།གལ་ཏེ་ལྷ་རྣམས་ཉིད་ལས་ཤི་འཕོས་ནས་ལྷ་རྣམས་ཉིད་དུ་སྐྱེས་ན། དེ་ན་གནས་པ་ཉིད་ན་སྡུག་བསྔལ་ཡིན་ནོ། །འདི་ལྟ་སྟེ། འཆི་འཕོ་བ་དང་སྐྱེ་བས་བྱས་པ་རྣམས་དང་། རྣམ་པར་བྲལ་བར་བྱས་པས་རྣམས་དང་། འཆི་འཕོ་བའི་འཇིགས་པས་རྣམས་ཀྱང་སྟེ། འཆི་བས་བྱས་པའི་སྡུག་བསྔལ་རྣམས་ནི་ཆེ་བ་དང་། རྣམ་པ་ཡང་མང་བ་ཡིན་ནོ། །དེ་དག་རྣམས་བཞིན་དུ་འཆི་འཕོ་བའི་འཇིགས་པ་རྣམ་པ་དུ་མ་རྣམས་དང་། འཆི་འཕོ་བ་རྣམས་ཀྱང་ཡང་དག་པར་མངོན་པར་མཐོང་ནས་གཞན་ཡང་ཡུལ་ཕྱོགས་གཞན་རྣམས་སུ་ཀུན་ཏུ་ལྟ་བར་བྱེད་དོ། །ཇི་སྲིད་དུ་རྩིག་པ་དེ་ཉིད་ཀྱི་ལོགས་ལ་བརྒྱ་བྱིན་འཆི་འཕོ་བར་གྱུར་པ་ལྷ་རྫས་ཀྱི་ཕྲེང་བ་མཆོག་དང་ལྡན་པ་འོད་འབར་བར་གྱུར་པའི་རྣ་རྒྱན་བཅུག་པ། འདོད་པ་ལྔའི་ཕུན་སུམ་ཚོགས་པ་དཔེ་མེད་པར་གྱུར་པའི་བདེ་བ་རྣམས་དང་རྣམ་པར་བྲལ་བར་གྱུར་པ། རང་གི་ལས་ཀྱིས་དབང་གིས་ཡང་འགྲོ་བར་འགྱུར་བ་བག་མེད་པ་ལ་ཞུགས་པར་གྱུར་པའི་དབང་གིས་ངན་སོང་གི་ས་རྣམས་ཁྱབ་པར་གྱུར་པར་དམྱལ་བ་དང་། ཡི་དགས་དང་། དུད་འགྲོའི་སྐྱེ་གནས་རྣམས་སུ་ལྟུང་བར་གྱུར་པ་རྣམས་མཐོང་ངོ་། །རང་གིས་བྱས་པའི་ལས་ཀྱིས་ཏེ། དེ་ལ་དབང་པོའི་མིང་ནི་འདི་དག་རྣམས་ཡིན་ཏེ། དེ་ལ་སུམ་ཅུ་རྩ་གསུམ་ན་གནས་པའི་དབང་པོ་རྣམས་འཆི་འཕོ་བའི་མིང་ནི་འདི་དག་རྣམས་ཡིན་ཏེ། འདི་ལྟར་འོད་དང་ལྡན་པ་ཞེས་བྱ་བའི་བརྒྱ་བྱིན་གྱིས་ལྷ་ཡུལ་གྱི་རྒྱལ་པོ་བྱས་ནས་རང་གི་ལས་ཀྱི་བསོད་ནམས་ཟད་པར་གྱུར་ནས་རྒྱ་མཚོར་ཆུ་སྲིན་གྱི་སྐྱེ་གནས་སུ་སྐྱེས་སོ། །དེས་ཀྱང་མིར་གྱུར་པ་ན་བྱ་བར་གྱུར་ཏེ། སྲོག་ཆགས་མང་པོ་རྣམས་བསད་པར་གྱུར་པའི་ཕྱིར་དང་། སངས་རྒྱས་ལ་ཕྱག་ཀྱང་བྱས་པར་འགྱུར་རོ། །དེ་ཕྱག་བྱས་པར་གྱུར་པ་དེའི་རྒྱུས་དེ་དབང་པོར་གྱུར་ཏོ། །དེ་ཟད་པའི་ཕྱི་ནས་ཡང་སྲོག་གཅོད་པའི་སྡིག་པའི་ལྷག་མ་རྣམས་ཀྱིས་སླར་ཡང་དུད་འགྲོར་སྐྱེས་སོ། །དབང་པོར་གྱུར་པ་ན་དེས་ལེགས་པའི་ལས་བྱས་པ་ནད་པ་རྣམས་དང་། མགོན་མེད་པ་རྣམས་དང་། དགེ་སློང་དག་ལ་ཡང་བསོད་སྙོམས་རབ་ཏུ་དང་བའི་ཡིད་ཀྱིས་བྱིན་པ་དེའི་རྒྱུས་སུམ་ཅུ་རྩ་གསུམ་གྱི་དབང་པོར་གྱུར་ཏོ། །སླར་ཡང་དེ་ཟད་ནས་ལན་གྲངས་གཞན་ལ་མྱོང་བར་འགྱུར་བའི་ལས་ཉེས་པར་བྱས་པས་ཀྲི་ཀ་ལཱ་ཤར་སྐྱེས་སོ།