།རྒྱུན་དུ་སྦྱིན་ལ་དགའ་བར་གྱིས། །སྦྱིན་པ་མེད་པར་ལྷར་ཡང་ནི། །ལྷ་རྣམས་བདེ་བ་དམན་པར་འདོད། །མི་གང་བདག་ཉིད་སྦྱིན་པ་ནི། །བདེ་བའི་སྐལ་ལྡན་འགྱུར་བ་ཡིན། །གང་ཕྱིར་སྦྱིན་པའི་འབྲས་བུ་དེ། །ཐམས་ཅད་སེམས་ཀྱིས་ཟིན་པའི་ཕྱིར། །དུད་འགྲོ་རྣམས་སུ་སྐྱེས་ན་ཡང་། །བདེ་བའི་སྐལ་ལྡན་འགྱུར་བ་ཡིན། །སྦྱིན་པ་ལས་སྐྱེས་བདེ་དེ་ཀུན། །མཁས་པ་ཡིས་ནི་གསུངས་པ་ཡིན། །ཡི་དགས་སྲིད་ན་ཡི་དགས་གང་། །ཟས་རྣམས་ཟ་བར་འགྱུར་བ་ཡིན། །ཚེར་མ་མེད་པའི་ཤིང་རྣམས་ཀྱི། །འབྲས་བུ་དེ་དང་འདྲ་བར་འགྱུར། །དམྱལ་བར་བཀྲེས་དང་སྐོམ་རབ་ཀྱིས། །ལུས་ཅན་གང་ཞིག་མི་སྲེག་པ། །དེ་དག་ཐམས་ཅད་སྦྱིན་དཀའ་ཐུབ། །འབྲས་བཅས་གྱུར་པ་དེ་འདྲ་ཡིན། །སེམས་ཅན་རང་གི་ལས་རྣམས་ཀྱིས། །འགྲོ་བའི་འདམ་དུ་བྱིང་རྣམས་ལ། །སྦྱིན་པས་རྟག་ཏུ་བདེ་འབབ་པ། །ཕ་བཞིན་དང་ནི་མ་བཞིན་མཐོང་། །ས་དེ་རྣམས་ཀྱི་གནས་སྐབས་སུ། །རྟག་ཏུ་སྦྱིན་ལ་དགའ་བར་གྱིས། །སྦྱིན་དང་ཚུལ་ཁྲིམས་ལ་དགའ་བ། །ངམ་གྲོག་ཀུན་ལས་རྟག་ཏུ་གྲོལ། །དེ་ལྟར་མུ་སུ་ལུན་དྷས་བག་མེད་པ་སྤྱོད་པའི་ལྷ་དེ་དག་རྣམས་ལ་ལེགས་པར་བསྟན་ནོ། །དེ་རིག་ནས་ཀྱང་ལྷ་དེ་དག་རྣམས་དད་པས་མངོན་སུམ་དུ་དམིགས་ནས། །སྦྱིན་པ་དང་ཚུལ་ཁྲིམས་ཀྱི་འབྲས་བུ་ངེས་པར་རྟོགས་སོ། །གཞན་ཡང་ལྷ་རྣམས་ཀྱི་དབང་ཆུང་བའི་གནས་ཡོད་དོ། །འདི་ལྟ་སྟེ། ལས་རྣམས་ཀྱིས་སོ་སོར་བསྟན་པའི་ངོ་ཚ་བར་འགྱུར་བའི་ཟས་རྣམས་སོ། །གང་གི་ནགས་དང་། སྐྱེད་མོས་ཚལ་དང་། རྫིང་བུ་དང་། ཆུ་མིག་དང་། པད་མའི་ནགས་ཀྱི་གསེབ་ཏུ་རྒྱུ་བ་ན་རབ་ཏུ་མང་བའི་བུད་མེད་ཀྱི་ཚོགས་ཀྱིས་ཡོངས་སུ་བསྐོར་བ་རྣམས་རྔ་དང་། རོལ་མོ་སྣ་ཚོགས་རྣམས་ཀུན་ཏུ་སྒྲོགས་པའི་ནགས་ཀྱི་ས་རྣམས་ལ་རྣམ་པར་རྒྱུ་སྟེ། ཡུལ་རྣམ་པ་སྣ་ཚོགས་པ་ལ་རྣམ་པར་ཆགས་པའི་ཡིད་ཅན་རྣམས་མཆོག་ཏུ་རྒྱ་ཆེ་བའི་བདེ་བ་དཔེ་མེད་པ་དག་དང་ཡང་དག་པར་ལྡན་པས་རྒྱུ་བར་གྱུར་པ་ལས་དེའི་ཚེ་ན་ཟས་དང་སྐོམ་གྱི་ས་ཕྱོགས་སུ་ཉེ་བར་ལེགས་པར་འགྲོའོ།