ནམ་མཁའ་ལ་བྱུང་བར་གྱུར་ནས་གསར་དུ་སྐྱེས་པ་གང་དག་ལྷན་ཅིག་ན་ལྷ་རྣམས་ཀྱི་ཚོགས་རྩེ་བའི་ཕན་ཚུན་གྱི་ཅ་ཅོའི་སྒྲས་མིག་རྣམ་པར་གདངས་པ་དང་རབ་ཏུ་ཡང་དགའ་བའི་ལྷ་དེ་མངོན་པར་མཐོང་ནས་འགའ་ཞིག་ནི་ལྷ་རྗེས་སུ་འོངས་པ་ལ་ལྟའོ། །འགའ་ཞིག་ནི་འདི་ནི་གསར་དུ་སྐྱེས་པ་ཡིན་ཞེས་བྱས་ནས་རབ་ཏུ་དགའ་ནས་དེས་དེའི་མགུལ་པ་ནས་འཁྱུད་པར་བྱེད་དེ། ཇི་ལྟར་འཕེལ་བས་བདག་ཅག་གི་ཕྱོགས་རབ་ཏུ་མང་བར་འགྱུར་ཏེ་ལྷའི་ཚོགས་ཤིན་ཏུ་ཕལ་པོ་ཆེ་རྣམས་ཀྱིས་རོལ་མོའི་སྒྲ་ཀུན་ཏུ་བསྒྲགས་པའི་རྩེ་མོ་བདག་ཅག་ལ་འབྱུང་བར་འགྱུར་ཏེ། ཆེས་མང་ཞིང་ཤིན་ཏུ་མང་བའི་སྟོབས་ཅན་ལྷ་རྣམས་ཀྱིས་མངའ་བདག་མུ་སུ་ལུན་དྷ་འདིའི་སྤྱན་སྔར་བདག་ཅག་རྩེད་མོ་བྱའོ། །དེ་ལྷའི་ཚོགས་ཀྱིས་ཡོངས་སུ་བསྐོར་བ་ལས་ལྷ་གཞན་གྱིས་ཐག་རིང་བ་ཉིད་ནས་ལྷ་དེ་ཉིད་མངོན་པར་མཐོང་ནས་ཐལ་མོ་སྤྱི་བོར་སྦྱར་ཏེ་སོ་སོ་ནས་མཆོད་པར་བྱེད་དོ། །རྩེ་མོ་འདིར་ཁྱོད་ཀྱིས་ཕྱིན་གྱིས། འདི་ཇི་ལྟ་བ་བཞིན་དུ་ལྟོས་དང་། གང་ལ་ལྷ་ཤིན་ཏུ་འཐབ་བྲལ་དང་ལྷའི་མངའ་བདག་ཀྱང་ལྷའི་ཚོགས་དུ་མས་ཡོངས་སུ་བསྐོར་ནས་རྩེ་བར་བྱེད་དེ་ལེགས་པར་བྱས་པའི་ལས་ཀྱི་མཐའ་ལ་སྤྱད་པའི་ལྷ་རྣམས་པད་མ་དུ་མས་ཡོངས་སུ་བསྐོར་ནས་རྩེ་བར་བྱེད་དེ། ལེགས་པར་བྱས་པའི་ལས་ཀྱིས་རྩེད་མོའི་ནགས་ལ་སོགས་པའི་གནས་དེར་འོངས་པར་གྱུར་ལ། དེ་ལ་ལྷ་སྔ་ན་མེད་པ་འདི་རྩེད་མོའི་དོན་དུ་འོངས་སོ་ཞེས་བྱ་བའི་འཐབ་བྲལ་བའི་ཚིག་དེ་ཐོས་ནས་ལྷ་གསར་དུ་སྐྱེས་པ་དེ་འདི་སྙམ་དུ་སེམས་ཏེ། གང་ན་འཐབ་བྲལ་བ་རྣམས་ཀྱི་རྒྱལ་པོ་འདི་འདོད་པའི་ཡོན་ཏན་ལྔ་ལ་རྩེད་མོ་རྩེ་དེ་སྐད་ཅེས་སྨྲས་ནས་དེས་ལྷན་ཅིག་ཏུ་ཞབས་འབྲིང་བྱེད་པ་ལ་འདི་སྐད་ཅེས་བོས་ཏེ། གང་ན་རྒྱལ་པོ་མུ་སུ་ལུན་དྷ་རྩེད་མོ་རྩེ་བ་དེར་བདག་ཅག་འགྲོ་བར་བྱའོ། །དེ་ལྟར་ཚིག་འདི་བཟུང་ནས་གང་ན་རྒྱལ་པོ་རྩེད་མོ་རྩེ་བ་དེར་གླུ་དང་རྔ་སྒྲ་དང་རོལ་མོ་དང་རབ་ཏུ་དགའ་བའི་གླུ་མཁན་དང་བཅས་ཏེ་འགྲོའོ། །དེ་ནས་མུ་སུ་ལུན་དྷ་ཨུད་པ་ལ་དམར་པོའི་ནང་དུ་སོང་ཞིང་གསེབ་ཏུ་སོང་བ་རྒྱང་རིང་པོ་ནས་མཐོང་ངོ་། །ཨུད་པ་ལ་དམར་པོ་དེའི་མཛེས་པ་ནི་འདི་དག་རྣམས་ཡིན་ཏེ། འདི་ལྟ་སྟེ། སྟོང་ཕྲག་བརྒྱ་པའི་འདབ་མའི་ཨུད་པ་ལ་དེའི་འདབ་མ་དེ་ལ་ཕུག་ཏུ་ཞུགས་པ་དང་འདྲ་བའི་ཁང་པ་ཇི་ལྟར་མཆོག་ཏུ་དྲི་ཞིམ་པ་ན་ལྷ་མོས་བྱའི་ཚོགས་རྣམས་དང་ལྷན་ཅིག་ཏུ་རྩེ་བར་བྱེད་དོ། །བྱའི་ཚོགས་གང་དག་ཆུའི་རྒྱུན་ལ་རྒྱུ་བ་དེ་དག་རྣམས་ནི་རྣམ་པ་དུ་མར་སྙན་པའི་སྒྲ་ཀུན་ནས་སྒྲོགས་སོ།