།དེ་བཞིན་དུ་ད་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་པ། དཔག་ཏུ་མེད་པ་གང་གཱའི་ཀླུང་གི་བྱེ་མ་སྙེད་བསམ་གཏན་དང་། མངོན་པར་ཤེས་པའི་ཡུལ་ལ་རྣམ་པར་རྩེ་བ་དང་ལྡན་པ་དག་གིས་མི་མཇེད་ཀྱི་སངས་རྒྱས་ཀྱི་ཞིང་འདི་ན་ཆོས་ཀྱི་ཚུལ་ཡུན་རིང་དུ་གནས་པར་བྱ་བའི་ཕྱིར་དང་། གསལ་བར་བྱ་བའི་ཕྱིར་དང་། ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་མ་དད་པ་རྣམས་དད་པར་བྱ་བའི་ཕྱིར་དང་། དད་པ་རྣམས་ཕྱིར་ཞིང་འཕེལ་བར་བྱ་བའི་ཕྱིར་དང་། སེམས་ཅན་ཆོས་ལ་མངོན་པར་བརྩོན་པ་དག་དང་། ཆོས་ཀྱིས་གནས་པ་དག་དང་། ཡོན་ཏན་གྱིས་ཕྱུག་པ་དག་དང་། སེམས་ལ་དབང་དང་ལྡན་པར་གྱུར་པ་རྣམས་བདེ་བ་ལ་རེག་པ་དང་། རྣམ་པར་ཐོ་འཚམ་པ་མེད་པར་བྱ་བའི་ཕྱིར་དང་། ངའི་བསྟན་པ་རབ་ཏུ་མི་འཇིག་པར་བྱ་བའི་ཕྱིར་དང་། བྱང་གྲོལ་གྱི་བདེ་བ་ཡོངས་སུ་རྫོགས་པར་བྱ་བའི་ཕྱིར་ས་ཆེན་པོ་འདི་ཡོངས་སུ་སྤྱད་པར་བྱས་པ་ཡིན་ནོ། །དོན་དེ་ཉིད་བྱིན་གྱིས་བརླབ་པར་བྱ་བའི་ཕྱིར་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསམ་གཏན་གྱི་ཡུལ་དག་གིས་རྣམ་པར་རྩེ་བར་བྱེད་དོ། །ས་ཕྱོགས་གང་དང་གང་ན་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་འཁོད་ཅིང་བསམ་གཏན་གྱི་ཡུལ་དག་གིས་རྣམ་པར་རྩེན་པར་བྱེད་པ་དེ་དང་དེར་ད་ལྟར་དང་། མ་འོངས་པའི་དུས་ན་ཡང་ཁ་ཅིག་ཏུ་ལ་ལར་ང་འདས་ནས་སེམས་ཅན་འཁོར་བའི་འཇིགས་པས་སྐྲག་པར་བྱེད་ཅིང་མྱ་ངན་ལས་འདས་པ་འདོད་པ་དག་སྐུ་གདུང་གི་མཆོད་རྟེན་དག་བྱེད་དུ་འཇུག་པར་འགྱུར་ཞིང་། སངས་རྒྱས་ཀྱི་བཞུགས་ཁང་དག་གམ། སངས་རྒྱས་ཀྱི་སྐུ་གཟུགས་དག་གམ། ཆོས་ཀྱི་བཞུགས་ཁང་དག་བྱེད་པར་འགྱུར་རོ། །ཡང་ན་དེར་གླེགས་བམ་དུ་བྲི་བ་བྱས་ནས་ངའི་ཆོས་ཀྱི་སྐུ་ཡང་འཆང་བར་འགྱུར་རོ། །དེར་ཡང་མཆོད་པ་རྣམ་པ་སྣ་ཚོགས་དག་ཀྱང་བྱེད་པར་འགྱུར་ཞིང་། དེར་རིན་པོ་ཆེ་རྣམ་པ་སྣ་ཚོགས་དག་ཀྱང་འབུལ་བར་འགྱུར་ཏེ། འདི་ལྟ་སྟེ། གསེར་དང་། དངུལ་དང་། བཻ་དཱུརྱ་དང་། ཤེལ་དང་། མུ་ཏིག་དམར་པོ་དང་།