ཡུལ་རྣམ་པ་སྣ་ཚོགས་པ་ལ་རྣམ་པར་ཆགས་པའི་ཡིད་ཅན་རྣམས་མཆོག་ཏུ་རྒྱ་ཆེ་བའི་བདེ་བ་དཔེ་མེད་པ་དག་དང་ཡང་དག་པར་ལྡན་པས་རྒྱུ་བར་གྱུར་པ་ལས་དེའི་ཚེ་ན་ཟས་དང་སྐོམ་གྱི་ས་ཕྱོགས་སུ་ཉེ་བར་ལེགས་པར་འགྲོའོ། །དེ་དག་རྣམས་ཉེ་བར་ལེགས་པར་སོང་བ་ན་ཡང་རྒྱན་དང་། ཆ་བྱད་མཆོག་དང་ལྡན་པར་གྱུར་པའི་ལྷ་མོ་རྣམས་རྗེས་སུ་སོང་སྟེ། སྣ་ཚོགས་པའི་གཟུགས་རྒྱན་དང་ཆ་བྱད་ཅན་དེ་རྣམས་ཀྱིས་ལྷ་དགའ་བར་བྱས་ནས། བསྙེན་ནས་ལེགས་པར་གནས་ཞིང་ཡང་གར་བྱེད། དགོད་པར་བྱེད། འགྱིང་བར་བྱེད། གླུ་ལེན་པར་བྱེད་དེ། རྔ་སྐད་ཡན་ལག་ལྔ་དང་ལྡན་པའི་ཆགས་པས་དང་། མཚུངས་པས་དང་། སྙན་པ་དང་བཅས་པ་དེ་ལྟར་ན་ཡང་ལྷ་རྣམས་ཀྱི་རྣ་བའི་རྣམ་པར་ཤེས་པ་ངོམས་པ་མེད་པའོ། །སྲེད་པའི་ཡུལ་གྱིས་རྣམ་པར་རྒྱུ་བས་མནར་བ་རྣམས་ངོམས་པར་མ་གྱུར་པས་གཞན་ཡང་ལྷ་རྣམས་རྣམ་པ་སྣ་ཚོགས་པའི་གཟུགས་རྣམས་ལ་ལྟ་བར་བྱེད་པར་གྱུར་པ་རྣམས་ལ་དགའ་བར་གྱུར་པ་དང་། མཐོང་ན་སྡུག་པ་དང་། ཇི་ལྟར་འདོད་པས་འགྲོ་བ་རྣམས་རྟག་ཏུ་ཡིད་འཇོམས་པར་བྱེད་པ་རྣམ་པ་སྣ་ཚོགས་པ་དང་། རྒྱ་ཆེ་བའི་འོད་འབར་བ་རྣམས་ཁ་དོག་དང་། དབྱིབས་དུ་མ་ཅན་དང་། རྒྱང་རིང་བ་དང་། ཐག་ཉེ་བ་ན་གནས་པ་རྣམས་ཏེ། དེ་ལ་གལ་ཏེ་ལྷ་རྣམས་འདི་སྙམ་དུ་སེམས་པར་གྱུར་ཏེ། ཇི་ལྟར་གཟུགས་གང་དག་ཡིན་པ་དེ་དག་རིང་བ་ན་གནས་པ་དེ་དག་རྣམས་ཐག་ཉེ་བར་འགྲོ་བར་བྱ་ན། དེའི་སེམས་བསྐྱེད་པ་ཙམ་ཉིད་ན་གཟུགས་མཆོག་ཏུ་དགའ་བར་གྱུར་པ་དེ་རྣམས་ཐག་ཉེ་བར་གནས་པར་འགྱུར་རོ། །བདུད་རྩིར་གྱུར་པ་ལ་ཡང་ཇི་ལྟར་འདོད་པ་དེ་ལྟར་འགྱུར་རོ། །གལ་ཏེ་ཡང་ཉེ་བར་གྱུར་པར་འདོད་ན་དེ་དག་རྣམས་ཉེ་བར་རོ། །གལ་ཏེ་ཡང་རིང་བར་འདོད་ན་ཡང་དེ་ཡང་རིང་བར་འགྱུར་རོ། །ལས་ཀྱི་འབྲས་བུའི་ཁྱད་པར་རྣམས་ཀྱིས་འགྱུར་ཏེ། དམན་པ་དང་། བར་མ་དང་། མཆོག་རྣམས་རྒྱུ་དང་བཅས་པ་ཡིན་ནོ། །དེ་བཞིན་དུ་ཡང་སྲེད་པའི་སྦྲུལ་མཐོང་བ་དུག་ཅན་གྱིས་བལྟས་པའི་ལྷ་རྣམས་ལ་ངོམས་པ་སྐྱེ་བ་མ་ཡིན་ནོ། །བུད་ཤིང་རྣམས་བཅུག་པར་གྱུར་པའི་མེ་བཞིན་དུ་སྲེད་པ་དང་བཅས་པ་རྣམས་དགའ་བར་གྱུར་པའི་ཡུལ་རྣམས་ཀྱིས་མཐར་ཐུག་པ་སྐྱེ་བ་མེད་དོ།