།བཙུན་པ་བཅོམ་ལྡན་འདས་སངས་རྒྱས་ཀྱི་ཞིང་མི་མཇེད་ནི་ངོ་མཚར་ལགས་ཏེ། དེ་ན་སེམས་ཅན་རྣམས་མཆོག་ཏུ་སྡང་བ། གཟུ་ལུམས་ཅན། རྩུབ་པ། ཕྲག་དོག་དང་ལྡན་པ། སྙིང་བརྩེ་བ་མ་མཆིས་པ། བགྱིས་པ་མི་གཟོ་བ། ཚིག་རྩུབ་པོར་སྨྲ་བ། ལོག་པར་ལྟ་བ་དག་ལགས་པས་དེར་ཁ་ཅིག་གིས་བདག་ལ་རྣམ་པར་ཐོ་བཙམས་ན་མི་རུང་སྟེ། བདག་མཆིས་པས་ཅི་ལ་ཡང་མི་སྨན་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ནི་གནས་མ་ཡིན་ཞིང་གོ་སྐབས་མེད་དོ། །སུས་དམིགས་པ་མེད་པའི་ཚངས་པའི་གནས་པ་ལེགས་པར་བསྒོམས་ཤིང་ལེགས་པར་ཡིད་ལ་བྱས་པར་གྱུར་པ་དེ་ལ་ནི་བདུད་བྱེ་བས་ཀྱང་རྣམ་པར་ཐོ་འཚམ་པའམ། བར་ཆད་བྱེད་པར་ནུས་པ་འདི་ནི་གནས་མེད་དོ། །རིགས་ཀྱི་བུ་ཁྱོད་ཀྱིས་ཡུན་རིང་པོ་ནས་དམིགས་པ་མེད་པའི་ཚངས་པའི་གནས་པ་ཤིན་ཏུ་བསྒོམས་ཤིང་ལེགས་པར་ཡིད་ལ་བྱས་ཟིན་གྱིས་མ་འཇིགས་ཤིག །རིགས་ཀྱི་བུ་ཁྱོད་ལ་གསང་སྔགས་གང་དག་གིས་སྡང་བ་ཐམས་ཅད་དད་པར་འགྱུར་བ་དང་། རྨོངས་པར་འགྱུར་བ་དང་། གང་གིས་བཟོད་པ་དང་། དྲན་པ་དང་། རབ་ཏུ་དང་བ་ཐོབ་པར་བྱེད་པའི་གཟུངས་སྔགས་དམིགས་པ་མེད་པའི་ཚངས་པའི་གནས་པའི་རྒྱུ་འཐུན་པ་བྱམས་པ་ཆེན་པོ་སྦྱིན་པར་མཛད་དོ། །ཏད་ཡ་ཐཱ། བོ་བྲི་ཧ། བུ་བུ་ལ། ཨི་ལ་བ་ར། ཨི་ལ་ས་ཧ། ཧ་ཊྱ་ཊྱ་ག་ག་ནཱ་ཀྵ། ཤ་མ་ཤ་མ། མི་ཏྲ་མི་ཏྲ། ཙཀྲ་བར་ཏི་ཏི་ལེ། སཱ་ག་ར་ཏི་ལེ། དུརྦྷ་ལི། ཧི་ཧི་ལེ། ཧ་བ་ཧེ་ན་རཱ་ཛ་ནེ། ཡ་བ་ན་མི་ཏྲེ། ཀྵཱ་ན་ཏི་མི་ཏྲེ། མི་ཏྲ་རླ་མེ། མི་ཏྲ་ཁ་གྷ། སརྦ་ས་ཏོ་ཛ་མི་ཏྲེ། སརྦ་ཀྲ་མ་མི་ཏྲེ། མ་ན་བརྟ་མི་ཏྲེ། དྷི་ཏི་ཤ་ར་མི་ཏྲེ་སྭཱ་ཧཱ། རིགས་ཀྱི་བུ་སྡང་བ་ཞི་བར་བྱེད་པ་དང་། རྨོངས་པར་བྱེད་པའི་གསང་སྔགས་ཀྱི་གཟུངས་སྔགས་འདིས་ཙམ་པ་ཀའི་འབྲུ་མར་ལ་ལན་བདུན་བཟླས་བརྗོད་བྱས་པས་ལག་པ་གཉིས་བསྐུས་ན་སྡང་བ་ཐམས་ཅད་དད་པར་བྱེད། རྨོངས་པར་བྱེད་ཅིང་སྡང་བའི་སྦྲུལ་དག་དང་། སྡང་བའི་གནོད་སྦྱིན་དང་། གྲུལ་བུམ་དང་། སྲུལ་པོ་དང་། བདུད་བྱེ་བ་བརྒྱ་སྟོང་ཡང་རུང་སྟེ། སྡང་བའི་སེམས་དང་ལྡན་པའི་སེམས་ཅན་དེ་དག་གིས་ཅི་ཡང་བྱེད་པར་མི་ནུས་སོ།