།དེ་ལས་དེ་དག་རྣམས་ཡོངས་སུ་ཟད་ཅིང་ཉམས་པར་གྱུར་ནས་ཕག་གི་མངལ་དུ་སྐྱེས་སོ། །དེའི་ལེགས་པར་བྱས་པའི་ལས་རྣམས་ནི་གང་དག་ཡིན་ཞིང་ལེགས་པར་བྱས་པའི་ལས་ཀྱིས་ཀྱང་དེར་སྐྱེས་པ་དང་། མིང་ཡང་ཅིར་བཏགས་ཞེ་ན། སུ་མ་ནྱུམ་ཞེས་བྱ་བའི་དབང་པོ་དེས་སྐྱེ་བ་གཞན་གང་ཡང་རུང་བ་ཞིག་ལ་གཞན་གང་ཡང་རུང་བ་ཞིག་སེང་གེའི་ལག་ཏུ་སོང་ཞིང་སྲོག་ཐེ་ཙོམ་དུ་གྱུར་པ་ལ་སྙིང་རྗེའི་སྣོད་དུ་གྱུར་པའི་ཡིད་ཀྱིས་རབ་ཏུ་གྲོལ་བར་བྱས་ནས་དུས་ཕལ་པོ་ཆེར་ཟས་དང་སྐོམ་རྣམས་ཀྱིས་ལེགས་པར་གསོས་པར་གྱུར་པ་དེ་རྒྱུ་དང་རྐྱེན་དེས་སུ་མ་ནྱུམ་ཞེས་བྱ་བའི་དབང་པོར་གྱུར་ཏོ། །དེ་ལས་ཀྱང་འཕོས་ནས་རབ་ཏུ་ཚ་བའི་དམྱལ་བར་སྐྱེས་སོ། །དེས་སྐྱེ་བ་གཞན་ཞིག་ལ་རྒྱལ་པོའི་ནང་དུ་སོང་བར་གྱུར་པ་ན་བརྫུན་དུ་སྨྲས་པའི་རྒྱུ་དེ་དང་རྐྱེན་དེ་དག་རྣམས་ཀྱིས་དམྱལ་བར་སྐྱེས་སོ། །དེ་འཆི་འཕོས་པར་གྱུར་ནས་སྤྲུལ་པའི་བརྒྱ་བྱིན་ཞེས་བྱ་བ་དབང་པོ་གཞན་མཐོང་བར་གྱུར་ཏོ། །དེའི་ཡང་ལེགས་པར་བྱས་པའི་ལས་རྣམས་ལ་ཀུན་ཏུ་ལྟ་བར་བྱེད་པ་ལ་ཤེས་རབ་ཅན་དེས་མཉམ་པར་བྱས་ནས་མཆོད་སྦྱིན་གྱི་གནས་སུ་བླ་མ་རྣམས་ལ་སྦྱིན་པ་བྱིན་ནོ། །དེ་རྒྱུ་དེས་ཀཽ་ཤི་ཀ་ཞེས་བྱ་བའི་དབང་པོར་གྱུར་ཏོ། །གཞན་དུ་ཡང་འདིས་ལེགས་པར་བྱས་པའི་ལས་རྣམས་མང་དུ་བྱས་ཏེ། དེ་ལས་དེ་དག་རྣམས་ཀྱི་རྐྱེན་གྱིས་དབང་པོར་འབྱུང་བར་འགྱུར་ཏེ་རིགས་གཉིས་པའི་དབང་པོའོ། །སླར་ཡང་སྟན་དེ་ཉིད་ལ་དབང་པོར་འབྱུང་བར་འགྱུར་ཏེ། བཅོམ་ལྡན་འདས་ཤཱཀྱ་ཐུབ་པའི་བསྟན་པའི་མཐུས་དེ་ངན་འགྲོ་རྣམས་སུ་འགྲོ་བར་འགྱུར་བར་མ་མཐོང་ངོ་། །ལྷ་ལས་འཆི་འཕོས་ནས་མིར་སྐྱེ་བར་འགྱུར་རོ། །འདི་ནི་ལན་བདུན་བསྐོར་བ་ཡིན་གྱི་དེའི་འགྲོ་བ་འདི་དག་ལས་མེད་པ་ཡིན་པར་མཆོད་རྟེན་གྱི་ལོགས་དེ་ལ་འཐབ་བྲལ་གྱི་ལྷ་རྣམས་ཀྱིས་མཐོང་ངོ་། །དེ་ནས་དེ་དག་རྣམས་མཆོག་ཏུ་ངོ་མཚར་བ་སྐྱེས་པར་གྱུར་པ་ཡིན་ནོ། །བརྒྱ་བྱིན་དེ་དག་རྣམས་ཐམས་ཅད་ལྷག་མ་མ་ལུས་པའི་འགྲོ་བ་མཆོད་རྟེན་འདིའི་རྩིག་པ་ལ་མཐོང་བ་ལ་ཀཽ་ཤི་ཀ་གཅིག་པུའི་ངན་འགྲོ་མ་དམིགས་སོ། །འདིའི་རྒྱུ་ཅི་ཞིག་ཡིན་ན། དེ་ནས་འཐབ་བྲལ་གྱི་ལྷ་དེ་དག་རྣམས་ཐམས་ཅད་འཐབ་བྲལ་གྱི་བདག་པོ་མུ་སུ་ལུན་དྷ་དེ་ལ་ལྟའོ།