམས་ཅད་དུ་འཚེད་པར་བྱེད། སྲེག་པར་བྱེད། རྣམ་པར་རླག་པར་བྱེད་པས་སྡུག་བསྔལ་གྱི་རྒྱ་མཚོ་རྣམས་སུ་ལྷུང་བར་གྱུར་ཅིང་ཡང་དང་ཡང་དུ་དེ་ལྟར་འཇུག་པར་འགྱུར་ཡང་སྐྱོ་བ་སྐྱེ་བར་འགྱུར་བ་ཡང་མ་ཡིན་ནོ། །དེ་ལ་རྣམ་པ་དེ་ལྟ་བུའི་ཚུལ་ཁྲིམས་རྣམས་ཡོངས་སུ་སྤངས་ནས་གང་ལྷར་སྐྱེས་པར་གྱུར་པ་རྣམས་ནི་མཆོག་ཏུ་བག་མེད་པར་རྒྱུ་བར་འགྱུར་རོ།