ཤིན་ཏུ་བློ་དང་ལྡན་པ་དག་བདེ་ལེགས་སུ་མའི་ལྟོ་ནས་བྱུང་ཞིང་བརྗེད་ངས་པ་མེད་པའི་སེམས་དང་ལྡན་པ་དག་ཏུ་གྱུར་ཏོ། །དེ་དག་སྐྱེས་པ་ཙམ་གྱི་མོད་ལ་ཡང་ལྷ་སྟོབས་དང་ལྡན་པ་དབང་ཆེ་བར་གྲགས་པ་རེ་རེ་ལ་ཡང་འཁོར་བརྒྱ་སྟོང་ཡོད་པ་དག་བསྲུང་བ་དང་། རྗེས་སུ་སྦ་བར་བྱེད་པར་ཀུན་ཏུ་གནས་སོ། །དེ་དག་མི་དང་མི་མ་ཡིན་པ་ཞེས་བྱ་བའི་བར་གང་གིས་ཀྱང་རྣམ་པར་ཐོ་བཙམ་པའམ། རྣམ་པར་གཙེ་བའམ། ལུས་དཀྲུག་པའམ། ཁམས་དཀྲུག་པའམ། སེམས་དཀྲུག་པར་བྱ་བར་མི་ནུས་སོ། །མདངས་བླང་བར་ཡང་མི་ནུས་སོ། །གསང་སྔགས་དང་། སྨན་གྱིས་ཀྱང་རྣམ་པར་ཐོ་བཙམ་པར་མི་ནུས་སོ། །གང་གི་ཕྱིར་སེམས་ཅན་དེ་དག་མཆོག་ཏུ་གཟུགས་དང་ལྡན་པ་དང་། ཚེ་རབས་དྲན་པ་དང་། འཇིག་རྟེན་ཕ་རོལ་ལ་འཇིགས་པར་ལྟ་བ་དང་། བྱམས་པའི་སེམས་དང་ལྡན་པ་དང་། སྙིང་རྗེ་ཆེན་པོ་དང་ལྡན་པ་དང་། གཏོང་བ་དང་ལྡན་པ་དང་། ཚུལ་ཁྲིམས་ལ་རྗེས་སུ་དགའ་བ་དང་། བཟོད་པ་དང་། ཡོན་ཏན་དང་ལྡན་པ་དང་། བརྩོན་འགྲུས་དང་ལྡན་པ་དང་། དབེན་པ་ལ་དགའ་ཞིང་བསམ་གཏན་ལ་མངོན་པར་བརྩོན་པ་དང་། དགེ་བའི་བཤེས་གཉེན་ལ་མངོན་པར་དགའ་བ་དག་དང་། དེ་ཐོབ་པར་བྱེད་པའི་སྡུག་བསྔལ་ཡང་དག་པར་ཟད་པར་འགྲོ་བ་འཕགས་པའི་ངེས་པར་འབྱིན་པའི་ཤེས་པ་དང་ལྡན་པ་དག་ཏུ་གྱུར་ཏོ། །སེམས་ཅན་ཉེ་བར་ཞི་བ་ལ་གནས་པ་ཉོན་མོངས་པ་ཆུང་བ་དེ་ལྟ་བུ་དེ་དག་ལ་ལྷ་དང་། ཀླུ་དང་། གནོད་སྦྱིན་རྣམས་ཀྱིས་རིམ་གྲོ་བྱ་བར་བརྩོན་པ་དག་ཡིན་ཏེ། མི་དེ་དག་ཀྱང་མཆོག་ཏུ་འཁོར་བ་ལ་སྐྱོན་དུ་བལྟ་བ་དང་། བྱང་གྲོལ་གྱི་བདེ་བ་འདོད་པ་དག་ཏུ་གྱུར་ཏེ། །དེ་དག་གིས་གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན་དེ་དག་རིས་འཐུན་པ་དེ་ཉིད་ཀྱིས་མྱུར་དུ་བྱང་ཆུབ་ཀྱི་སེམས་མ་བརྗེད་པར་བྱང་ཆུབ་སེམས་དཔའི་ཏིང་ངེ་འཛིན་ཐོབ་པར་གྱུར་ཏོ། །ཅི་སྟེ་རང་སངས་རྒྱས་ཀྱི་ཐེག་པ་ལ་སེམས་བསྐྱེད་ན་དེ་དག་མྱུར་དུ་སྐྱེ་བ་དང་། འཇིག་པ་དང་། རྗེས་སུ་འཐུན་པའི་བཟོད་པ་ཐོབ་པར་གྱུར་ཏོ། །ཅི་སྟེ་སེམས་ཅན་དེ་དག་ཀྱང་ཉན་ཐོས་ཀྱི་ཐེག་པ་ལ་སེམས་སྐྱེད་པར་བྱེད་ན་སེམས་ཅན་དེ་དག་རིས་འཐུན་པ་ཉིད་ཀྱིས་བདེན་པ་དང་རྗེས་སུ་འཐུན་པའི་བཟོད་པ་ཐོབ་པར་བྱེད་དོ།