།སླར་ཡང་དེ་ཟད་ནས་ལན་གྲངས་གཞན་ལ་མྱོང་བར་འགྱུར་བའི་ལས་ཉེས་པར་བྱས་པས་ཀྲི་ཀ་ལཱ་ཤར་སྐྱེས་སོ། །དེས་སྐྱེ་བ་གཞན་གང་ཡང་རུང་བ་ཞིག་ཏུ་ལོག་པར་ལྟ་བས་ཉམས་པར་གྱུར་པས་ཀྲི་ཀ་ལཱ་ཤ་མཆོད་སྦྱིན་དུ་བསྲེགས་སོ། །དེ་རྒྱུ་དེ་དང་རྐྱེན་དེས་དམྱལ་བར་སྐྱེས་སོ། །དེའི་ལྷག་མ་རྣམས་ཀྱིས་སླར་ཡང་ཀྲི་ཀ་ལཱ་ཤའི་སྐྱེ་གནས་སུ་སྐྱེས་པར་གྱུར་ཏོ། །དེའི་རྗེས་ལ་ལྷ་རྫས་ཀྱི་ཡུལ་རྣམས་ལ་ཉེ་བར་ལོངས་སྤྱད་ནས། རབ་ཏུ་གསལ་བ་ཞེས་བྱ་བའི་དབང་པོ་གཞན་འཆི་འཕོ་བར་གྱུར་ནས་རབ་ཏུ་ལྟུང་བར་འགྱུར་བ་མཐོང་བ་ལ་དེས་མ་དང་ཕ་དག་ནད་པར་གྱུར་པའི་གཡོག་བྱས་སོ། །རྒྱུ་དེས་དེ་སུམ་ཅུ་རྩ་གསུམ་གྱི་དབང་ཕྱུག་དང་ལྡན་པའི་དབང་པོར་ལེགས་པར་སྐྱེས་སོ། །ཡང་ལས་དེ་ཟད་ནས་ཡི་དགས་སུ་སྐྱེས་སོ། །དེས་སྐྱེ་བ་གཞན་གང་ཡང་རུང་བ་དག་ཏུ་དགོན་པར་ཤིན་ཏུ་མི་རིགས་པ་ཆེན་པོས་འབྲུ་བཙོངས་ནས་བསླུས་པར་གྱུར་པ་གང་ཡིན་པ་དང་། ཡིད་ཀྱིས་ཀྱང་སླར་ཡང་དེ་བཞིན་དུ་མུ་གེ་དྲག་པོ་བསམས་པར་གྱུར་ཏོ། །དེ་རྒྱུ་དེ་དག་རྣམས་ཀྱིས་དམྱལ་བ་ཐིག་ནག་ཏུ་སྐྱེས་སོ། །དེའི་ལྷག་མ་རྣམས་ཀྱིས་ཀྱང་ཡི་དགས་ཁབ་ཀྱི་མགྲིན་པ་ལྟ་བུར་སྐྱེས་སོ། །གཞན་ཡང་འཐབ་བྲལ་གྱི་ལྷ་དེ་རྣམས་ཉིད་ཀྱིས་མཐོང་བར་གྱུར་པ་རྣམས་ལས་གཞན་པ་རྣམ་པ་དུ་མར་གྱུར་པའི་འཁོར་བའི་སྡུག་བསྔལ་རྣམ་པ་མང་པོ་རྣམས་ཤིན་ཏུ་ལེགས་པར་སྐྱེས་པའི་ཡིད་ཀྱིས་མཐོང་བར་གྱུར་པ་ལས་ཇི་སྲིད་དུ་འཐུན་པར་བྱེད་པ་ཞེས་བྱ་བའི་བརྒྱ་བྱིན་མཐོ་རིས་ནས་རབ་ཏུ་འཆི་འཕོས་ནས་ཕག་མོའི་སྐྱེ་གནས་སུ་སྐྱེས་པར་གྱུར་པ་མཐོང་ངོ་། །དེའི་ལེགས་པར་བྱས་པའི་ལས་རྣམས་ཀྱང་མཐོང་སྟེ། གང་བརྒྱ་བྱིན་དུ་སྐྱེས་པར་གྱུར་པ་དེས་སྐྱེ་བ་གཞན་གང་དག་ཏུ་ཤིན་ཏུ་ང་རྒྱལ་ཅན་གྱི་བྲམ་ཟེ་ལོག་པར་ལྟ་བའི་མཆོག་གིས་ཉེ་བར་སྨྲས་པར་གྱུར་པ་ལ་འཐུན་པར་སྨྲས་ནས་ཟས་དང་སྨན་དག་བྱིན་ནོ། །སྲོག་གཅོད་པ་ལས་ཀྱང་བསླབ་པའི་གཞི་བླངས་པར་གྱུར་ཏོ། །རྒྱུ་དེ་དག་དང་། རྐྱེན་དེ་དག་དང་། གཞི་དེ་དག་ལས་དེ་ལུས་ཞིག་པ་ན་མཐོ་རིས་བདེ་འགྲོ་སུམ་ཅུ་རྩ་གསུམ་པའི་འཇིག་རྟེན་དུ་སྐྱེས་སོ། །དེ་ལས་དེ་དག་རྣམས་ཡོངས་སུ་ཟད་ཅིང་ཉམས་པར་གྱུར་ནས་ཕག་གི་མངལ་དུ་སྐྱེས་སོ།