ནམ་མཁའ་ལ་ཁང་བུའི་ཕྲེང་བ་འགྲོ་བ་རྣམས་སྟུག་ཅིང་འཁྲིགས་པའི་རིན་པོ་ཆེ་རྣམས་ཤིན་ཏུ་དྲུད་པའི་གཟི་བརྗིད་ཀྱི་ངོ་བོ་རྣམས་ཀུན་ནས་བལྟ་བར་མཛེས་པ་ཕུན་སུམ་ཚོགས་པ་རྣམས་དང་། ཕན་ཚུན་དུ་རེག་ཅིང་བསྙེས་པའི་ཅ་ཅོའི་སྒྲས་ཡོངས་སུ་རྒོད་པའི་ལྷའི་ཚོགས་ཕུན་སུམ་ཚོགས་པ་རྣམས་དང་སྒྲ་སྒྲོགས་པ་མཉམ་པ་དང་མི་མཉམ་པའི་རིན་པོ་ཆེའི་གཞི་ལ་བརྩེགས་པའི་ཕུང་པོ་ལེགས་པར་ཚོགས་པའི་དབང་པོའི་རྡོ་རྗེ་ཕལ་པོ་ཆེ་བྱུང་བའི་རིའི་རྩེ་མོ་དང་བང་རིམ་དང་ཉེ་བའི་ནགས་ཀྱི་ཁྱད་པར་བལྟ་ན་སྡུག་པ་དུ་མ་ཕུན་སུམ་ཚོགས་པ་རྣམས་དང་། བང་རིམ་གྱི་མེ་ཏོག་གི་རིགས་བརྒྱ་སྟོང་དུ་མ་དབྱིབས་དང་ཁ་དོག་དང་དྲིའི་རིགས་དུ་མ་དང་འདབ་མ་ལ་རྣམ་པར་རྒྱུ་ཞིང་ཉེ་བར་འགྲོ་བ་ལ་སྟེན་ཅིང་ཡོངས་སུ་རྒྱུག་པའི་སྒྲ་ཕུན་སུམ་ཚོགས་པ་རྣམས་ཏེ། ཁང་བུ་སྟོང་ཡོད་པའི་རིའི་རྩེ་མོ་དེ་ནི་དེ་ལྟར་ཕུན་སུམ་ཚོགས་པ་ཡིན་ནོ། །ལྷ་དང་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་རྣམ་པ་དུ་མར་ནམ་མཁའ་ལ་འགྲོ་བ་ཉིད་ལ་ཡང་ཀུན་ཏུ་ལྟ་བར་བྱེད་དོ། །རྣམ་པ་དེ་ལྟ་བུ་དག་གི་ཕུན་སུམ་ཚོགས་པ་དེ་དག་རྣམས་མངོན་པར་མཐོང་ནས་ལྷ་དེས་རབ་ཀྱི་མཆོག་ཏུ་དགའ་བའི་བློས་ལྷ་མོ་རྣམས་ལ་འདི་སྐད་ཅེས་སྨྲས་སོ། །ཁང་བུ་སྟོང་ཡོད་པའི་རྩེ་མོ་འདི་ལ་ཁྱེད་རྣམས་ཇི་ལྟ་བ་བཞིན་དུ་ལྟོས་དང་རྩེ་མོ་འདི་ནི་ཕུན་སུམ་ཚོགས་པ་ཆེན་པོས་དགའ་བར་གྱུར་པའོ་ཞེས་རྣམ་པ་དེ་ལྟ་བུ་རྣམ་པ་དུ་མའི་ཚིག་དེ་དག་རྣམས་ཉེ་བར་བཟུང་ནས་ལྷ་མོ་དེས་ལྷ་དེ་ལ་འདི་སྐད་ཅེས་སྨྲས་སོ། །བདག་ཅག་རྣམས་ཀྱིས་ནི་མཛེས་པ་འདི་དག་རྣམས་མཐོང་ལགས་ཀྱིས་རྟག་པར་རྒྱུན་དུ་བདག་ཅག་རྣམས་ཀྱིས་ཡུལ་ཕྱོགས་འདི་བརྒྱ་ཕྲག་དང་སྟོང་ཕྲག་དང་རྣམ་པ་མང་པོར་ཡང་མཐོང་གིས་ལྷ་ཉིད་ཀྱིས་ནམ་ཡང་མཐོང་མ་མྱོང་བས་ན་དེ་དག་རྣམས་ལྷས་ལེགས་པར་བལྟ་བར་གྱིས་ཤིག །དེ་དེ་ལྟར་རང་བཞིན་དེས་རྗེས་སུ་ཞུགས་ཏེ་རང་གི་སྐྱེ་བོ་དང་བཅས་པ་དང་རང་གི་ཚོགས་པ་དང་བཅས་པ་རྣམས་ཀྱིས་ཀྱང་གཞལ་ཡས་ཁང་སྟོང་གི་རྩེ་མོ་དེ་མངོན་པར་མཐོང་བར་གྱུར་ཏེ། ནམ་མཁའ་ལ་བྱུང་བར་གྱུར་ནས་གསར་དུ་སྐྱེས་པ་གང་དག་ལྷན་ཅིག་ན་ལྷ་རྣམས་ཀྱི་ཚོགས་རྩེ་བའི་ཕན་ཚུན་གྱི་ཅ་ཅོའི་སྒྲས་མིག་རྣམ་པར་གདངས་པ་དང་རབ་ཏུ་ཡང་དགའ་བའི་ལྷ་དེ་མངོན་པར་མཐོང་ནས་འགའ་ཞིག་ནི་ལྷ་རྗེས་སུ་འོངས་པ་ལ་ལྟའོ།