།བྱའི་ཚོགས་གང་དག་ཆུའི་རྒྱུན་ལ་རྒྱུ་བ་དེ་དག་རྣམས་ནི་རྣམ་པ་དུ་མར་སྙན་པའི་སྒྲ་ཀུན་ནས་སྒྲོགས་སོ། །ཡང་ཨུད་པ་ལ་དམར་པོ་དེའི་འོད་ནི་རྣམ་པ་འདི་ལྟ་བུ་ཡིན་ཏེ། རིན་པོ་ཆེ་རྣམ་པ་སྣ་ཚོགས་པའི་འོད་གང་དག་དེ་ཀུན་ནས་འབྲེལ་པར་འགྱུར་རོ། །རྣམ་པ་སྣ་ཚོགས་པའི་འོད་དེ་དག་རྣམས་ཐམས་ཅད་འོད་དེས་ཟིལ་གྱིས་གནོན་ཏེ། ཨུད་པ་ལ་རིན་པོ་ཆེ་ཡིན་པའི་ཕྱིར་རོ། །ཨུད་པ་ལ་དེ་གང་གིས་རིན་པོ་ཆེ་ཐམས་ཅད་ཀྱི་འོད་ཀྱི་ཁྱད་པར་རྣམས་ཟིལ་གྱིས་གནོན་པར་འགྱུར་བའི་རྣམ་པ་དེ་སྲིད་ཀྱི་དམར་པོར་འགྱུར་རོ། །རྣམ་པ་ཇི་སྲིད་ཀྱི་མཆོག་ཏུ་དམར་བའི་པད་མ་རཱ་གའི་འམ་སྟོན་ཀའི་ཉི་མ་ཤར་བར་གྱུར་པ་ཡང་རུང་སྟེ། རྣམ་པ་དེ་སྲིད་ཀྱི་དམར་པོར་སྐྱེད་པ་བས་དེ་དག་ཆེས་ལྷག་པར་དམར་བ་ཡིན་ནོ། །གཞན་ཡང་ཨུད་པ་ལ་དམར་པོ་དེའི་འདབ་མའི་ནང་ན་ལྷ་མོ་དེ་དག་རྣམས་ནང་དུ་སོང་བའི་བུང་བའི་ཚོགས་དང་ལྷན་ཅིག་ཏུ་དམ་པར་འཚེར་བའི་འདབ་མའི་ནང་དུ་སོང་ནས་ལྷ་རྫས་ཀྱི་འདོད་པའི་ཡོན་ཏན་ལྔ་ལ་དགའ་བར་བྱེད་དེ། ཨུད་པ་ལ་དམར་པོ་དེ་དག་གི་ནང་དུ་སོང་བའི་ལྷ་དེ་དག་རྣམས་ཀྱང་འདི་སྙམ་དུ་སེམས་ཏེ་གང་ཆུང་ངུ་ན་བདག་ཅག་བདུད་རྩི་བཏུང་བར་བྱའོ་ཞེས་དེ་དག་གི་སེམས་བསྐྱེད་པ་ཙམ་ཉིད་ན་འདབ་མ་དེ་དག་གི་གསེབ་ཀྱི་ནང་ནས་མཆོག་གི་དྲི་དང་རེག་པ་བསིལ་བ་རྣམ་པ་དུ་མ་ཡོངས་སུ་འབབ་པའོ། །ལྷ་དེ་དག་དང་ལྷ་རྣམས་ཀྱི་མངའ་བདག་མུ་སུ་ལུན་དྷ་དེ་ཡང་ཡུལ་གྱི་བདེ་བ་མཆོག་ཏུ་རྒྱ་ཆེ་བ་ཉམས་སུ་མྱོང་བར་བྱེད་དོ། །དེ་དག་འདི་སྙམ་དུ་སེམས་ཏེ། མ་ལ་བདག་ཅག་ཨུད་པ་ལའི་ནང་དུ་ཞུགས་པ་རྣམས་ཀྱི་འདི་ལྟ་བུའི་གླུ་དབྱངས་རྣམས་སུ་གྱུར་མོད། དེ་དག་གི་སེམས་བསྐྱེད་པ་ཙམ་ཉིད་ན་རེག་ན་བདེ་བའི་རླུང་རྣམས་རབ་ཏུ་འཕྱུར་ལ་རླུང་དེས་རབ་ཏུ་བཏབ་པ་ན་སེམས་བསྐྱེད་པ་དང་དུས་གཅིག་ཏུ་ཨུད་པ་ལ་དམར་པོ་དེའི་ཨུད་པ་ལའི་འདབ་མ་རྣམས་ཕན་ཚུན་དུ་དྲུད་པའི་སྒྲ་རྣམས་འདི་ལྟ་བུ་རབ་ཏུ་འབྱུང་སྟེ། གང་གི་ཁྱད་པར་གྱིས་རྔ་སྐད་ཡན་ལག་ལྔ་པ་དེའི་བཅུ་དྲུག་ཆར་ཡང་མི་ཕོད་དོ། །དེ་དག་གིས་སྔར་མ་བྱུང་བའི་སྒྲ་ཐོས་ནས་མཆོག་ཏུ་རབ་ཏུ་དགའ་བའི་ཡིད་ཀྱིས་ཤིན་ཏུ་རྟག་པར་རྣ་བའི་རྣམ་པར་ཤེས་པ་ཨུད་པ་ལ་དམར་པོའི་འདབ་མའི་གསེབ་ཏུ་སོང་བས་འཐབ་བྲལ་གྱི་མངའ་བདག་མུ་སུ་ལུན་དྷ་དང་ལྷན་ཅིག་ཏུ་དེ་དག་རྣམས་དགའ་བར་འགྱུར་རོ།