།བྱང་ཆུབ་སེམས་དཔའ་སེམས་དཔའ་ཆེན་པོ་རེ་རེས་ཀྱང་རིན་པོ་ཆེ་ལས་བྱས་པའི་པད་མ་འདབ་མ་སྟོང་པ་བདུན་བདུན་དང་། དཔུང་གི་ཚོགས་ཡན་ལག་བཞི་པ་ཡང་མངོན་པར་སྤྲུལ་ཏོ། །སྤྱོད་ལམ་དེ་ལྟ་བུས་དེ་ནས་ཆས་ཏེ། དེ་དག་ཐམས་ཅད་སྐད་ཅིག་ཐང་ཅིག་གཅིག་གིས་སངས་རྒྱས་ཀྱི་ཞིང་མི་མཇེད་འདིར་འཁོད་དེ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང་། བྱང་ཆུབ་སེམས་དཔའ་རྣམས་ལ་མཆོད་པའི་ལས་བྱ་བའི་ཕྱིར་སངས་རྒྱས་ཀྱི་ཞིང་མི་མཇེད་ཐམས་ཅད་དུ་ཁ་ཅིག་གིས་ནི་གསེར་གྱི་ཕྱེ་མའི་ཆར་མངོན་པར་རབ་ཏུ་ཕབ་བོ། །བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང་། བྱང་ཆུབ་སེམས་དཔའ་རྣམས་ལ་མཆོད་པའི་ལས་བྱ་བའི་ཕྱིར་ཁ་ཅིག་གིས་ནི་དངུལ་གྱི་ཕྱེ་མའི་ཆར་མངོན་པར་རབ་ཏུ་ཕབ་བོ། །ཁ་ཅིག་གིས་ནི་སྤོས་ཀྱི་ཕྱེ་མའི་ཆར་མངོན་པར་རབ་ཏུ་ཕབ་བོ། །ཁ་ཅིག་གིས་ནི་མུ་ཏིག་གི་ཆར་མངོན་པར་རབ་ཏུ་ཕབ་བོ། །ཁ་ཅིག་གིས་ནི་གསེར་སྐུད་དག་མངོན་པར་རབ་ཏུ་ཕབ་བོ། །ཁ་ཅིག་གིས་ནི་མུ་ཏིག་གི་དོ་ཤལ་དག་མངོན་པར་རབ་ཏུ་ཕབ་བོ། །ཁ་ཅིག་གིས་ནི་དཔུང་རྒྱན་གྱི་རྒྱན་དག་མངོན་པར་རབ་ཏུ་ཕབ་བོ། །ཁ་ཅིག་གིས་ནི་རས་དང་། རས་བཅོས་བུ་དང་། གདུགས་དང་། རྒྱལ་མཚན་དང་། བ་དན་གྱི་ཆར་མངོན་པར་རབ་ཏུ་ཕབ་སྟེ། དེ་དག་ཐམས་ཅད་ཀྱིས་སངས་རྒྱས་ཀྱི་ཞིང་མི་མཇེད་འདི་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་པར་གྱུར་ཏོ། །ཐེག་པ་ཆེན་པོ་འདུས་པ་ཆེན་པོའི་མདོ་ཉི་མའི་སྙིང་པོའི་ལེའུ་ལས། ཕོ་ཉའི་ལེའུ་སྟེ་གཉིས་པ་རྫོགས་སོ།། །།རྒྱལ་པོ་གཟུགས་ཅན་སྙིང་པོས་སྔོན་མ་མཐོང་བ་ཚངས་པ་ཆེན་པོ་དང་། བརྒྱ་བྱིན་དང་། སྲེད་མེད་ཀྱི་བུ་དང་། གླིང་བཞི་པའི་འཁོར་ལོས་སྒྱུར་བ་གྲངས་མེད་དཔག་ཏུ་མེད་པ་མཐོང་ནས་མཆོག་ཏུ་ངོ་མཚར་དུ་གྱུར་ཏེ། སྟན་ལས་ལངས་ནས་ཧ་ཅང་ཡང་ཐག་མི་རིང་བར་འདུག་གོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཕོ་ཉ་བཞི་པོ་དེ་དག་འཁོར་དང་བཅས་ཏེ། དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཤུགས་ཀྱི་སྙིང་པོས་ཀྱང་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེ་ལོགས་སུ་མེ་ཏོག་ཙམ་པ་ཀའི་ཕྲེང་བ་དག་གཏོར་ཏེ་དེའི་ཚེ་ཚིགས་སུ་བཅད་པ་འདི་དག་ཀྱང་གསོལ་ཏོ།